ລິ້ງ ສຳຫລັບເຂົ້າຫາ

ສຫລ ຊ່ວຍເຫຼືອ ລາວອີກ 12 ລ້ານໂດລາ ເພື່ອເກັບກູ້ ລະເບີດ ບໍ່ທັນແຕກ

  • ຊົງຣິດ ໂພນເງິນ

ສະຫະລັດ ມອບເງິນ ຊ່ວຍເຫຼືອເກັບກູ້ລະເບີດ ບໍ່ທັນແຕກ UXO ໃຫ້ແກ່ລັດຖະບານລາວ.
ສະຫະລັດ​ໃຫ້ການ​ຊ່ວຍ​ເຫຼືອ​ແກ່​ລາວ​ເຖິງ 12 ລ້ານ​ໂດ​ລ່າ ​ເພື່ອ​
ນໍາ​ໃຊ້​ໃນ​ການ​ເກັບ​ກູ້​ລະເບີດ​ບໍ່​ທັນ​ແຕກ (UXO) ລວມ​ເຖິງ​ການ​
ຊ່ວຍ​ເຫຼືອ​ຜູ້​ທີ່​ໄດ້​ຮັບ​ເຄາະ​ແລະ​ໃຫ້ການ​ສຶກສາ​ເພື່ອ​ຫຼຸດຜ່ອນ​ບັນ
ຫາ​ຈາກ UXO ອີກ​ດ້ວຍ.


ອົງການ Legacies of War ຊຶ່ງເປັນ​ອົງການ​ທີ່​ບໍ່​ສະ​ແຫວ​ງຫາ​ຜົນ​ກໍາ​ໄລ​ໃນ​ສະຫະລັດ ລາຍ​ງານ​ວ່າ ລັດຖະສະພາ​ສະຫະລັດ ​ໄດ້​ອະນຸມັດ​ງົບປະມານ​ມູນ​ຄ່າ 12 ລ້ານ​ໂດ​ລ່າ​ສໍາລັບ​ໃຫ້ການ​ຊ່ວຍ​ເຫຼືອ​ແກ່​ລາວເພື່ອ​ນໍາ​ໃຊ້​ໃນ​ການ​ເກັບ​ກູ້​ລະ​ເບີດ​ບໍ່​ທັນ​ແຕກ (UXO) ທີ່​ຕົກ​ຄ້າງໃນ​ລາວ ລວມ​ເຖິງ​ການ​ໃຫ້​ຄວາມ​ຊ່ວຍ​ເຫຼືອ​ແກ່​ປະຊາຊົນ​ລາວ ທີ່​ໄດ້​ຮັບ​ເຄາະ​ຈາກ​ລະ​ເບີດ​ດັ່ງ ກ່າວ ​ແລະ​ການ​ປຸກລະດົມ​ເຜີຍ​ແຜ່​ເພື່ອ​ໃຫ້​ຄວາມ​ຮູ້​ແກ່​ປະຊາຊົນ​ລາວ ທີ່​ແນ​ໃສ່​ການ​ລົດ​ອັນ ຕະລາຍ ຈາກ​ລະ​ເບີດ UXO ​ໃຫ້​ໄດ້​ຢ່າງ​ມີ​ປະສິດທິ​ຜົນ​ອີກ​ດ້ວຍ.

ພະນັກງານ ກໍາລັງທໍາລາຍ UXO ສ່ວນນຶ່ງທີ່ເກັບກູ້ໄດ້
ພະນັກງານ ກໍາລັງທໍາລາຍ UXO ສ່ວນນຶ່ງທີ່ເກັບກູ້ໄດ້

ການ​ອະນຸມັດ​ດັ່ງກ່າວ​ນີ້ ຖື​ເປັນ​ງົບປະມານ​ກ້ອນ​ໃຫຍ່​ສຸດ ທີ່​ທາງ​
ການ​ສະຫະລັດໄດ້​ໃຫ້ການ​ຊ່ວຍ​ເຫຼືອ​ແກ່​ລາວ​ນັບ​ຕັ້ງແຕ່​ສົງຄາມ​
ອິນ​ໂດ​ຈີນ ໄດ້​ສິ້ນ​ສຸດ​ລົງ​ ໃນ​ປີ 1975 ​ເປັນ​ຕົ້ນ​ມາ ໂດຍ​ມີ​ ເປົ້າ
ໝາຍ​ທີ່​ຈະ​ຫຼຸດຜ່ອນບັນຫາ ຜົນ​ກະທົບ​ຈາກ​ລະ​ເບີດ UXO ​ໃນ​
ລາວ​ລົງ​ເທື່ອ​ລະ​ກ້າວ ​ແລະ​ໃຫ້​ໝົດ​ໄປ​ໃນ​ທີ່​ສຸດດ້ວຍ​ການຈັດ​ຕັ້ງ​
ປະຕິບັດ​ທັງ​ໃນ​ການ​ເກັບ​ກູ້ການ​ ຊ່ວຍ​ເຫຼືອ​ຜູ້​ທີ່​ໄດ້ຮັບ​ເຄາະ​ ແລະ​
ການ​ປ້ອງ​ ກັນ​ຄຽງ​ຄູ່​ກັນ​ໄປ.

ທັງ​ນີ້​ໂດຍ​ນັບ​ຈາກ​ສົງຄາມ​ອິນ​ໂດ​ຈີນ​ສິ້ນ​ສຸດ​ລົງ ທາງ​ການ​ ສະ
ຫະລັດໄດ້​ໃຫ້ການ​ຊ່ວຍ​ເຫຼືອ​ແກ່​ລາວ​ໃນ​ການ​ຫຼຸດຜ່ອນ​ບັນຫາ​
ຜົນ​ກະທົບ​ຈາກ​ລະ​ເບີດ UXO ​ໄປແລ້ວ ຄິດ​ເປັນ​ມູນ​ຄ່າ​ຫຼາຍ​ກວ່າ 74 ລ້ານ​ໂດ​ລ່າ ​ໂດຍ​ລວມ​ເຖິງ​ການ​ຊ່ວຍ​ເຫຼືອ​ໃນ​ຄັ້ງ​ລ່າ​ສຸດ​ນີ້​ດ້ວຍ ​ແຕ່​ຖ້າ​ຫາກ​ຄິດ​ໄລ່​ ສະ​ເພາະ​ໃນ​ຊ່ວງ 5 ປີ​ມາ​ນີ້ ກໍ​ໄດ້​ວ່າ​ ທາງ​ການສະຫະລັດ​ ໄດ້​ໃຫ້ການ​ຊ່ວຍ​ເຫຼືອ​ແກ່​ລາວ​ໃນ​ດ້ານ​ດັ່ງກ່າວ​ນີ້​ໄປ​ແລ້ວ​ຫຼາຍ​ກວ່າ 32 ລ້ານ​ໂດ​ລ່າ ​ແລະ​ໃນ​ປີ 2014 ນີ້ ກໍ​ຖື​ເປັນ​ຄັ້ງ​ທໍາ​ອິດ ທີ່​ການ​ຊ່ວຍ​ເຫຼືອ​ມີ​ມູນ​ຄ່າ​ເກີນ​ກວ່າ 10 ລ້ານ​ໂດ​ລ່າ.

​ແຕ່​ຢ່າງ​ໃດ​ກໍ​ຕາມ ທ່ານ​ທອງ​ສິງ ທໍາມະ​ວົງ ນາຍົກລັດຖະມົນຕີລາວ ກໍ​ໄດ້​ຖະ​ແຫຼ​ງຍອມ ຮັບ​ວ່າ​ບັນຫາ​ນຶ່ງ ທີ່​ເປັນ​ອຸບປະສັກ​ຕໍ່​ການພັດທະນາ ​ເພື່ອ​ລົບ​ລ້າງ​ບັນຫາ​ຄວາມ​ຍາກຈົນ​ຂອງ​ປະຊາຊົນ​ລາວ​ບັນດາ​ເຜົ່າ ​ແລະການ​ນໍາພາ​ປະ​ເທດ​ລາວ​ໃຫ້​ຫຼຸດ​ພົ້ນ​ຈາກ​ສະພາບ​ດ້ອຍ​ພັດທະນາ ​ໃຫ້​ໄດ້​ພາຍໃນ​ປີ 2020 ນັ້ນ ກໍ​ຄື​ການ​ ທີ່​ດິນ​ລາວ​ ຍັງ​ມີ​ລະ​ເບີດ UXO ຕົກ​ຄ້າງ​ຢູ່​ຢ່າງ​ຫຼວງ ຫຼາຍ ​ແລະ​ຖ້າ​ຫາກ​ພິຈາລະນາ​ຈາກ​ລະດັບ​ຄວາມ​ສາມາດ​ໃນ​ການ​ເກັບ​ກູ້​ລະ​ເບີດ UXO ທີ່​ເປັນ​ຈິງ​ໃນ​ລາວ ຊຶ່ງ​ກໍ​ເປັນ​ຜົນ​ຕໍ່​ເນື່ອງ​ ຈາກ​ການ​ທີ່​ລັດຖະບານ​ລາວ​ຍັງ​ໄດ້​ຮັບ​ ການ​ຊ່ວຍ​ເຫຼືອ ດ້ານ​ງົບປະ​ມານ​ ຈາກ​ຕ່າງປະ​ເທດ​ຢ່າງ​ຈໍາກັດ ທັງ​ຍັງ​ບໍ່​ພຽງພໍ​ກັບ​ຄວາມ​ຕ້ອງການ​ທີ່​ເປັນ​ຈິງດ້ວຍ​ນັ້ນ ຈຶ່ງ​ເຮັດ​ໃຫ້​ສາມາດ​ຄາດໝາຍ​ໄດ້​ວ່າ ການ​ເກັບ​ກູ້​ລະ​ເບີດ UXO ​ໃຫ້​ໝົດ​ໄປ​ຈາກລາວ​ໄດ້​ນັ້ນ ຕ້ອງ​ໃຊ້​ເວລາ​ອີກ​ຍາວ​ນານ​ກວ່າ​ຮ້ອຍ​ປີ​ຢ່າງ​ແນ່ນອນ ດັ່ງ​ທີ​່ທ່ານ​ທອງ​ສິງ ​ໄດ້ຢືນ ຢັນ​ວ່າ:

“ການ​ຫຼຸດຜ່ອນ​ຜົນ​ກະທົບ​ຈາກ​ລະ​ເບີດ​ບໍ່​ທັນ​ແຕກ ຖ້າວ່າ​ເຮົາ​ມາ​ໄລ່​ໃສ່​ສະພາບ ປັດຈຸບັນ​ນີ້​ໃນ​ເນື້ອ​ທີ່ຂອງ​ປະ​ເທດ​ລາ​ວນີ້ທີ່​ຖືກ​ລະ​ເບີດ​ແລະ​ລະ​ເບີດ​ກໍ​ຍັງ​ຝັງ​ດິນ​ຢູ່​ໃນ​ເນື້ອ​ທີ່​ດຽວ​ນີ້​ຍັງ​ຫຼາຍ ຄັນ​ແຕ່​ວ່າ​ແກ່​ໃນ​ຈັງຫວະ​ຄື​ສູ່​ມື້​ນີ້ ​ເປັນ​ຮ້ອຍ​ປີ​ ຮ້ອຍ​ຫ້າ​ສິບ​ປີ ກໍ​ຍັງ​ບໍ່​ທັນ​ແລ້ວ ​ເວັ້ນ​ແຕ່​ວ່າ​ຕ່າງປະ​ເທດ​ສຸມ​ໃສ່​ຊ່ວຍ​ເຫຼືອພວກ​ເຮົາ​ ໃຫ້​ມີ​ທຶນຮອນ​ຢ່າງ​ພຽງພໍ.”

ທາງ​ດ້ານ​ທ່ານ​ບຸນ​ເຮືອງ ດວງ​ພະຈັນ ປະທານ​ ຄະນະ​ກໍາມະການ​ ຄຸ້ມ​ຄອງ​ແຫ່ງ​ຊາດ ​ເພື່ອ​ການ​ແກ້​ໄຂ​ບັນຫາ​ລະ​ເບີດ​ບໍ່ທັນ​ແຕກ​ທີ່​ຕົກ​ຄ້າງ​ໃນ​ລາວ ກໍ​ຍອມຮັບ​ວ່າ ການ​ເກັບ​ກູ້​ລະ​ເບີດ UXO ​ໃນ​ຊ່ວງ​ທີ່​ຜ່ານ​ມາຂ​ອງ​ແຜນການ​ປະຕິ​ບັດ​ງານ​ໃນ​ຊ່ວງ​ປີ 2011-2015 ຍັງ​ສາມາດ​ປະຕິບັດ​ໄດ້​ຕໍ່າ​ກວ່າ​ເປົ້າໝາຍ​ທີ່​ວາງ​ເອົາ​ໄວ້​ເຖິງ 70% ຂອງ​ແຜນການ​ທັງ​ໝົດ.

ກໍ​ຄື​ໃນ​ຂະນະ​ທີ່​ແຜນການ 5 ປີ​ໄດ້​ວາງ​ເປົ້າໝາຍ​ຈະ​ເກັບ​ກູ້​ລະ​ເບີດ UXO ​ໃຫ້​ໄດ້​ໃນ​ພື້ນ​ທີ່​ລວມບໍ່​ໜ້ອຍ​ກວ່າ 1 ​ແສນ​ເຮັກ​ຕ້າ ຫາກ​ແຕ່ການ​ປະຕິບັດ​ຕົວ​ຈິງ​ໃນ​ລະຍະ​ທີ່​ຜ່ານ​ມາ​ຈົນ​ເຖິງ​ປັດຈຸບັນ ກັບ​ສາມາດ​ເກັບ​ກູ້​ໄດ້​ໃນ​ພື້ນ​ທີ່​ລວມພຽງ​ແຕ່ 30,000 ​ເຮັກ​ຕ້າ ຫຼື​ຄິດ​ເປັນ 30% ຂອງ​ແຜນການ ທີ່​ວາງ​ໄວ້​ເທົ່າ​ນັ້ນ ດ້ວຍ​ເຫດ​ນີ້​ຈຶ່ງ​ເຮັດ​ໃຫ້​ເປັນ​ການ​ຍາກ​ທີ່​ຈະ​ສາມາດ​ບັນລຸ​ຕາມ​ເປົ້າໝາຍ​ທີ່ວາງ​ໄວ້​ ເມື່ອ​ເຖິງ​ປີ 2015 ດັ່ງກ່າວ. ​

ໂດຍ​ທາງ​ການ​ລາວ​ໄດ້​ໃຫ້ການ​ອະທິບາຍ​ວ່າ ສາ​ເຫດ​ສໍ​າຄັນ​ທີ່​ເຮັດ​ໃຫ້ການ​ເກັບ​ກູ້​ລະ​ເບີດ UXO ບໍ່​ສາມາດ​ທີ່​ຈະ​ບັນລຸ​ເປົ້າໝາຍ​ທີ່ວາງ​ໄວ້​ດັ່ງກ່າວ ກໍ​ຄື​ຂໍ້​ຈໍາກັດ​ທາງ​ດ້ານ​ງົບ ປະມານ ທັງ​ນີ້​ໂດຍ​ເຖິງ​ແມ່ນ​ວ່າທາງ​ການ​ລາວ​ຈະ​ໄດ້​ຮັບ​ການ​ຊ່ວຍ​ເຫຼືອ​ຈາກ​ຕ່າງປະ​ເທດ​ເຖິງ 30 ລ້ານ ​ໂດ​ລ່າ​ໃນ​ປີ 2012 ທີ່​ຜ່ານ​ມາ​ກໍ​ຕາມ ຫາກ​ແຕ່​ວ່າ 40% ຂອງ​ເງິນ​ຊ່ວຍ​ເຫຼືອ​ດັ່ງກ່າວ​ກໍ​ຕ້ອງ​ໃຊ້​ຈ່າຍ​ເປັນ​ເງິນ​ເດືອນ​ຂອງ​ພະນັກງງານ ​ແລະກາ​ນບໍລິຫານ ຈຶ່ງ​ມີ​ເງິນ​ຊ່ວຍ​ເຫຼື​ອພຽງ 60% ​ເທົ່າ​ນັ້ນ ທີ່​ນໍ​າ​ໃຊ້​ໃນ​ການ​ເກັບ​ກູ້​ລະ​ເບີດ UXO ​ໂດຍ​ກົງ ດ້ວຍ​ເຫດ​ນີ້ ຈຶ່ງ​ເຮັດ​ໃຫ້​ທາງ​ການ ລາວ​ຕ້ອງ​ການ​ທີ່​ຈະ​ໄດ້​ຮັບ​ການ​ຊ່ວຍ​ເຫຼືອ​ບໍ່​ໜ້ອຍ​ກວ່າ 50 ລ້ານ​ໂດ​ລ່າ​ໃນ​ແຕ່ລະ​ປີ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG