ທາງການສະຫະລັດ ສົ່ງມອບຄວາມຊ່ວຍເຫຼືອ ໃຫ້ແກ່ໂຄງການ
ພັດທະນາລາວ ເປັນລັດແຫ່ງກົດໝາຍ ແລະຄວາມສະເໝີພາບ
ຊຶ່ງເປັນໂຄງການທີ່ຮ່ວມມື ກັບສະຫະປະຊາຊາດ ແລະ
ສະຫະພາບຢູໂຣບ.
ການລົງນາມໃນຂໍ້ຕົກລົງ ເພື່ອສົ່ງມອບການຊ່ວຍເຫຼືອ ໃຫ້ໂຄງການຈັດຕັ້ງປະຕິບັດແຜນ
ແມ່ບົດ ວ່າດ້ວຍການພັດທະນາລັດແຫ່ງກົດໝາຍໃນລາວ ໄດ້ມີຂຶ້ນເມື່ອບໍ່ນານມານີ້ ຢູ່ທີ່
ນະຄອນຫລວງວຽງຈັນ ໂດຍເປັນການລົງນາມຮ່ວມກັນ ລະຫວ່າງ ທ່ານ Daniel Clune
ເອກອັກຄະລັດຖະທູດສະຫະລັດອາເມຣິກາປະຈຳລາວ ໃນຖານະຜູ້ສົ່ງມອບການ
ຊ່ວຍເຫຼືອ ກັບ ທ່ານນາງ Kaarina Immonen ຜູ້ຕາງໜ້າອົງການສະຫະປະຊາຊາດເພື່ອ ການພັດທະນາ (UNDP) ປະຈຳລາວ ໂດຍມີ ທ່ານຄຳພັນ ສິດທິດຳພາ ປະທານສານ ປະຊາຊົນສູງສຸດ ແລະ ທ່ານເກດ ກຽດຕິສັກ ລັດຖະມົນຕີຊ່ວຍວ່າການ ກະຊວງຍຸດຕິທຳ
ໄດ້ເຂົ້າຮ່ວມໃນພິທີດ້ວຍ.
ການສົ່ງມອບຄວາມຊ່ວຍເຫຼືອ ໃນຄັ້ງນີ້ມີມູນຄ່າ 250,000 ຈາກ 600,000 ດອນລາ ທີ່
ທາງການສະຫະລັດ ໄດ້ປະກອບສ່ວນເຂົ້າໃນ ໂຄງການທີ່ເປັນການຮ່ວມມື UNDP ແລະ
ສະຫະພາບຢູໂຣບ ທີ່ມີມູນຄ່າລວມເຖິງ 3 ລ້ານ 9 ແສນດອນລາ ເພື່ອນຳໃຊ້ເຂົ້າໃນການ
ພັດທະນາສະຖາບັນທາງກົດໝາຍ ແລະລະບົບຍຸດຕິທຳ ຂອງປະຊາຊົນໃນລາວໃຫ້ດີຂຶ້ນ
ລວມເຖິງການສົ່ງເສີມໃຫ້ມີການສ້າງກົດໝາຍ ແລະລະບຽບການຕ່າງໆ ໃຫ້ມີຄວາມ
ຊັດເຈນສອດຄ້ອງ ແລະຕອບສະໜອງ ຄວາມຮຽກຮ້ອງຕ້ອງການຂອງປະຊາຊົນ.
ຍິ່ງໄປກວ່ານັ້ນ ການໃຫ້ຄວາມຊ່ວຍເຫຼືອແກ່ລາວດັ່ງກ່າວນີ້ ຍັງໄດ້ໃຫ້ຄວາມສຳຄັນເປັນ
ພິເສດກັບການພັດທະນາ ເພື່ອຄວາມສະເໝີພາບ ລະຫວ່າງຍິງ-ຊາຍ ໄດ້ກໍ່ໃຫ້ເກີດບັນຫາ ຂັດແຍ້ງໃນຄອບຄົວ ຂອງຄົນລາວຫຼາຍຂຶ້ນນັບມື້ ໂດບຂະເຫັຍໄດ້ຈາກລາຍງານຫຼ້າສຸດ
ຂອງກະຊວງຍຸດຕິທຳໃນລາວ ທີ່ລະບຸວ່າ ໃນລະຍະນັບແຕ່ເດືອນຕຸລາ 2012 ເຖິງທ້າຍເດືອນ ມັງກອນ 2014 ສານປະຊາຊົນລາວ ໄດ້ຮັບການຟ້ອງຮ້ອງລະຫວ່າງເອກະຊົນ
ຫຼາຍກວ່າ 16,000 ກໍລະນີ ໂດຍໃນນີ້ກໍປາກົດວ່າ ມີຈຳນວນຫຼາຍກວ່າ 13,000 ກໍລະນີ
ທີ່ເປັນບັນຫາຂັດແຍ້ງກ່ຽວກັບຄອບຄົວ.
ທັງນີ້ໂດຍສະເພາະແມ່ນການຂັດແຍ້ງ ລະຫວ່າງສາມີ-ພັນລະຍາ
ທີ່ຟ້ອງຮ້ອງກັນ ໃນຄະດີການຢ່າຮ້າງ ແລະການຍາດແຍ່ງເອົາ
ຊັບສິນ ລວມເຖິງການຂັດແຍ້ງກັນກ່ຽວກັບສິດໃນການລ້ຽງດູລູກ
ແລະການຮຽກຮ້ອງເອົາຄ່າລ້ຽງດູລູກ ແຕ່ທີ່ຖືວ່າເປັນສິ່ງທີ່ສະທ້ອນ
ເຖິງຄວາມເສື່ອມທາງສິນທຳ ໃນລາວຫຼາຍຂຶ້ນນັບມື້ ກໍຄືຄະດີກ່ຽວ
ກັບການລະເມີດທາງເພດ ຫຼືການຂົ່ມຂືນ ທີ່ຜູ້ເປັນພໍ່ກະທຳຕໍ່ລູກ
ຂອງຕົນ.
ຍິ່ງໄປກວ່ານັ້ນ ສະພາບຂອງການເຊື່ອຖື ແລະງົມງວາຍ ຂອງ
ບັນດາຊົນເຜົ່າຕ່າງໆ ທີ່ຢູ່ໃນເຂດຊົນນະບົດ ແລະມີບັນຫາ
ຍາກຈົນຢ່າງຍິ່ງນັ້ນ ກໍຍັງເປັນສາເຫດ ທີ່ເຮັດໃຫ້ບັນຫາ ດັ່ງ
ກ່າວນີ້ ມີທ່າອຽງເພີ້ມຫຼາຍຂຶ້ນນັບມື້ອີກດ້ວຍ ດັ່ງທີ່ເຈົ້າໜ້າທີ່ຂັ້ນສູງ ໃນກະຊວງຍຸດຕິທຳຂອງລາວ ໄດ້ໃຫ້ການຢືນຢັນວ່າ:
“ການປະຕິບັດສິດສະເໝີພາບລະຫວ່າງຍິງ-ຊາຍຍັງບໍ່ທັນໄດ້ດີ ໂດຍສະເພາະ
ແມ່ນຢູ່ເຂດຊົນນະບົດຍັງໜັກໄປທາງປະຕິບັດຕາມຮີດຄອງປະເພນີ ຂອງບາງ
ເຜົ່າ ແລະມີການເຊື່ອຖືງົມງວາຍ ຍັງມີປາກົດການລະເມີດສິດຂອງແມ່ຍິງເປັນຕົ້ນ
ມີການຂົ່ມຂືນກະທຳຊຳເລົາ ການຄ້າໂສເພນີ ການຄ້າມະນຸດ ໃນຮູບແບບຕ່າງໆ
ມີການໃຊ້ແຮງງານທີ່ໜັກໜ່ວງເກີດໄປໃນຄອບຄົວ.”
ນອກຈາກນີ້ ເຈົ້າໜ້າທີ່ຂັ້ນສູງຂອງລາວ ກໍຍັງໄດ້ໃຫ້ການຍອມຮັບດ້ວຍວ່າ ການພິຈາລະນາ ເພື່ອຕັດສິນຄະດີ ຂອງສານປະຊາຊົນລາວ ໄດ້ດຳເນີນໄປຢ່າງຊັກຊ້າຫຼາຍ ເນື່ອງຈາກວ່າ ສານປະຊາຊົນລາວໃນທົ່ວປະເທດ ມີຈຳນວນຜູ້ພິພາກສາ ພຽງແຕ່ 384 ຄົນເທົ່ານັ້ນ ຈຶ່ງເຮັດໃຫ້ການແກ້ໄຂບັນດາຄະດີຄວາມຕ່າງໆ ບໍ່ເທົ່າທັນກັບສະພາບບັນຫາ ທີ່ເພີ້ມຂຶ້ນຢ່າງໄວວານັ້ນເອງ.
ເພາະສະນັ້ນ ດ້ວຍການຮ່ວມມືລະຫວ່າງ UNDP ກັບສະຫະພາບຢູໂຣບ ແລະສະຫະລັດ
ໃນໂຄງການດັ່ງກ່າວນີ້ ກໍເຮັດໃຫ້ຄູ່ຮ່ວມພັດທະນາຈາກທັງ 3 ພາກສ່ວນດັ່ງກ່າວມີຄວາມເຊື່ອໝັ້ນວ່າ ລະບົບກົດໝາຍ ແລະການບັງຄັບໃຊ້ກົດໝາຍໃນລາວ ຈະມີຄວາມຍຸດຕິທຳ ແລະປະສິດທິພາບສູງຂຶ້ນຢ່າງຕັ້ງໜ້າ ເນື່ອງຈາກຈະມີການເຝິກອົບຮົມ ເພື່ອເສີມສ້າງຄວາມຮູ້ຄວາມສາມາດໃຫ້ກັບທັງຜູ້ພິພາກສາ ໄອຍະການ ທະນາຍຄວາມ ແລະເຈົ້າໜ້າທີ່ຕຳຫລວດ ເປັນກໍລະນີພິເສດອີກດ້ວຍ.