ເຈົ້າໜ້າທີ່ຮັກສາຄວາມປອດໄພ ໃນພາກຕາເວັນຕົກສຽງເໜືອຂອງປາກິສຖານ ກ່າວວ່າ
ການໂຈມຕີໂດຍເຮືອບິນທີ່ບໍ່ມີຄົນຂັບຂອງສະຫະລັດ ໄດ້ສັງຫານຢ່າງໜ້ອຍ 3 ຄົນ ທີ່
ສົງໄສເປັນພວກຫົວຮຸນແຮງ.
ເຈົ້າໜ້າທີ່ກ່າວວ່າ ການໂຈມຕີດ້ວຍລູກສອນໄຟໃນວັນເສົາມື້ນີ້ ເກີດຂື້ນຢູ່ໃນເມືອງ
Miran Shah ຊຶ່ງເປັນເມືອງສຳຄັນໃນເຂດຊົນເຜົ່າ Waziristan ເໜືອ ຊຶ່ງເປັນທີ່ຊາບ
ກັນດີວ່າ ເປັນບ່ອນຫລົບລີ້ຂອງກຸ່ມ Taliban ແລະກຸ່ມຫົວຮຸນແຮງ ທີ່ເປັນເຄືອຂ່າຍ
ຂອງກຸ່ມກໍ່ການຮ້າຍ al-Qaida.
ການໂຈມຕີໂດຍເຮືອບິນບໍ່ມີຄົນຂັບ ໄດ້ກາຍເປັນບັນຫາທີ່ມີການໂຕ້ຖຽງກັນຫຼາຍຂຶ້ນ
ລະຫວ່າງວໍຊິງຕັນ ແລະອິສລາມາບັດ. ຄວາມສໍາພັນລະໄມຕີລະຫວ່າງປະເທດພັນ
ທະມິດທັງສອງໄດ້ຫລຸດລົງມາກາຍເປັນວິກິດການ ຫລັງຈາກການໂຈມຕີທາງອາກາດ
ຂອງສະຫະລັດ ໄດ້ເຮັດໃຫ້ທະຫານປາກິສຖານເສຍຊີວິດໄປ 24 ຄົນ ໃນເດືອນພະຈິກ
ຊຶ່ງເປັນເຫດໃຫ້ປາກິສຖານ ປິດຊາຍແດນບໍ່ໃຫ້ອົງການເນໂຕ້ສົ່ງອຸບປະກອນເຂົ້າໄປ
ໃນອັຟການິສຖານ.
ປາກິສຖານ ໄດ້ຮຽກຮ້ອງໃຫ້ສະຫະລັດຂໍຂະມາໂທດຕໍ່ການໂຈມຕີທາງອາກາດ ໃນ
ເດືອນພະຈິກປີກາຍນີ້. ແຕ່ວໍຊິງຕັນໄດ້ປະຕິເສດ.
ປາກິສຖານກ່າວວ່າ ການໂຈມຕີດ້ວຍລູກສອນໄຟ ບໍ່ໄດ້ໃຫ້ຜົນຫຍັງ ພ້ອມທັງເປັນ
ການລ່ວງລະເມີດຕໍ່ອະທິປະໄຕ ສັງຫານພົນລະເຮືອນ ແລະພາໃຫ້ເກີດມີຄວາມຮູ້ສຶກ
ຕໍ່ຕ້ານສະຫະລັດຫຼາຍຂຶ້ນ.