ລິ້ງ ສຳຫລັບເຂົ້າຫາ

ປ. ​ຝຣັ່ງ ກ່າວວ່າ ການໂຈມຕີ ຂອງເທີກີ ໃນຊີເຣຍ ຍິ່ງຈະເຮັດໃຫ້ ສະຖານະການ ຮ້າຍແຮງຂຶ້ນ


ປະທານາທິບໍດີ​ຝຣັ່ງ ທ່ານ Francois Hollande ​ໄດ້​ຕ້ອງ​ຕິ​ການ​ປະຕິບັດ​ງານ​ທາງ​ທະຫານ​ ຂອງ​ເທີ​ກີ​ໃນ​ພາກ​ເໜືອ​ຂອງ​ຊີ​ເຣຍ​ ​ໂດຍ​ກ່າວ​ວ່າ ການ​ແຊກ​ແຊ​ງຫຼາຍຢ່າງ​ ທີ່​ບໍ່​ລົງລອຍກັນ ຢູ່​ທີ່​ນັ້ນ ​ແມ່ນ​ສ່ຽງ​ຕໍ່​ການ​ເກີດ​ບັນຫາ​ຂັດ​ແຍ້​ງລຸກ​ໄໝ້​ເປັນ​ແປວ​ໄຟ.

ນອກ​ນັ້ນ ທ່ານ Hollande ຍັງ​ໄດ້​ກ່າວ​ຢ້ຳ​ໃນ​ວັນ​ອັງຄານ​ມື້ນີ້ເຖິງ​ຄວາມ​ຈຳ​ເປັນ​ທີ່​ຈະ​ຕ້ອງມີ​ການ​ຢຸດ​ຍິງ​ຢູ່​ໃນ​ຊີ​ເ​ຣຍ ​ແລະ​ກັບ​ຄືນ​ໄປສູ່ໂຕະ​ເຈລະຈາ.

ການ​ໃຫ້​ຄວາມ​ເຫັນ​ຂອງ​ທ່ານ ມີ​ຂຶ້ນນຶ່ງ​ມື້ຫລັງ​ຈາກລັດຖະມົນຕີ​ປ້ອງ​ກັນ​ປະ​ເທດ ສະຫະລັດ ທ່ານ Ash Carter ຮຽກຮ້ອງ​ເທີ​ກີ “ໃຫ້ເພັງ​ເລັ່ງໃສ່​ການ​ປາບ​ປາມ​ກຸ່ມ​ລັດ​ອິສລາມ ​ແລະ​ບໍ່​ໃຫ້​ເຂົ້າ​ໄປ​ພົວພັນກັບ​ກອງ​ກຳລັງ​ຊາວ​ເຄີ​ດທີ່​ເປັນພັນທະມິດກັບ ສະຫະລັດ ທີ່​ກຳລັງ​ຕ້ານ​ຢັນ​ກັບ​ກຸ່ມ​ກໍ່​ການ​ຮ້າຍ​ໃນ​ຊີ​ເຣຍ.”

ກອງ​ກຳລັງ​ຂອງ​ເທີກີ ​ແລະ​ພວກ​ຕໍ່ຕ້ານ​ລັດຖະ​ໃນ​ຊີ​ເຣຍ ທີ່​ເປັນ​ພັນທະ​ມິດ​ຂອງ​ຕົນ ​ແມ່ນ​ເລີ້ມການ​ໂຈມ​ຕີມາ​ໄດ້​ອາທິດ​ນຶ່ງ​ແລ້ວ ທີ່​ແນ​ໃສ່​ເພື່ອ​ຂັບ​ໄລກຸ່ມ​ລັດ​ອິສລາມ​ແລະ​ກຳລັງ​ ຊາວ​ເຄີ​ດ YPG ຊຶ່ງເປັນສ່ວນ​ນຶ່ງ​ຂອງ​ກອງ​ກຳລັງ​ປະຊາທິປະ​ໄຕ​ໃນຊີ​ເຣຍທີ່​ໜຸນ​ຫຼັງ​ໂດຍ​ສະຫະ ລັດ​ນັ້ນ ອອກໄປຈາກ​ເມືອງຊາຍແດນ​ Jarablus ​ແລະ​ໃນ​ຂົງ​ເຂດ​ອ້ອມ​ແອ້ມ​.

“ສະຫະລັດ ​ແມ່ນ​ໃຫ້ການ​ສະໜັບສະໜຸນ​ຢ່າງ​ແຂງ​ຂັນ ແລະ​ໃຫ້ການ​ສະໜັບສະ​ໜຸນເທີ​ກີ ໂດຍລວມ​ໃນ​ການ​ປະ​ຕິດ​ບັດ​ງານ​ຕ່າງ​ໆຕໍ່ຕ້ານ​ກຸ່ມ​ລັດ​ອິສລາມ ​ແລະ​ທຸກ​ສິ່ງ​ຢ່າງ​ທີ່​ພວກ​ເຂົາ​ໄດ້​ກະທຳ​ ເພື່ອ​ປົກ​ປ້ອງ​ຂົງ​ເຂດ​ລະຫວ່າງ​ຊາຍ​ແດນ​ ແລະເມືອງ Jarablus ​ແລະ​ໄປ ​ທາງ​ພາກ​ຕາ​ເວັນ​ຕົກ ​ແຕ່​ວ່າ​ບໍ່​ໄປ​ທາງໃຕ້​ຂອງເມືອງ Jarablus,” ນັ້ນຄື ​ຄຳ​ເວົ້າຂອງ​ທ່ານ Carter ​ທີ່ໄດ້​ກ່າວ​ຕໍ່​ພວກ​ນັກ​ຂ່າວ ​ຢູ່​ທຳນຽບຫ້າ​ແຈ ​ໃນ​ວັນ​ຈັນ​ວານ​ນີ້.

​ຫວ່າງ​ມໍ່ໆ​ມາ​ນີ້ ກອງ​ກຳລັງຂອງ​ຊາວ​ເຄີ​ດ ​ໄດ້​ຊ່ອຍຂັບ​ໄລ່​ພວກ​ນັກ​ຕໍ່ສູ້​ຂອງກຸ່ມ​ລັດ​ອິສລາມ ອອກ​ຈາກ​ເມືອງ Manbij ຂອງຊີເຣຍ ທີ່ຕັ້ງຢູ່ປະມານ 40 ກິໂລແມັດ ທາງພາກໃຕ້ ຂອງ ເມືອງ Jarablus ແລະປະມານ 30 ກິໂລແມັດ ໄປທາງພາກຕາເວັນຕົກ ຂອງແມ່ນ້ຳ Euphrates.

ກຸ່ມພວກຕໍ່ສູ້ ຊາວເຄີດ (YPG) ຢູ່ໃກ້ໆກັບລົດ ໃນເມືອງ Qamishli, ຊີເຣຍ, 22 ເມສາ 2016.

ກຸ່ມພວກຕໍ່ສູ້ ຊາວເຄີດ (YPG) ຢູ່ໃກ້ໆກັບລົດ ໃນເມືອງ Qamishli, ຊີເຣຍ, 22 ເມສາ 2016.

ສະຫະລັດກ່າວວ່າ ​ກອງ​ກຳລັງ​ຊາວ​ເຄີ​ດ YPG ໄດ້ຮັບ​ການຄ້ຳປະກັນວ່າ ພວກເຂົາເຈົ້າ ຈະກັບຄືນໄປຍັງພາກຕາເວັນອອກ ຂອງແມ່ນ້ຳດັ່ງກ່າວ ​ເວລາ​ໃດທີ່ເມືອງ Manbij ໄດ້ມີ​ການກວດລ້າງ ກອງ​ກຳລັງຂອງພວກກຸ່ມ​ລັດ​ອິສລາມແລ້ວ. ທ່ານ Carter ໄດ້ກ່າວ ໃນວັນ ຈັນວານນີ້ວ່າ ກອງ​ກຳລັງ​ເຫລົ່ານັ້ນ “ຈະຖອນອອກຈາກຂົງເຂດແລະ​ຖອນ​ໄປ​ທາງພາກ ຕາເວັນອອກ” ແລະສະຫະລັດ ແມ່ນພະຍາຍາມທີ່ຈະໃຫ້​ຄວາມ​ກະຈ່າງແຈ້ງ​ແກ່​ເທີກີ ​ແລະອົງ​ປະກອບ​ຕ່າງໆ​ຂອງ​ກອງທັບ​ປະ​ຊາ​ທິປະ​ໄຕ​ຊີ​ເຣຍ ມີ​ຫຍັງ​ແດ່ ​ເພື່ອປ້ອງ​ກັນ​ບໍ່​ໃຫ້​ມີການປະເຊີນໜ້າກັນ.

ອ່ານ​ຂ່າວ​ນີ້​ເພີ້​ມຕື່ມ​ເປັນ​ພາສາ​ອັງກິດ

XS
SM
MD
LG