ສະຫະລັດໄດ້ເຕືອນພວກຄັດຄ້ານລັດຖະບານອີຣ່ານກຸ່ມນຶ່ງວ່າ ຍັງມີເວລາບໍ່ຫຼາຍສຳຫຼັບກຸ່ມ
ດັ່ງກ່າວທີ່ຈະຕ້ອງຍົກຍ້າຍອອກໄປຈາກສູນລີ້ໄພຢູ່ໃນອີຣັກ.
ທ່ານ Daniel Benjamin ເຈົ້າໜ້າທີ່ຕໍ່ຕ້ານການກໍ່ການຮ້າຍຂອງສະຫະລັດ ກ່າວໃນມື້ວັນ
ສຸກວານນີ້ວ່າອົງການມູຈາຮີດີນປະຊາຊົນຂອງອີຣ່ານຊຶ່ງເປັນທີ່ຮູ້ກັນໃນນາມກຸ່ມ Mujahe-
deen-e Khalq ຫຼື MEK ນັ້ນຕ້ອງໄດ້ຍົກຍ້າຍ ຢ່າງສິ້ນເຊີງອອກໄປຈາກສູນ Ashraf ຢູ່
ໃນພາກເໜືອອີຣັກ ພາຍໃນກຳນົດເສັ້ນຕາຍ ທີ່ລັດຖະບານອີຣັກ ໄດ້ຕັ້ງໄວ້ ໃນວັນທີ 20
ເດືອນນີ້.
ທ່ານເວົ້າວ່າ ການສຳເລັດເສັດສິ້ນໃນການຍົກຍ້າຍທັນຕາມກຳນົດເວລາຈະເປັນພາກສ່ວນ
ສຳຄັນໃນການຕັດສິນໃຈຂອງລັດຖະມົນຕີການຕ່າງປະເທດສະຫະລັດ ທ່ານນາງ Hillary
Clinton ກ່ຽວກັບວ່າ ຈະລຶບຊື່ຂອງກຸ່ມດັ່ງກ່າວນີ້ອອກຈາກບັນຊີພວກກໍ່ການຮ້າຍຫຼືບໍ່ທີ່
ທ່ານນາງຈະຕ້ອງຕັດສິນໃຈກ່ອນວັນທີ 1 ຕຸລາປີນີ້.
ການຕົກລົງລະຫວ່າງອົງການສະຫະປະຊາຊາດ ແລະອີຣັກ ແມ່ນຮຽກຮ້ອງໃຫ້ສະມາຊິກ
ທຸກໆຄົນຂອງກຸ່ມມູຈາຮີດີນປະຊາຊົນຍົກຍ້າຍຈາກສູນ Ashraf ໄປຢູ່ສູນອີກແຫ່ງນຶ່ງໃກ້
ນະຄອນຫຼວງແບັກແດດ.
ສະມາຊິກຂອງກຸ່ມ MEK ປະມານ 2,000 ຄົນໄດ້ຍ້າຍໜີໄປຈາກສູນ Ashraf ແລ້ວ ແຕ່
ເຈົ້າໜ້າທີ່ເວົ້າວ່າ ຍັງມີສະມາຊິກຂອງກຸ່ມ ຫຼາຍເຖິງ 1,300 ຄົນ ຍັງຢູ່ທີ່ສູນດັ່ງກ່າວ. ກຸ່ມ
MEK ຢືນຢັດວ່າ ລັດຖະບານອີຣັກຕ້ອງສະໜອງຕອບຕໍ່ຄວາມຮຽກຮ້ອງຕ້ອງການທາງ
ດ້ານມະນຸດສະທຳຈຳນວນນຶ່ງກ່ອນສະມາຊິກທີ່ຍັງເຫຼືອຢູ່ນັ້ນຈະຍ້າຍອອກໄປ.
ອີຣັກໄດ້ໃຫ້ບ່ອນພັກພາອາໄສແກ່ກຸ່ມມູຈາຮີດີນປະຊາຊົນຫຼັງຈາກການປະຕິວັດ ປີ 1979
ໃນອີຣ່ານແຕ່ໄດ້ກ່າວຫາສະມາຊິກບາງຄົນຂອງກຸ່ມດັ່ງກ່າວໃຫ້ການຊ່ອຍເຫຼືອແກ່ມື້ລາງຜູ້
ນຳອີຣັກ ທ່ານ Saddam Hussein ປາບປາມການກໍ່ກະບົດ ຂອງພວກຊີໄອທ໌ ເມື່ອປະ
ມານ 20 ປີກ່ອນ.