ສະຫະລັດ ແລະ ຄິວບາ ໄດ້ຟື້ນຟູຄືນສາຍສຳພັນ ທາງການທູດ
ຢ່າງຄົບຖ້ວນ ພຽງຫຼັງຈາກ 12 ໂມງຕອນເຊົ້າ ຫຼື 4 ໂມງແລງຕາມ
ເວລາສາກົນ ໃນວັນຈັນມື້ນີ້ ຫຼັງຈາກຫຼາຍກວ່າ 5 ທົດສະວັດ
ແຫ່ງການເປັນປໍລະປັກກັນ.
ໃນສອງສາມຊົ່ວໂມງຕໍ່ມາ ກ່ອນຟ້າສະຫວ່າງ ທີ່ງຽບສະຫງົບ
ທຸງສີແດງ ຂາວ ແລະ ຟ້າ ຂອງຄິວບາກໍໄດ້ຖືກຊັກຂຶ້ນປາຍເສົາ
ຢູ່ທີ່ກະຊວງການຕ່າງປະເທດສະຫະລັດ ຄຽງຂ້າງທຸງຊາດ ຂອງ
ປະເທດອື່ນໆ ທີ່ມີສາຍສຳພັນທາງການທູດ ກັບສະຫະລັດ.
ສະຫະລັດ ແລະ ຄິວບາ ຕ່າງກໍມີກົງສຸນ ຢ່າງຄົບຖ້ວນ ຢູ່ໃນ
ປະເທດຂອງກັນ ແລະ ກັນ.
ການເຄືອນໄຫວທາງການທູດ ຢ່າງເປັນປະວັດການນີ້ ໄດ້ຂາດສະບັ້ນໄປເປັນເວລາ 54 ປີ ໃນລະຫວ່າງ ລັດຖະບານ ຂອງປະທານາທິບໍດີ John Kennedy.
ບັນດາເຈົ້າໜ້າທີ່ຄິວບາ ລວມທັງ ລັດຖະມົນຕີຕ່າງປະເທດຄິວບາ ທ່ານ Bruno Rodriguez Parrilla ຈະເຂົ້າຮ່ວມພິທີສະເຫຼີມສະຫຼອງການເປີດ ສະຖານທູດຄິວບາ ຢູ່ທີ່
ວໍຊິຕັນ ໃນວັນຈັນມື້ນີ້.
ສ່ວນ ລັດຖະມົນຕີຊ່ວຍວ່າການ ກະຊວງການຕ່າງປະເທດ ຮັກສາການດ້ານພາກພື້ນຕາເວັນຕົກ ທ່ານ Roberta Jacobson ຜູ້ທີ່ມີບົດບາດທີ່ສຳຄັນ ໃນການເຈລະຈາ ລະຫວ່າງທັງສອງປະເທດ ກໍຈະເຂົ້າຮ່ວມໃນພິທີນີ້ເຊັ່ນກັນ.
ລັດຖະມົນຕີຕ່າງປະ ເທດສະຫະລັດ ທ່ານ John Kerry ຈະຮັບເອົາການດຳລົງຕຳແໜ່ງຂອງຄູ່ຕຳແໜ່ງ ຝ່າຍຄິວບາ ທ່ານ Rodriguez Parrilla ຢ່າງເປັນທາງການ ໃນວັນຈັນມື້ນີ້. ເຈົ້າໜ້າທີ່ທັງສອງທ່ານ ຈະຈັດກອງປະຊຸມຖະແຫລງຂ່າວຮ່ວມກັນ ຕາມຫຼັງ ໃນມື້ດຽວກັນນີ້.
ພິທີ ເປີດສະຖານທູດ ສະຫະລັດໃນຄິວບາ ຈະຖືກງົດໄວ້ຈົນກວ່າ ທ່ານ Kerry ຈະສາມາດເດີນທາງໄປນະຄອນຫຼວງ Havana ແຕ່ ສະຖານທູດ ກໍຍັງຈະປະຕິບັດການໄດ້ ຢ່າງຄົບຖ້ວນຢູ່ ໃນຂະນະນີ້.
ການຟື້ນຟູສາຍສຳພັນ ລະຫວ່າງສອງປະເທດ ແມ່ນບໍ່ປາດສະຈາກ ການຕຳນິຕິຕຽນຕ່າງໆ ໄດ້.