ລິ້ງ ສຳຫລັບເຂົ້າຫາ

ການໂຕ້ວາທີ ເທື່ອທີ 2 ລະຫວ່າງ ປ. ໂອບາມາ ແລະທ່ານ Romney (ສະໄລດ໌ກັບວີດີໂອ)

  • Jim Malone

ປະທານາທິບໍດີໂອບາມາ (ຂວາ) ແລະອະດີດຜູ້ປົກຄອງລັດ Massachusetts ທ່ານ Romney ພວມໂຕ້ວາທີກັນ ທີ່ມະຫາວິທະຍາໄລ Hofstra ໃນນະຄອນນິວຢອກ (16 ຕຸລາ 2012)

ປະທານາທິບໍດີໂອບາມາ (ຂວາ) ແລະອະດີດຜູ້ປົກຄອງລັດ Massachusetts ທ່ານ Romney ພວມໂຕ້ວາທີກັນ ທີ່ມະຫາວິທະຍາໄລ Hofstra ໃນນະຄອນນິວຢອກ (16 ຕຸລາ 2012)

ປະທານາທິບໍດີສະຫະລັດ ທ່ານບາຣັກ ໂອບາມາ ແລະ ຄູ່ແຂ່ງ
ຂອງທ່ານຈາກພັກຣີພັບບລີກັນ ອະດີດຜູ້ປົກຄອງລັດ Massa-
chusetts ທ່ານ Mitt Romney ໄດ້ປະທະຄາລົມກັນກ່ຽວກັບ
ບັນຫາຕ່າງໆໃນຂອບເຂດທີ່ກວ້າງຂວາງເມື່ອແລງວັນອັງຄານ
ວານນີ້ ໃນການໂຕ້ວາທີ ຜູ້ສະມັກປະທານາທິບໍດີຄັ້ງທີ 2 ຂອງ
ຈຳນວນທັງໝົດ 3 ຄັ້ງ.

ມັນແມ່ນປະທານາທິບໍດີ ບາຣັກ ໂອບາມາ ທີ່ມີການຕັດສິນໃຈ
ແບບເດັດຂາດກວ່າເກົ່າທີ່ໄດ້ມາປະກົດໂຕໃນການໂຕ້ວາທີຄັ້ງ
ທີ 2 ທີ່ຈັດຂຶ້ນ ຢູ່ມະຫາວິທະຍາໄລ Hofstra ໃນນະຄອນນິວ
ຢອກ.

ຫຼັງຈາກໄດ້ຮັບຄະແນນບໍ່ຄ່ອຍດີປານໃດໃນການໂຕ້ວາທີເທື່ອທຳອິດ ຈຶ່ງເບິ່ງຄືວ່າ ທ່ານ ໂອບາມາໄດ້ຕັດສິນໃຈທີ່ຈະນຳໃຊ້ວິທີ ທີ່ຫ້າວຫານກວ່າເກົ່າຕໍ່ທ່ານ Romney ທີ່ໄດ້ຮັບ
ຄະແນນເພີ້ມຂຶ້ນ ໃນການຢັ່ງຫາງສຽງນັ້ນ.

ກ່ຽວກັບເລື່ອງຈີນແລະການໂຕ້ແຍ້ງຂອງປະທານາທິບໍດີທີ່ວ່າທ່ານ Romney ໄດ້ລົງທຶນ ຢູ່ໃນບັນດາບໍລິສັດທີ່ສົ່ງວຽກໄປຕ່າງປະເທດນັ້ນ ຜູ້ສະມັກທັງສອງກໍໄດ້ປະທະຄາລົມກັນ.

ທ່ານ Romney ຖາມຊໍ້າແລ້ວຊໍ້າອີກວ່າ “ທ່ານປະທານາທິບໍດີ ທ່ານໄດ້ເບິ່ງເລື່ອງ ເບ້ຍບຳນານຂອງທ່ານແລ້ວບໍ? ທ່ານໄດ້ເບິ່ງແລ້ວບໍ? ທ່ານປະທານາທິບໍດີທ່ານ
ໄດ້ເບິ່ງກ່ຽວກັບເລື່ອງເບ້ຍບຳນານຂອງທ່ານແລ້ວບໍ?”


ປະທານາທິບໍດີໂອບາມາຕອບວ່າ “ທ່ານກໍຮູ້ດີ ຂ້າພະເຈົ້າຂໍເວົ້າວ່າ ຂ້າພະເຈົ້າບໍ່ໄດ້ ເບິ່ງກ່ຽວກັບເລື່ອງເບ້ຍບຳນານຂອງຂ້າພະເຈົ້າເລີຍ. ມັນບໍ່ໄດ້ມີມູນຄ່າຫຼວງຫຼາຍ ຄືກັນກັບຂອງທ່ານ ຈຶ່ງບໍ່ຕ້ອງໄດ້ໃຊ້ເວລາດົນ.”



ໃນການໂຕ້ວາທີຄັ້ງນີ້ທັງສອງທ່ານໄດ້ຕອບຄຳຖາມທີ່ມາຈາກພວກມີສິດປ່ອນບັດຈໍານວນ ນຶ່ງ ທີ່ຍັງບໍ່ທັນໄດ້ຕັດສິນໃຈເທື່ອກ່ຽວກັບເລື່ອງພະລັງງານ ເລື່ອງຄົນເຂົ້າເມືອງ ແລະການ ຄວບຄຸມອາວຸດປືນ ແຕ່ສ່ວນໃຫຍ່ແມ່ນໄດ້ເພັ່ງເລັງໃສ່ເລື່ອງເສດຖະກິດ.

ທ່ານ Romney ໄດ້ກ່າວເນັ້ນ ເຖິງແຜນການຂອງທ່ານ ທີ່ຈະຕັດ ອັດຕາການເກັບພາສີ ແລະສ້າງວຽກເຮັດງານທຳ.

ທ່ານ Romney ເວົ້າວ່າ “ສຳລັບຂ້າພະເຈົ້າແລ້ວ ເມື່ອຂ້າພະເຈົ້າໄດ້ພິຈາລະນາ ເບິ່ງສິ່ງທີ່ໄດ້ເກີດຂຶ້ນໃນໄລຍະ 4 ປີຜ່ານມາແລ້ວກໍຕ້ອງຂໍເວົ້າວ່າມັນເປັນຄວາມ ຜິດຫວັງ. ພວກເຮົາສາມາດເຮັດໄດ້ດີກວ່ານີ້.”

ແຕ່ປະທານາທິບໍດີໂອບາມານັ້ນ ເບິ່ງຄືວ່າ ມີຄວາມກະຕືລືລົ້ນທີ່ຈະທ້າທາຍຄູ່ແຂ່ງຈາກ ພັກຣີພັບບລີກັນຂອງທ່ານ.

ທ່ານໂອບາມາເວົ້າວ່າ “ຖ້າມີຜູ້ໃດຜູ້ນຶ່ງ ມາຫາທ່ານ ພ້ອມກັບແຜນການ ທີ່ເວົ້າວ່າ ຂ້າພະເຈົ້າຢາກໃຫ້ທ່ານໃຊ້ຈ່າຍເງິນ 7 ຫຼື 8 ພັນຕື້ໂດລາ ແລະພວກເຮົາຈະຫາ ເງິນມາໃຫ້ດອກ ແຕ່ພວກເຮົາບໍ່ສາມາດບອກພວກທ່ານໄດ້ ຈົນກວ່າບາງທີອາດ ຫຼັງຈາກການເລືອກຕັ້ງ ວ່າພວກເຮົາຈະເຮັດແບບໃດ ທ່ານກໍອາດຈະບໍ່ຮັບເອົາ ການຕົກລົງທີ່ຍັງບໍ່ຄົບບໍ່ຖ້ວນດັ່ງກ່າວ ແລະທ່ານກໍບໍ່ຄວນຈະເຮັດແບບນັ້ນ.”

ຈຸດເດືອດອີກຈຸດນຶ່ງໃນການໂຕ້ວາທີເທື່ອນີ້ ກໍແມ່ນການໂຈມຕີສະຖານກົງສຸນສະຫະລັດ ທີ່ເມືອງ Benghazi ປະເທດລີເບຍ ໃນເດືອນແລ້ວ ທີ່ໄດ້ສັງຫານເອກອັກຄະລັດຖະທູດ ສະຫະລັດທ່ານ Chris Stevens ແລະເຈົ້າໜ້າທີ່ອາເມຣິກັນອື່ນໆອີກ 3 ຄົນ.

ທ່ານ Romney ກ່າວວ່າ ລັດຖະບານທ່ານໂອບາມາ ຊ້າຫຼາຍໃນການອອກມາຮັບຮູ້ວ່າ ມັນເປັນການໂຈມຕີຂອງພວກກໍ່ການຮ້າຍ.

ທ່ານ Romney ເວົ້າວ່າ “ແຕ່ເລື່ອງທີ່ຂ້າພະເຈົ້າເຫັນວ່າມັນໜ້າເປັນຫ່ວງຫຼາຍໄປ ກວ່ານັ້ນ ກໍຄືນຶ່ງມື້ຫຼັງຈາກໄດ້ມີການສັງຫານເອກອັກຄະລັດຖະທູດສະຫະລັດ ຊຶ່ງ ເປັນເທື່ອທຳອິດທີ່ໄດ້ເກີດຂຶ້ນ ນັບແຕ່ປີ 1979 ເປັນຕົ້ນມາ ແລະມີຊາວອາເມຣິ ກັນທັງໝົດ 4 ຄົນ ເສຍຊີວິດຢູ່ທີ່ນັ້ນ ຊຶ່ງເປັນເວລາ ທີ່ເຫັນໄດ້ຊັດແຈ້ງວ່າ ພວກ ເຮົາບໍ່ຮູ້ຈັກເລີຍວ່າແມ່ນຫຍັງໄດ້ເກີດຂຶ້ນແທ້ໆນັ້ນ ທ່ານປະທານາທິບໍດີ ນຶ່ງມື້ຫຼັງ ຈາກເລື່ອງດັ່ງກ່າວ ໄດ້ເກີດຂຶ້ນແລ້ວ ກໍໄດ້ບິນໄປ ນະຄອນ Las Vegas ເພື່ອ ຊອກຫາເງິນທຶນມາໂຄສະນາຫາສຽງ.”

ຄວາມເຫັນດັ່ງກ່າວນັ້ນໄດ້ຮັບການຕອບໂຕ້ຢ່າງແຂງຂັນຈາກປະທານາທິບໍດີ.

ທ່ານໂອບາມາເວົ້າວ່າ “ແລະຕໍ່ຈາກນັ້ນມາບໍ່ເທົ່າໃດມື້ຂ້າພະເຈົ້າກໍໄດ້ໄປຮັບເອົາ ຫີບສົບທີ່ສົ່ງມາເຖິງຖານທັບອາກາດ Andrews ແລະກໍໄດ້ຮ່ວມສະແດງຄວາມ ເສົ້າໂສກເສຍໃຈກັບທາງຄອບຄົວ ແລະການສະເໜີແນະທີ່ວ່າ ຜູ້ໃດກໍຕາມທີ່ຢູ່ ໃນຄະນະຂອງຂ້າພະເຈົ້າບໍ່ວ່າຈະເປັນລັດຖະມົນຕີການຕ່າງປະເທດຫຼືເອກອັກ ຄະລັດຖະທູດ ປະຈຳອົງການສະຫະປະຊາຊາດ ຜູ້ໃດກໍຕາມໃນຄະນະຂອງຂ້າ ພະເຈົ້າທີ່ອາດຫຼິ້ນການເມືອງ ຫຼືຊັກນຳໄປໃນທາງທີ່ບໍ່ຖືກຕ້ອງ ເວລາພວກເຮົາ ສູນເສຍພະນັກງານຂອງພວກເຮົາໄປ 4 ຄົນນັ້ນທ່ານຜູ້ປົກຄອງລັດມັນເປັນການ ໂຈມຕີທີ່ໜ້າລັງກຽດ.”

ພວກນັກວິເຄາະກ່າວວ່າ ໃນເທື່ອນີ້ ປະທານາທິບໍດີໂອບາມາໄດ້ສະແດງທ່າທີທີ່ເຂັ້ມແຂງ ກວ່າໃນການໂຕ້ວາທີເທື່ອທຳອິດຊຶ່ງຄວນຈະເຮັດໃຫ້ພັກເດໂມແຄຣັທມີກໍາລັງໃຈຂຶ້ນ ໃນ ອັນທີ່ຈະກາຍເປັນ ການເລືອກຕັ້ງທີ່ມີຄະແນນສຽງ ໃກ້ຄຽງກັນຫຼາຍທີ່ສຸດ ອີງຕາມການຢັ່ງ ຫາງສຽງເທື່ອຫຼ້າສຸດ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG