ລິ້ງ ສຳຫລັບເຂົ້າຫາ

ຜູ້ປົກຄອງ ລັດ Virginia ກໍາລັງ ຖືກສອບສວນ ໃນຂໍ້ຫາ ຮັບຂອງຂວັນ (ວີດີໂອ)


ມີ​ລາຍ​ງານ​ຢ່າງ​ກວ້າງ​ຂວາງ ວ່າ ທ່ານ Robert McDonnell
ຜູ້​ປົກຄອງ​ລັດ​ເວີ​ຈີ​ເນຍສັງກັດ​ພັກ​ຣີພັບ​ບລິ​ກັນ ທີ່​ກໍາລັງ​ຈະ​ພົ້ນ​
ຈາກ​ຕໍາ​ແໜ່​ງ ຈະ​ຕົກຢູ່​ພາຍ​ໃຕ້ ​ການ​ສືບສວນ​ສອບ​ສວນ​ຂອງ​
ລັດຖະບານ​ກາງ ຍ້ອນ​ຖືກ​ກ່າວ​ຫາ​ວ່າ ຮັບ​ເອົາ​ຂອງຂວັນ ​ແລະ​
ເງິ​ນລາງວັນ​ອື່ນໆຊຶ່ງ​ຜູ້​ປົກຄອງ​ລັດ ​ໄດ້​ພະຍາຍາມກ່າວ​ປ້ອງ​ກັນ​
ວ່າ ການ​ກະທຳຂອງ​ທ່ານ​ນັ້ນ ບໍ່​ໄດ້​ລະ​ເມີດ​ກົດ​ຈັນ​ຍາ​ບັນ ຂອງ​
ລັດ​ຂອງ​ທ່ານ. ​ໃນ​ຂະນະ​ ທີ່​ເກີດ​ມີ​ຂ່າວ​ນອງ​ນັນ ທີ່ພົວພັນ​ກັບ​
ຜູ້​ປົກຄອງລັດ​ຫລາຍໆ​ທ່ານໃນສະຫະລັດ ຕະຫຼອດ​ໄລຍະຫຼາຍ​
ປີຜ່ານມານີ້ ແຕ່​ກໍ​ມີ​ຕໍ່າ​ກວ່າ​ສິບ​ຄົນທີ່​ຖືກ​ປົດ​ອອກ​ຈາກ​ຕໍາ​ແໜ່​ງ.
ຜູ້​ສື່​ຂ່າວ​ວີ​ໂອ​ເອ Jeffrey Young ມີ​ລາຍ​ງານ​ເລື່ອງນີ້​ເພີ່ມ​ຕື່ມ
ຊຶ່ງ​ວັນນະ​ສອນ ຈະ​ນໍາ​ມາສະ​ເໜີ​ທ່ານ ​ໃນ​ອັນ​ດັບ​ຕໍ່​ໄປ.



ຢູ່​ເນີນ​ພູທີ່​ໂດດ​ເດັ່ນ ​ໃນ​ເມືອງ Richmond ​ເມືອງ​ຫຼວງ​ຂອງ​ລັດ​ Virginia ຄື​ທີ່​ຕັ້ງ​ຂອງ​ອາຄານ​ວ່າການ​ລັດ ຫຼື State Capitol ຂອງ​ລັດ​ເວີ​ຈີ​ເນຍ ທີ່​ສ້າງ​ຂຶ້ນ​ໃນ​ປີ 1788 ຊຶ່ງ​ມີ​ອາຍຸ​ດົນ​ ເກືອບ​ເທົ່າໆ​ກັນ ກັບ​ອາຍຸ​ຂອງ​ປະ​ເທດສະຫະລັດ​ເອງ​ນັ້ນ.

ບັດ​ນີ້ ຕຶກອາຄານລັດດັ່ງກ່າວ​ ກໍາລັງຕົກ​ເປັນ​ຂ່າວນອງ​ນັນ ​ທີ່​ກ່ຽວກັບ​ຜູ້​ປົກຄອງ​ລັດ​ເວີ​ຈີ​ເນຍຄົນ​ທີ 71 ຄື ທ່ານ Robert McDonnell ຊຶ່ງ​ມີ​ລາຍ​ງານ​ກັນ​ຢ່າງ​ກວ້າງຂວາງ​ວ່າ ທ່ານ​ໄດ້​ຮັບ​ເອົາ​ເງິນ​ກູ້​ຢືມ ຂອງ​ຂວັນ ​ແລະໄດ້​ຮັບ​ການ​ປະຕິບັດ​ແບບພິ​ເສດ​ສໍາ​ຫຼັບ​ທ່ານ​ເອງ ພັນ​ລະ​ຍາ​ຂອງ​ທ່ານ ຄື ທ່ານ​ນາງ Maureen ພ້ອມ​ດ້ວຍ​ສະມາຊິກ​ອື່ນໆ​ໃນ​ຄອບຄົວ​ຂອງ​ທ່ານ ນັ້ນ​ນໍາ.

ນັກ​ຂ່າວສືບສວນ Peter Galuszka ທີ່​ມີ​ສໍານັກງານ​ຢູ່ເມືອງ Richmond ຂຽນ​ບັນຊີ ສິ່ງ​ຂອງຕ່າງໆ ທີ່​ຖືກ​ກ່າວ​ຫາ​ວ່າ​ ໄດ້​ມອບ​ໃຫ້​ແກ່ ຜູ້​ປົກຄອງ​ລັດ ​ແລະ​ຄອບຄົວ​ຂອງ​ທ່ານ ​ໂດຍ​ຜູ້​ໃຫ້​ຫຼັກໆ​ນັ້ນ ​ແມ່ນ​ຈາກ​ນັກທຸລະ​ກິດ ຢູ່​ເຂດ Richmon ທີ່​ຊື່ວ່າ Jonnie Williams ຜູ້​ເປັນ​ຫົວໜ້າບໍລິສັດ​ນຶ່ງ​ທີ່​ເອີ້ນ​ວ່າ Star Scientific.

ນັກ​ຂ່າວ​ສືບສວນ Galuszka ​ເວົ້າ​ວ່າ: “ຜູ້​ປົກຄອງ​ລັດ McDonnell ​ໄດ້​ຮັບ​ເອົາ​ເງິນ​ກູ້​ຢືມ​ຈໍານວນ​ນຶ່ງ ​ສໍາ​ຫຼັບ​ບໍລິສັດ​ອະສັງຫາລິມມະ​ຊັບ ທີ່​ທ່ານ​ມີ​ກັບ​ຄອບ ຄົວ​ຂອງ​ທ່ານ. ລູກ​ສາວ​ຂອງ​ທ່ານ​ໄດ້​ຮັບ​ເງິນ​ລ້ຽງອາຫານ​ຄໍ່າ​ງານ ແຕ່ງງານ​ໃນ​ມູນ​ຄ່າ 15 ພັນ​ໂດ​ລ່າ. ທ່ານ​ໄດ້ຮັບ​ໂມງ​ ຍີ່​ຫໍ້ Rolex ມູນ​ຄ່າ ຫົກພັນ​ຫ້າ​ຮ້ອຍ​ໂດ​ລ່າ. ສ່ວນ​ພັນ​ລະ​ຍາ​ຂອງທ່ານ ຄືທ່ານ​ນາງ Maureen McDon nell ໄດ້​ຮັບ​ການ​ປະຕິ​ບັດ​ຕໍ່ ດ້ວຍ​ການພາ​ໄປທ່ຽວ​ຊື້​ ຫຼືຊອບ​ປິ້ງເຄຶ່ອງ ຂອງ ລາຄາ​ແພງໆ ຕາມ​ຮ້ານ​ຄ້າ​ຫຼູຫຼາ ໃນນະຄອນ​ນີວຢ໊ອກ.”

ນັກ​ສັງ​ເກດ​ການ​ທາງ​ກົດໝາຍ​ເວົ້າ​ວ່າ ກົດໝາຍ​ລັດ​ເວ​ຈີ​ເນຍ ທີ່​ຄວບ​ຄຸມການລາຍ​ງານ ແລະ​ຄວາມ​ຮັບຜິດຊອບກ່ຽວ​ກັບ​ກິດ​ຈະ​ກໍາ​ຕ່າງໆ​ຂອງ​ສ່ວນ​ບຸກຄົນນັ້ນ​ ບໍ່​ເຂັ້ມ​ແຂງ​ພໍ ​ແລະ​ຕາມ​ທີ່​ທ່ານ McDonnell ເອງຊີ້​ໃຫ້​ເຫັນ​ນັ້ນວ່າ ກົດໝາຍ​ເຫຼົ່າ​ນີ້​ແມ່ນ​ພຽງ​ແຕ່​ຄວບ​ຄຸມທ່ານເທົ່າ​ນັ້ນ ບໍ່ໄດ້​ຄວບ​ຄຸມ ສະມາຊິກ​ອື່ນໆ​ໃນ​ຄອບຄົວ​.

ຜູ້​ປົກຄອງ​ລັດ McDonnell ​ເວົ້າ​ວ່າ: “ຂອງຂວັນ​ຕ່າງໆ ​ທີ່​ມອບ​ໃຫ້​ຂ້າພະ​ເຈົ້າ ນັ້ນ ຂ້າ​ພະ​ເຈົ້າຈະລາ​ຍງານໄວ້ ຢູ່​ໃນ​ຖະ​ແຫຼ​ງການ​ແຫ່ງ​ຜົນ​ປະ​ໂຫຍ​ດ ດ້ານ​ເສດຖະກິດຂອງ​ລັດ ​ແລະ​ຢ່າງຈົດ​ຈໍ່ຕະຫຼອດ​ມາ ທີ່​ກະທໍາ​ກັນໃນ​ທຸກໆ​ປີນັ້ນ ​ແຕ່​ຂອງຂວັນ​ທີ່​ມອບ​ໃຫ້​ແກ່​ສະມາຊິກ​ອື່ນ​ໆ​ໃນ​ຄອບຄົວ ​ພາຍ​ໃຕ້​ກົດໝາຍ​ຊຸດ​ປັດຈຸບັນ​ນີ້ ບໍ່​ຕ້ອງ​ໄດ້​ລາຍ​ງານ.”

ທ່ານ McDonnell ​ເວົ້າ​ວ່າ ທ່ານ​ໄດ້​ຊໍາລະ​ຄືນ​ເກືອບ 125 ພັນ​ໂດ​ລ່າ​ສໍາ ລັບ​ເງິນ​ກູ້​ຢືມ​ຈາກ ທ້າວ William ແລະ​ວ່າລູກ​ສາວ​ຂອງ​ທ່ານ ກໍ​ໄດ້​ຊໍາລະ ຄືນ​ດ້ວຍ​ເຊັກ​ເງິນ ສໍາ​ຫຼັບ​ຄ່າ​ໃຊ້​ຈ່າຍ​ໃນ​ງານ​ແຕ່ງງານ​ນັ້ນ. ສະມາຊິກ​ຄອບ ຄົວ​ຂອງ McDonnell ອີກ​ຄົນ​ນຶ່ງ ກໍ​ໄດ້ເອົາ​ເງິນ​ຄືນ​ແກ່​ທ້າວ William ທີ່​ໄດ້​ມອບ​ໃຫ້​ນາງ​ນັ້ນຄື​ກັນ. ນອກ​ນີ້​ແລ້ວຜູ້​ປົກຄອງ​ ລັດກໍ​ເວົ້າ​ອີກວ່າ​ ​ໂມງ Rolex ນັ້ນ ກໍ​ໄດ້​ສົ່ງ​ຄືນ​ໃຫ້ ທ້າວ William ​ໄປ​ແລ້ວ.

​ແຕ່​ແນວ​ໃດ​ກໍ​ຕາມ ມີ​ລາຍ​ງານ​ວ່າ​ການ​ສືບສວນ​ຂອງ​ລັດຖະບານ​ກາງກຳລັງ ຈະ​ເລີ້ມ ຂຶ້ນ ກ່ຽວ​ກັບ​ເລື່ອງຜູ້​ປົກຄອງ​ລັດ McDonnell​ ​ແລະ​ທ້າວ Jonnie Williams ​ໃນ​ຄວາມ​ເປັນ​ໄປ​ໄດ້​ທີ່​ບຸກຄົນ​ທັງ​ສອງ​ອາດຈະ​ລະ​ເມີດ​ກົ​ດໝາຍ ຮວມທັງການ​ປະຕິບັດ​ແບບ​ພິ​ເສດ​ຕໍ່​ກັນ. ​ແຕ່ຜູ້​ປົກຄອງ​ລັດ McDonnell​ ​ໄດ້​ປະຕິ​ເສດ​ຢ່າງ​ແຂງ​ຂັນ​ກ່ຽວ​ກັບ​ເລື່ອງນີ້.

ຜູ້​ປົກຄອງ​ລັດ McDonnell ​ເວົ້າ​ອີກ​ວ່າ: “ທັງທ້າວ William ​ເອງ ​ແລະ ບໍລິສັດ Star Scientific ຫຼື​ແມ່ນ​ແຕ່​ບໍລິ​ສັດ​ອື່ນໆ​ ກໍ່ບໍ່​ໄດ້​ຮັບ​ຜົນ​ປະ​ໂຫຍ​ດ ພິ​ເສດ​ຫຍັງ​ເລີຍ ຈາກ​ພາກລັດ.”

ທີ່ ມະຫາວິທະຍາ​ໄລ Richmond ທ່ານ Dan Palazolo ອາຈານ​ສອນ ລັດຖະ​ສາດ​ການເມືອງ​ເວົ້າ​ວ່າ ຂະນະ​ນີ້ ສິ່ງ​ທີ່​ບັນດາ​ກຸ່ມ​ສິ້ງ​ຊອມ​ຂອງ​ລັດ ທີ່ກໍາລັງ​ລໍຖ້າ​ນັ້ນ ກໍ​ຄືຜົນ​ການ​ສືບສວນ​ສອບ​ສວນ​ຂອງ​ລັດຖະບານ​ກາງ. ​ແລະ​ວ່າ​ອະນາຄົດ​ການ​ເມືອງ ຂອງ​ທ່ານ McDonnell ອາດຈະຂຶ້ນຢູ່​ກັບ​ສິ່ງ​ທີ່​ໄດ້​ເກີດ​ຂຶ້ນ​ໄປ​ແລ້ວນັ້ນ.

ອາ​ຈານ Palazolo ​ເວົ້າ​ວ່າ: “ບັນຫາ​ສໍາຄັນ​ທີ່​ສຸດ​ທີ່​ຈະ​ເຫັນ​ກັນໃນ​ບໍ່​ດົນ​ນີ້ ກໍ​ຄື​ລາຍງານຂອງ​ອົງການ​ສັນຕິບານກາງ ຫຼື FBI ວ່າ​ຈະ​ມີ​ການ​ຟ້ອງ​ຮ້ອງຄະດີ​ກັນ​ບໍ່ ຖ້າ​ຫາກ​ ບໍ່​ມີ​ການ​ຟ້ອງ​ຮ້ອງ​ແລ້ວ ຂ້າພະ​ເຈົ້າກໍ​ຄິດ​ວ່າ ທ່ານ Bob McDonnell ກໍ​ຈະ​ພົ້ນ​ຂໍ້​ກ່າວ​ຫາໄປ ​ແຕ່​ຖ້າ​ມີ​ການ​ຟ້ອງ​ຮ້ອງ​ກັນ​ ເກີດ​ຂຶ້ນ ​ແລ້ວ ​ເລຶ່ອງກໍ​ຈະ​ແກ່ຍາວ​ອອກ​ໄປ.”

ສໍາ​ຫຼັບ​ໃນ​ຕອນ​ນີ້ ໜ່ວຍ​ງານ​ຕ່າງໆ ປະ​ຈໍາຕຶກ​ວ່າການ​ ລັດ​ເວ​ຈີ​ເນຍ ກໍ​ກໍາລັງ​ຈັດ​ຕຽມ ສໍາ ລັບ​ພິທີ​ສາບານ​ຕົວ ​ໃນ​ເດືອນ​ມັງກອນ​ປີໜ້າ​ນີ້ ຂອງ​ຜູ້​ທີ່ມາຮັບ ຕຳແໜ່​ງ​ແທນທ່ານ McDonnell ກໍ​ຄືທ່ານ Terry McAuliffe ສັງກັດ​ພັກ​ເດ​ໂມ​ແຄຣັດ ຈະ​ເປັນຜູ້​ປົກຄອງ​ລັດ​ເວີ​ຈີ​ເນຍຄົນ​ໃໝ່. ທ່ານ McAuliffe ​ໄດ້​ຊີ້​ແຈງ​ຢ່າງ​ເປັນ​ທີ່​ແຈ້ງ​ຂາວ​ແລ້ວ​ວ່າ ທ່ານ​ຈະ​ຫາ​ທາງໃຫ້​ມີ​ການ​ຄວບ​ຄຸມ​ທີ່​ເຄັ່ງ​ຄັດ​ຂຶ້ນກວ່າເກົ່າ ກ່ຽວ​ກັບ​ຂອງ​ຂວັນ​ຕ່າງໆ ທີ່​ມອບ​ໃຫ້​ແກ່​ທັງຜູ້​ປົກ ຄອງລັດ ​ແລະສະມາຊິກ​ໃນ​ຄອບຄົວ.
XS
SM
MD
LG