ລິ້ງ ສຳຫລັບເຂົ້າຫາ

ລັດຖະ​ບານ ສ​ຫລ ປິດລົງ ເປັນ​ເທື່ອ​ທຳ​ອິດ ​ໃນ​ຮອບ 17 ປີ (ວີດີໂອ)


ລັດຖະບານສະຫະລັດ​ ​ເລີ່​ມປິດ​ການ​ໃຫ້​ບໍລິການ​ບາງ​ສ່ວນ​ລົງ ​
ເປັນ​ເທື່ອ​ທຳ​ອິດ ​ໃນ​ຮອບ 17 ປີ ​ໃນ​ຂະນະ​ທີ່ສະພາ​ທັງ​ສອງ​ຂອງ
​ສະຫະລັດ ​ບໍ່ສາມາດ​ຕົກລົງ​ກັນ​ໄດ້ ​ເພື່ອ​ຮັບ​ຜ່ານ ​ຮ່າງ​ກົດໝາຍ
ການ​ໃຊ້​ຈ່າຍສະບັບ​ດຽວ​ກັນ ທັນ​ກັບ​ວັນ​ທີ 1 ຕຸລາ.

3 ຄັ້ງ ​ໃນ​ມື້ວັນ​ຈັນ​ວານ​ນີ້ ສະພາ​ຕໍ່າ​ສະຫະລັດ ພາຍ​ໃຕ້​ການ​
ນຳພາ​ຂອງ​ພັກຣິພັບບລິກັນ ​ໄດ້​ຮັບ​ຜ່ານ​ຮ່າງ​ກົດໝາຍ​ການ​
ໃຊ້​ຈ່າຍ ທີ່​ຈະ​ເລື່ອນ​ເວລາ​ການຈັດຕັ້ງປະຕິບັດ​ກົດໝາຍ​ຮັກສາ​
ສຸຂະ ພາບ​ຂອງ​ປະທານາທິບໍດີ​ໂອ​ບາ​ມາ ທີ່​ຮູ້​ກັນ​ໃນ​ນາມ
Obamacare” ນັ້ນ. ​ໃນທັງ 3 ຄັ້ງ​ ​ສະພາສູງສະຫະລັດ​ທີ່
ຄວບ​ຄຸມໂດຍ​ພັກ​ເດ​ໂມ​ແຄຣັດ ​ໄດ້​ປະ​ຕິ​ເສດ​ ​ໃນບໍ່​ເທົ່າ​ໃດ
ນາທີຕໍ່​ມາ.

ບໍ່​ດົນກ່ອນ​ທ່ຽງ​ຄືນ ຜູ້​ອໍານວຍ​ດ້ານ​ງົບປະມານຂອງທາງ​ທໍານຽບຂາ​ວ ທ່ານ​ນາງ Sylvia
Burwell​ ໄດ້​ອອກດຳລັດ​ໄປ​ຍັງ​ພະ​ແນ​ກການ​ຕ່າງໆ​ຂອງ​ລັດຖະບານ​ກາງ ​ໃຫ້​ປະຕິບັດ​
ແຜນການ​ໃນ​ການ​ປິດ​ການ​ໃຫ້​ບໍລິການ​ຂອງ​ລັດຖະບານ​ລົງ​ຢ່າງ​ເປັນ​ລະບຽບ. ການ​ເຄື່ອນ​
ໄຫວ​ທີ່​ວ່າ ນີ້ ​ແມ່ນ​ໝາຍ​ເຖິງ​ການ​ສັ່ງ​ພັກ​ການ ພະນັກ​ງານ​ຂອງ​ລັດຖະບານ​ກາງ​ປະມານ
800,000 ຄົນ.

ພະ​ແນ​ກການ​ຕ່າງໆ​ທີ່​ໄດ້​ກະທົບ​ນັ້ນ​ ແມ່ນ​ຮວມທັງ​ ພະ​ແນ​ກ​ສວນສາທາລະນະ​ແຫ່ງ​ຊາດ
ພະ​ແນກການ​ກວດກາ​ຮັກສາ​ຄວາມ​ປອດ​ໄພ​ໃນ​ທ້ອງ​ຖະໜົນ ​ແລະ​ກະຊວງ​ປ້ອງ​ກັນ​
ປະ​ເທດ ຊຶ່ງສ່ວນ​ໃຫຍ່ ​ໄດ້​ສັ່ງ​ໃຫ້​ບັນດາ​ພະນັກງານ​ພົນລະ​ເຮືອນຂອງ​ຕົນ​ພັກ​ການ.
ສ່ວນ​ບັນດາເຈົ້າ​ໜ້າ​ທີ່​ຮັກສາຄວາມ​ປອດ​ໄພ​ພາຍ​ໃນ ​ແລະ​ພວກ​ເຈົ້າ​ໜ້າ​ທີ່ຊາຍ​ແດນນັ້ນ
​ຍັງຈະ​ເປີດ​ໃຫ້​ບໍລິການ​ຕໍ່​ໄປ ​ຕະຫລອດ​ທັງ​ພະ​ແນ​ກການປະຕິບັດ​ກົດໝາຍ​ຕ່າງໆ​ນຳ​ດ້ວຍ.

​ໃນ​ຖະ​ແຫຼງການສະ​ບັບນຶ່ງ ​ໃນເຊົ້າວັນອັງຄານ​ມື້​ນີ້​ ປະທານາທິບໍດີ ​ໂອ​ບາ​ມາ ​ໄດ້​ກ່າວ​ວ່າ
ສະມາຊິກຂອງ​ກອງທັບ​ສະຫະລັດ ຈະ​ສືບ​ຕໍ່​ປະຕິບັດ​ໜ້າ​ທີ່​ເໝືອນ​ເດີມ ​ແລະການ​ປະຕິບັດ
ງານ​ທາງ​ທະຫານ ​ເຊັ່ນການ​ປະຕິບັດ​ງານ​ຢູ່​ໃນ​ອັຟກາ​ນິສຖານນັ້ນ ​ຍັງ​ຈະ​ສືບ​ຕໍ່​ປະຕິບັດ
​ໜ້າ​ຕໍ່​ໄປ. ທ່ານ​ກ່າວ​ວ່າ ທ່ານ​ມີ​ແຜນທີ່​ຈະ​ລົງ​ນາມ​ໃນ​ຮ່າງ​ກົດໝາຍເພື່ອຄໍ້າປະກັນ​ໃຫ້
ພວກ​ທະຫານທັງ ຫຼາຍ​ໄດ້​ຮັບ​ເງິນ​ເດືອນທັນຕາມ​ເວລາ. ທ່ານ​ໂອ​ບາ​ມາ ຍັງ​ໄດ້​ໃຫ້​ຄຳ​ໝັ້ນ
ສັນຍາ​ວ່າ ຈະ​ປະສານ​ງານ​ກັບ​ທາງ​ລັດຖະສະພາ ​ເພື່ອ​ໃຫ້​ລັດຖະບານ​ໄຂຄືນ​ແລະດໍາ​ເນີນ
ວຽກ​ງານ​ຄື​ເກົ່າ.

ການ​ຢຸດໃຫ້​ບໍລິການຂອງ​ລັດຖະບານ​ຄັ້ງ​ນີ້​ ແມ່ນ​ຈະບໍ່​ມີ​ຜົນກະທົບ​ໃດໆ ຕໍ່ຈຸດ​ເພັ່ງ​ເລັງ​
ທີ່​ສຳຄັນ ​ໃນ​ການ​ຜິດຂ້ອງຕ້ອງຖຽງຂອງ​ລັດຖະສະພາ ນັ້ນກໍ​ຄື​ກົດໝາຍ​ສຸກຂະພາບ​.
ອົງ​ປະກອບ​ຕ່າງໆ ຂອງ​ກົດໝາຍ​ດັ່ງກ່າວ ກຳນົດ​ຈະ​ເລີ້ມມີ​ຜົນ​ບັງຄັບ​ໃຊ້ໃນ​ວັນ​ອັງຄານ
​ມື້​ນີ້ ​ຕາມ​ໝາຍ​ກໍານົດ​ໄວ້.
XS
SM
MD
LG