ປາກິສຖານກໍາລັງຮຽກຮ້ອງໃຫ້ສະຫະລັດເຄົາລົບນັບຖື ຂັ້ນຕອນທາງດ້ານກົດໝາຍຂອງຕົນ ຫລັງຈາກບັນດາເຈົ້າໜ້າທີ່ສະຫະລັດຮຽກຮ້ອງໃຫ້ປາກິສຖານປ່ອຍໂຕນັກການທູດອາເມຣິກັນຄົນນຶ່ງ ທີ່ຖືກຈັບໃນຂໍ້ ຫາ ຍິງຊາວປາກິສຖານ 2 ຄົນຕາຍ.
ກະຊວງການຕ່າງປະເທດປາກິສຖານ ກ່າວວ່າ ເລື້ອງນີ້ກໍາລັງຢູ່ພາຍໃຕ້ການສືບສວນສອບສວນ ແລະພາຍໃຕ້ອໍານາດຂອງສານ.
ກ່ອນໜ້ານັ້ນ ໃນວັນເສົາວານນີ້ ສະຖານທູດສະຫະລັດທີ່ກຸງອິສລາມາບັດກ່າວວ່າ ນັກການທູດຂອງຕົນຄົນດັ່ງກ່າວມີສິດທາງການທູດ ທີ່ຈະ ໄດ້ຮັບການຍົກເວ້ນຈາກການດໍາເນີນຄະດີ ແລະໄດ້ຖືກເຈົ້າໜ້າທີ່ປາກິສຖານຈັບກຸມຢ່າງບໍ່ຖືກຕ້ອງຕາມກົດໝາຍໃນເມືອງ Lahore ໃນພາກຕາເວັນອອກຂອງປາກິສຖານ ບ່ອນເກີດເຫດ
ການຍິງກັນນັ້ນ.
ໂຄສົກຍິງປະຈໍາສະຖານທູດສະຫະລັດ ກ່າວວ່າ ທ່ານ Raymond Davis ນັກການທູດສະຫະລັດ ໄດ້ເຮັດໄປເພື່ອປ້ອງກັນຕົນເອງຫລັງຈາກທ່ານເອົາໂຕຫລົບໜີຈາກຊາຍສອງຄົນ ທີ່ທ່ານກ່າວຫາວ່າ ພະຍາຍາມຈະປຸ້ນຈີ້ທ່ານໃນວັນພະຫັດຜ່ານມາໃນເມືອງ Lahore ນັ້ນ. ທາງການປາກິສຖານກ່າວວ່າ ທ່ານ Davis ຍິງປືນໃສ່ຊາຍ 2 ຄົນນີ້ ທີ່ໄດ້ເສຍຊີວິດໄປ ໃນເວລາຕໍ່ມານັ້ນ.
ທ່ານ Davis ປະເຊີນກັບຂໍ້ກ່າວຫາສອງກະທົງ ໃນຖານທໍາການຄາດຕະກໍາຊາຍສອງຄົນນີ້. ໃນວັນສຸກຜ່ານມານີ້ ຜູ້ພິພາກສາ ໄດ້ສັ່ງໃຫ້ຈັບກຸມທ່ານໄວ້ເປັນເວລາ 6 ມື້ ໃນຂະນະທີ່ເຈົ້າໜ້າທີ່ຕໍາຫລວດພວມທໍາການສືບສວນສອບສວນເລື້ອງນີ້.