ລິ້ງ ສຳຫລັບເຂົ້າຫາ

ສຫລ ກັບ ຫຼາຍສິບປະເທດ ສະເຫຼີມສະຫຼອງວັນແມ່ ໂດຍການໃຫ້ກຽດ ແກ່ມານດາ


ຊາຍເກົາຫຼີເໜືອ ກຳລັງຈ່າຍເງິນຄ່າດອກໄມ້ ຢູ່ຕໍ່ໜ້າຮ້ານດອກໄມ້ ທີ່ເມືອງ Pyongyang, ປະເທດ ເກົາຫຼີເໜືອ, ທີ່ສະຫລອງວັນແມ່ ຄືກັນ ກັບອີກຫລາຍສິບປະເທດ.

ຊາຍເກົາຫຼີເໜືອ ກຳລັງຈ່າຍເງິນຄ່າດອກໄມ້ ຢູ່ຕໍ່ໜ້າຮ້ານດອກໄມ້ ທີ່ເມືອງ Pyongyang, ປະເທດ ເກົາຫຼີເໜືອ, ທີ່ສະຫລອງວັນແມ່ ຄືກັນ ກັບອີກຫລາຍສິບປະເທດ.

ວັນ​ອາທິດ ທີ 10 ພຶດສະພາ ມື​້ນີ້ ແມ່ນວັນ​ແມ່​ແຫ່ງ​ຊາດ​ ຢູ່ໃນ​ສະຫະລັດ​ອາ​ເມ​ຣິກາ ​ແລະ ຫຼາຍ​ສິບປະ​ເທດໃນ​ທົ່ວ​ໂລກ.

ວັນ​ແມ່ ແມ່ນເວລາທີ່​ຜູ້​ຄົນ​ພາກັນສະເຫຼີ​ມສະ​ຫຼອງ ​ແລະສະ​ແດງ​ຄວາມຮູ້ບຸນຄຸນ​ ຕໍ່​ທຸກ​ວຽກ​ງານ​ທີ່​ແມ່​ຍິງ​ເຮັດ.

ອີ​ງຕາມ​ສາລະຄະ​ດີ​ຂອງໂທລະ​ພາບຊ່ອງ​ History ຫຼື
ປະຫວັດສາດ ວັນ​ແມ່​ໄດ້​ກາຍ​ເປັນວັນ​ພັກແຫ່ງ​ຊາດ​ຂອງ​ສະຫະລັດ ​ຢ່າງ​ເປັນ​ທາງການ ​ໃນ​ປີ 1914, ​ເນື່ອງ​ມາ​ຈາກຜົນງານ​ຂອງ​ນາງ Anna Jarvis, ຜູ້​ທີ່​ເຫັນ​ວັນພັກມື້​ນີ້​ ເປັນອີກ​ວິທີ
ໜຶ່ງສຳຫລັບໃຫ້​ກຽດ ແກ່ຄວາມ​ເສຍສະຫຼະ​ເພື່ອ​ລູກ ຂອງ​ບັນດາ​ແມ່​ທັງຫຼາຍ.

ນາງ Jarvis ​ໂດຍ​ດັ້ງ​ເດີ​ມ​ແລ້ວ ​ໄດ້​ຄິດ​ວ່າ ​ວັນ​ແມ່ເປັນ​ວັນ​ສະ​ເຫຼີ​ມສະຫຼອງ​ສ່ວນ​ຕົວ​
ລະຫວ່າງ​ແມ່ກັບຄອບຄົວ. ແຕ່​ວ່າ ​ຫຼັງຈາກ​ທີ່ວັນ​ແມ່ໄດ້​ກາຍ​ມາ​ເປັນ​ວັນພັກຢ່າງ​ເປັນ​ທາງ​ການ​ແລ້ວ, ບັນດາ​ຄົນ​ຂາຍ​ດອກ​ໄມ້, ບໍລິສັດ​ຜະລິດ​ບັດ​ອວຍພອນ ​ແລະ ພໍ່​ຄ້າ​ຊາວ​ຂາຍ​ອື່ນໆ ​ກໍ່​ພາກັນ ສວາຍ​ເອົາ​ປະໂຫຍ​ດ ສ້າງ​ລາຍໄດ້​ເພີ່ມ​ ໃນ​ມື້​ທີ່​ສຳຄັນ​ດັ່ງ​ກ່າວ.

ນາງ Jarvis ​ໄດ້​ສະ​ແດງ​ຄວາມ​ເບື່ອ​ໜ່າຍ ​ແລ​ະ ບໍ່​ຍອມຮັບວ່າ​ວັນພັກ​ດັ່ງ​ກ່າວ​ ​ເປັນ​ຜົນງານ​ຂອງ​ຕົນ ກ່ອນລາວເສຍ​ຊີວິດໄປໃນ​ປີ 1948. ລາວ​ຍັງຮອດ​ໄດ້ຊັກ​ຊວນໃຫ້​ລັດຖະບານ​ ລົບລ້າງ​ວັນ​ພັກ​ນັ້ນ​ອອກ​ຈາກ ​ປະຕິທິນ​ຂອງ ອາ​ເມຣິກາ.

​ແຕ່​ວ່າ​ວັນ​ແມ່ ກໍ່​ຍັງ​ຄົງ​ຢູ່. ມັນ​ເປັນ​ວັນພັກ​ທີ່​ໄດ້​ຮັບ​ຄວາມນິຍົມ​ທີ່​ສຸດ ​ ວັນໜຶ່​ງ​ ແລະ ​ເປັນໜຶ່ງ​ໃນວັນພັກ​ທີ່ໃຫຍ່​ທີ່​ສຸດ ສຳລັບ​ການ​ໃຊ້​ຈ່າຍ​ຂອງ​ ຜູ້​ບໍລິ​ໂພ​ກ.

ບໍ່​ແມ່ນ​ທຸກໆ​ປະ​ເທດ​ໃນ​ໂລກ ​ມີການ​ສະ​ເຫຼີ​ມສະຫຼອງ​ວັນແມ່ ​ໃນ​ວັນອາທິດ ​ສັບປະດາທີ 2 ​ຂອງ​ເດືອນພຶດສະພາ. ​ໃນ​ປະ​ເທດ​ໄທ, ວັນ​ແມ່ ​ແມ່ນສະ​ເຫຼີ​ມສະຫຼອງກັນ​ ໃນ​ເດື​ອນສິງ​ຫາ ເຊິ່ງ​ເປັນ​ວັນ​ຄ້າຍ​ວັນປະສູດ​ຂອງ ​ພະ​ລາຊິ​ນີຄົນ​ປະຈຸ​ບັນ. ​ໃນ​ປະ​ເທດ Ethiopia, ບັນດາ​ສະມາຊິກ​ໃນ​ຄອບຄົວ​ຈະ​ມາເຕົ້າ​ໂຮມ​ກັນຫຼາຍ​ມື້​ ເພື່ອ​ສະ​ເຫຼີມ ສະຫຼອງ​ນຳ​ກັນ​ ດ້ວຍ​ສຽງ​ເພງ ​ແລະອາ​ຫານ ເພື່ອ​ເປັນ​ກຽດ ​ໃຫ້​ແກ່​ຄວາມ​ເປັນແມ່.

XS
SM
MD
LG