ລິ້ງ ສຳຫລັບເຂົ້າຫາ

ທ່ານ Kerry ຈະໄປຢ້ຽມຢາມ ເທີກີ ແລະອີສຣາແອລ ໃນ ອາທິດໜ້າ


ທ່ານ John Kerry (ກາງ) ລັດຖະມົນຕີຕ່າງປະເທດສະຫະລັດ

ທ່ານ John Kerry (ກາງ) ລັດຖະມົນຕີຕ່າງປະເທດສະຫະລັດ

ທ່ານ John Kerry ລັດຖະມົນຕີ​ຕ່າງປະ​ເທດ​ສະຫະລັດ​ມີ​ກໍ​ານົດ​ໄປຢ້ຽມ ຢາມ​ປະ​ເທດ​ເທີ​ກີ ​ແລະ​ອີສຣາ​ແອ​ລ​ໃນ​ອາທິດ​ໜ້າ​ນີ້ ພຽງ​ບໍ່​ເທົ່າ​ໃດ​ມື້ຫຼັງຈາກປະທານາ​ທິບໍດີ ບາຣັກ ​ໂອ​ບາ​ມາ ​ໄດ້​ດຳ​ເນີນ​ຄວາມ​ພະຍາຍາມ​ເພື່ອ​ປັບປຸງ​ຄວາມ​ສໍາພັນ​ ລະຫວ່າງ​ສອງ​ປະ​ເທດ​ດັ່ງກ່າວ.

ທ່ານ​ນາງ Victoria Nuland ​ໂຄສົກ​ກະຊວງ​ຕ່າງປະ​ເທດ​ສະຫະລັດ​ເວົ້າ ວ່າ ທ່ານ ​ແຄ​ຣີຈະ​ໄປ​ຢ້ຽມຢາມນະຄອນ Istanbul ​ເມືອງ​ຫຼວງຂອງ​ເທີ​ກີ ​ໃນ​ວັນ​ອາທິດ ຈາກ​ນັ້ນ ​ທ່ານກໍ​ຈະ​ແວ່ຢ້ຽມຢາມ ນະຄອນ​ Jerusalem ​ເມືອງຫຼວງຂອງ​ອີສຣາແອ​ລ ​ແລະ​ເຂດ ຝັ່ງ​ຕາ​ເວັນ​ຕົກ​ຂອງ​ແມ່​ນໍ້າ​ຈໍ​ແດັນ​ຫຼື West Bank ທີ່​ປົກຄອງ​ໂດຍ​ປາ​ແລັສ​ໄຕ​ນັ້ນ. ຕໍ່​ຈາກນັ້ນ​ທ່ານ​ແຄຣີ ຈະ​ສືບ​ຕໍ່​ການ​ຢ້ຽມຢາມ​ຂອງ​ທ່ານ​ ທີ່​ໄດ້​ກໍານົດ​ໄວ້​ລ່ວງ​ໜ້າ​ແລ້ວນັ້ນ ຄື​ໄປ​ຢ້ຽມ ຢາມກຸງ​ລອນ​ດອນ ​ແລະຂົງ​ເຂດ​ເອ​ເຊຍ.

ທ່ານ Ahmet Davutoglu ລັດຖະມົນຕີ​ຕ່າງປະ​ເທດ​ຂອງ​ເທີ​ກີ​ເວົ້າ​ວ່າ ທ່ານ​ເອງ ​ແລະ ທ່ານ John Kerry ຈະ​ປຶກສາ​ຫາລື​ກັນ​ກ່ຽວ​ກັບ​ບັນຫາ​ຄວາມ​ເປັນ​ຫ່ວງຕ່າງໆ​ລະດັບ​ຂົງ​ເຂດ ​ໂຮມ​ທັງ​ສະຖານະ​ການ​ຊີ​ເຣຍ ​ແລະ​ຂັ້ນ​ຕອນ​ການສ້າງສັນ​ຕິ​ພາບ​ລະຫວ່າງ​ອີສຣາ​ແອ​ລ​ແລະ​ປາ​ແລັສ​ໄຕ​ນັ້ນ​ນໍາ.

ຄວາມ​ສໍາພັນ​ລະຫວ່າ​ງ​ເທີ​ກີ ​ແລະ​ອີສຣາ​ແອ​ລ ​ແມ່ນເຄັ່ງ​ຕຶງ​ຢ່າງ​ຮຸນ​ແຮງ ​ໃນ​ປີ 2010 ຫຼັງຈາກ​ອີສຣາ​ແອ​ລ​ໄດ້​ບຸກຂຶ້ນ​ໄປ​ກວດຄົ້ນຂະ​ບວນເຮືອ​ຂອງ​ເທີ​ກີ​ທີ່​ມຸ້ງ​ໜ້າ​ໄປ​ຍັງ​ເຂດ​ກາຊາ​ ຊຶ່ງເປັນ​ເຫດໃຫ້​ຊາວ​ເທີ​ກີ​ແປດ​ຄົນ ​ແລະ​ຊາວ​ອະ​ເມຣິກັນ​ເຊື້ອສາຍ​ເທີ​ກີ​ນຶ່ງ​ຄົນ​ເສຍ​ຊີວິດ​ໃນ​ເຫດການ​ຄັ້ງ​ນັ້ນ.

ໃນ​ໄລຍະ​ບໍ່​ເຖິງ​ສອງ​ອາທິ​ດຜ່ານ​ມາ​ນີ້ ທ່ານ​ໂອ​ບາ​ມາ ​ໄດ້​ຊ່ວຍ​ຈັດ​ແຈງໃຫ້​ທ່ານ Benjamin Netanyahu ນາຍົກລັດຖະມົນຕີອິສຣາ​ແອ​ລ ໂທ ໄປ​ຫາ​ທ່ານ Recep Tayyip Erdogan ນາຍົກລັດຖະມົນຕີ​ເທີ​ກີຊຶ່ງ​ໃນ​ການ​ໂອ້​ລົມ​ກັນ​ນັ້ນ ​ທ່ານ Natanyahu ​ໄດ້​ກ່າວ​ຂໍ​ຂະ​ມາໂທດ​ຕໍ່​ເທີ​ກີ ​ໃນ​ການບຸກຂຶ້ນ​ໄປ​ກວດຄົ້ນຂະ​ບວນ​ເຮືອ​ຂອງເທີ​ກີ​ໂດຍ​ອິສຣາ​ແອ​ລນັ້ນ.

​ເທີ​ກີ ​ໄດ້​ທວງ​ໃຫ້​ອີສຣາ​ແອ​ລຂໍຂະ​ມາ​ໂທດ ເປັນເງື່ອນ​ໄຂລ່ວງ​ໜ້າ​ກ່ອນ ຈະ​ຟື້ນຟູ​ຄວາມສໍາພັນ​ຄືນ​ໃໝ່​ກັບອີສຣາ​ແອ​ລ.
XS
SM
MD
LG