ສະຫະລັດກ່າວວ່າ ກອງທັບເຮືອຂອງຕົນໄດ້
ສະກັດກັ້ນເຮືອເກົາຫລີເໜືອລໍານຶ່ງໄວ້ ທີ່ສົງ
ໄສວ່າ ຂົນເຕັກໂນໂລຈີລູກສອນໄຟໄປໃຫ້
ມຽນມາ ແລະໄດ້ບັງຄັບເຮືອລໍານັ້ນໃຫ້ກັບ
ຄືນໄປຍັງເກົາຫລີເໜືອ ຫລັງຈາກປະເຊີນ
ໜ້າກັນເປັນເວລາຫລາຍມື້.
ທ່ານ Gary Samore ຜູ້ຊ່ອຍວຽກພິເສດ
ຂອງປະທານາທິບໍດີບາຣັກ ໂອບາມາ ກ່າວ
ວ່າເຮືອບັນທຸກສິນຄ້າຂອງເກົາຫລີເໜືອ ຊື່
ວ່າ M/V Light ຊຶ່ງມີການສົງໄສກັນວ່າ
ເຮືອລໍານີ້ບັນທຸກສິນຄ້າຕ້ອງຫ້າມ ເຊ່ນພວກ
ອາວຸດຂະໜາດນ້ອຍ ຫລືເຕັກໂນໂລຈີລູກສອນໄຟ ໄປໃຫ້ມຽນມາ.
ເຮືອພິຄາດ McCampbell ຂອງກອງທັບເຮືອສະຫະລັດໄດ້ສະກັດກັ້ນເຮືອລໍາດັ່ງກ່າວທີ່
ຕິດທຸງຂອງປະເທດ Belize ໃນເຂດນ່ານນໍ້າສາກົນໃນວັນທີ 26 ພຶດສະພາຜ່ານມາ ແລະ
ໄດ້ຮັບອະນຸຍາດຈາກ Belize ໃຫ້ເຂົ້າຄົ້ນເຮືອລໍານີ້ໄດ້. ແຕ່ພວກລູກເຮືອເກົາຫລີເໜືອບໍ່
ຍອມໃຫ້ຂຶ້ນໄປເທິງເຮືອ ແລະຫລັງຈາກການປະເຊີນໜ້າກັນທາງທະຫານເປັນເວລາສອງ
ສາມມື້ ແລະຄວາມກົດດັນທາງການທູດ ເຮືອລໍານີ້ກໍໄດ້ແລ່ນກັບຄືນສູ່ເກົາຫລີເໜືອ.
ບັນດາເຈົ້າໜ້າທີ່ສະຫະລັດບັນລະຍາຍເຫດການດັ່ງກ່າວວ່າ ເປັນໂຕຢ່າງອັນນຶ່ງກ່ຽວກັບ
ວິທີການທີ່ພວກເຂົາເຈົ້າສາມາດໃຊ້ທັງອໍານາດທາງກອງທັບເຮືອ ແລະຄວາມກົດດັນທາງ
ການທູດ ເພື່ອບັງຄັບໃຊ້ການລົງໂທດຂອງສະຫະປະຊາຊາດຕໍ່ເກົາຫລີເໜືອນັ້ນ ຫລັງ
ຈາກເກົາຫລີເໜືອ ໄດ້ທົດລອງອາວຸດນີວເຄລຍ ໃນປີ 2009.
