ບໍລິສັດນ້ຳມັນ BP ປະກາດໃຫ້ຮູ້ວ່າຄວາມພະຍາຍາມຂອງຕົນຄັ້ງຫລ້າສຸດເພື່ອຢຸດບໍ່ໃຫ້ນ້ຳມັນ
ດິບຮົ່ວໄຫລອອກມາໃນອ່າວເມັກຊິໂກນັ້ນປະສົບກັບຄວາມລົ້ມແຫລວ. ໃນຖ້ອຍຖະແຫລງຂ່າວ
ສັ້ນໆໃຫ້ຮູ້ໃນແລງວັນເສົາວານນີ້ ທ່ານ Doug Suttles ຫົວໜ້າບໍລິຫານນ້ຳມັນBP ກ່າວວ່າ ທາງບໍລິສັດບໍ່ສາມາດຢຸດໃຫ້ນ້ຳມັນຮົ່ວໄຫລອອກມາໄດ້ ໂດຍວິທີໃຊ້ນ້ຳມັນແຫລວຫລື fluid ທ່ີໃຊ້ໃນການເຈາະບໍ່ນ້ຳມັນແລະວັດສະດຸອື່ນໆເພື່ອອັດຕັນບໍ່ນ້ຳມັນທ່ີພຸ່ງອອກມານັ້ນ.
ທ່ານ Suttles ກ່າວວ່າ ຍຸດທະວິທີແບບໃໝ່ຈະພະຍາຍາມໃຊ້ຝາອັດທໍ່ເຈາະນ້ຳມັນ ທີ່ຢູ່ໃກ້ໆ ກັບພື້ນທະເລນັ້ນ. ທ່ານ Suttles ກ່າວວ່າຝາອັດທ່ີວ່ານີ້ຈະສາມາດອັດນ້ຳມັນທ່ີໄຫລຂຶ້ນມາຈາກ ບໍ່ນັ້ນໄດ້ເກືອບທັງໝົດ ແຕ່ທ່ານກ່າວເຕືອນວ່າ ວິທີການດັ່ງກ່າວນີ້ຈະໃຊ້ເວລາຢ່າງນ້ອຍ 4 ມື້ ເພື່ອຈະວາງຝາອັດຮູນ້ຳມັນທ່ີວ່ານີ້.
ບໍ່ນ້ຳມັນທ່ີຮົ່ວນີ້ສົ່ງນ້ຳມັນຂຶ້ນສູ່ໜ້ານ້ຳ ມື້ນຶ່ງປະມານ 12 ຫາ 19 ພັນຖັງໃນແຕ່ລະມື້ ນັບແຕ່ເດືອນ ແລ້ວນີ້ເປັນຕົ້ນມາ ຊຶ່ງເປັນນ້ຳມັນຮົ່ວໄຫລອອກມາຄັ້ງຮ້າຍແຮງທ່ີສຸດໃນປວັດສາດຂອງສະຫະລັດ.
ຫລັງຈາກບໍລິສັດ BP ປະກາດຂ່າວນີ້ໃຫ້ຮູ້ແລ້ວ ປະທານາທິບໍດີ ບາຣັກ ໂອບາມາ ກໍໄດ້ອອກຄໍາ ຖະແຫລງສະບັບນຶ່ງ ກ່າວວ່າ ລັດຖະບານຈະດຳເນີນການທຸກໆວິທີເພື່ອຮັບຜິດຊອບໃນການ ເຮັດໃຫ້ນ້ຳມັນຢຸດເຊົາຮົ່ວ.
