ລິ້ງ ສຳຫລັບເຂົ້າຫາ

ສະຫະລັດແລະຈີນ ເຈລະຈາກັນ ເລື້ອງ ຄວາມໝັ້ນຄົງ ເສດຖະກິດ ແລະທະເລຈີນໃຕ້ (ວີດິໂອ)


ນັກການທູດສະຫະລັດແລະຈີນ ໄດ້ພົບປະກັນ ຢູ່ວໍຊິງຕັນດີຊີ ເພື່ອປຶກສາຫາລືກັນ ເລື້ອງເຂດທະເລຈີນໃຕ້ ແລະບັນຫາອື່ນໆ

ນັກການທູດສະຫະລັດແລະຈີນ ໄດ້ພົບປະກັນ ຢູ່ວໍຊິງຕັນດີຊີ ເພື່ອປຶກສາຫາລືກັນ ເລື້ອງເຂດທະເລຈີນໃຕ້ ແລະບັນຫາອື່ນໆ

ບັນດານັກການທູດສະຫະລັດແລະຈີນໄດ້ພົບປະກັນ ທີ່ນະຄອນ
ຫຼວງວໍຊິງຕັນ ​ໃນອາທິດ​ແລ້ວ​ນີ້ ເພື່ອການໂອ້ລົມສົນທະນາດ້ານ
ຄວາມໝັ້ນຄົງແລະ ເສດຖະກິດປະ​ຈໍາປີ ທີ່​ໄດ້​ລວມ​ເອົາເລຶ່ອງ ການຍາດແຍ່ງກັນອ້າງເອົາກໍາມະ ສິດ​ໃນເຂດນໍ້າແດນດິນໃນ
ເຂດທະເລຈີນໃຕ້ນັ້ນນໍາ. Scott Stearns ຜູ້ສື່ຂ່າວວີໂອເອ ປະ ຈໍາກະຊວງຕ່າງປະເທດ ມີລາຍງານກ່ຽວກັບເລຶ່ອງນີ້ ຊຶ່ງທອງ
ປານ ຈະນໍາມາສະເໜີທ່ານໃນອັນດັບຕໍ່ໄປ.


ຈີນກໍາລັງປັບປຸງກອງທັບເຮືອຂອງຕົນໃຫ້ກ້າວໜ້າທັນສະໄໝ
ແລະເພີ່ມ ການປະຕິບັດ ການລາດຕະເວນຫຼາຍຂຶ້ນ ຢູ່ໃນເຂດ
ນ່ານນໍ້າທີ່ເປັນຂໍ້ຂັດແຍ້ງ ກັນໃນເຂດທະເລຈີນໃຕ້ ກໍ​ຄືຂົງເຂດ
ທີ່ ຫວຽດນາມ ຟິລິບປິນ ມາເລເຊຍ ບຣູໄນ ແລະໄຕ້ຫວັນ ຕ່າງກໍຍາດ ກັນອ້າງເອົາເປັນ ກໍາມະສິດ ຮວມທັງປັກກິ່ງນໍາ.

ການແກ້ໄຂບັນຫາການປະເຊີນໜ້າກັນ​ໃນ​ເລື້ອງ​ນີ້ຢ່າງສັນຕິນັ້ນ ​ແມ່ນເປັນພາກສ່ວນນຶ່ງ
ຂອງຫົວຂໍ້ຂອງກອງປະຊຸມລະຫວ່າງ​ສະຫະລັດ​ແລະ​ຈີນ ເມື່ອອາທິດຜ່ານມາ ທີ່ວໍຊິງຕັນ.
ກອງປະຊຸມບັ້ນດັ່ງກ່າວ ມີຂຶ້ນຫຼັງຈາກການເຈລະຈາລະຫວ່າງສອງ​ປະ​ເທດ​ນີ້ ເມື່ອຕົ້ນ
ເດືອນນີ້ ໃນກອງປະຊຸມຂອງສະມາຄົມອາຊ່ຽນ ທີ່ປະເທດບຣູໄນ ບ່ອນທີ່ທ່ານ ຫວັງ ຢີ່ ລັດຖະມົນຕີຕ່າງປະເທດຈີນ ໄດ້ເຕືອນ ຕໍ່​ການ​ປະຕິບັດ​ການ​ທາງທະຫານ​ ໃດໆ.

ທ່ານຫວັງ ຢີ່ ເວົ້າວ່າ: “ທັງຈີນ ແລະປະເທດອື່ນໆ​ແຄມຝັ່ງທະເລຈີນໃຕ້ ຕ່າງກໍ
ກໍາລັງພາກັນພະຍາຍາມ ເພື່ອໃຫ້ມີສະຖຽນລະພາບ ໃນເຂດທະເລ ຈີນໃຕ້.
ຂ້າພະເຈົ້າເຊື່ອວ່າການປະກອບກິດຈະກໍາໃດໆໂດຍປະເທດໃດນຶ່ງ
ໃນກຸ່ມ
ປະເທດທີ່ອ້າງເອົາກໍາມະສິດ ເພື່ອຕໍ່ຕ້ານທ່າ
ອ່ຽງນັ້ນ ຈະບໍ່ໄດ້ຮັບການສະໜັບ
ສະໜຸນຈາກສ່ວນໃຫຍ່
ຂອງ​ພວກປະເທດເຫຼົ່ານັ້ນ ແລະຈະບໍ່ບັນລຸຜົນສໍາເລັດ
ຫຍັງເລີຍ.”


ສະຫະລັດໄດ້ທໍາການຊ້ອມລົບຮ່ວມກັບຟິລິບປິນຢູ່ເລື້ອຍໆ ຢູ່ໃກ້ເຂດທະເລຈີນໃຕ້ ຊຶ່ງເຊື່ອວ່າເປັນເຂດທີ່ອຸດົມສົມບູນ ດ້ວຍນໍ້າມັນແລະແກັສທໍາມະຊາດ.

ຟິລິບປິນຖິ້ມໂທດໃສ່ຈີນວ່າ ​ເຮັ​ດ​ໃຫ້ຂົງ​ເຂດ​ນັ້ນ​ເປັນ​ເຂດທະຫານຫຼາຍຂຶ້ນນັບ​ມື້ ແລະ ກໍກໍາລັງເຄື່ອນໄຫວເພື່ອປັບປຸງຖານທັບ ທີ່ອ່າວ Subic ທີ່​ເຄີຍເປັນຖານທັບ​ເກົ່າຂອງ ສະຫະລັດນັ້ນ.

ແຕ່ວ່າປະເທດສະມາຊິກອື່ນໆຂອງອາຊ່ຽນ ແມ່ນມີທ່າທີລະມັດລະວັງ ຫຼາຍກ່ວາຟີ​ລິບປິນ
ຊຶ່ງເປັນການແຕກແຍກທີ່​ເປັນ​ປະ​ໂຫຍ​ດຕໍ່ຈີນ ອິງ​ຕາມ​ທ່ານນາງ Pek Koon Hen ອາຈານສອນປະຈໍາມະຫາວິທະຍາໄລ American University.

ທ່ານນາງ ເຮັງ ເວົ້າວ່າ: “ຖ້າພວກເຮົາຈະເບິ່ງວິທີການຕອບ​ໂຕ້​ຂອງປະເທດ
ອາຊ່ຽນທັງຫຼາຍ ກໍຄືພວກປະເທດທີ່ອ້າງເອົາກໍາມະສິດແຂ່ງກັບ ຈີນນັ້ນ ​ໃນ​
ດ້ານນຶ່ງກໍແມ່ນການຍອມຕາມ ຄືພວກເຂົາເຈົ້າຍອມຕາມ ຍອມລົງ​ໃຫ້​ຈີນ.
ສ່ວນອີກດ້ານນຶ່ງກໍຄືການຕໍ່ຕ້ານຂັດ​ຂືນ. ດັ່ງທີ່ເຮົາຈະເຫັນວ່າຫວຽດນາມ
ເປັນຝ່າຍຍອມລົງ​ໃຫ້ ສ່ວນຟິລິບປິນເປັນຝ່າຍຂັດ​ຂືນ.”


​ໃນຝ່າຍຍອມລົງ​ໃຫ້ນັ້ນ ຫວຽດນາມກໍາລັງເຊັນສັນຍາຊຸດ​ນຶ່ງກັບຈີນກ່ຽວກັບການປ້ອງກັນ
ແລະການສໍາຫຼວດນໍ້າມັນນອກຝັ່ງທະເລ.

ບັນດາຜູ້ນໍາທຸລະກິດສະຫະລັດເວົ້າວ່າ ການຫຼີກລ່ຽງບໍ່ໃຫ້ເກີດກໍລະນີພິພາດກັນ ຢູ່ໃນ ເຂດທີ່ມີການຄ້າຂອງໂລກຜ່ານໄປມາຫຼາຍທີ່ສຸດນັ້ນ ​ແມ່ນສໍາຄັນ ທີ່ສຸດ.

ເບິ່ງວີດິໂອລາຍງານນີ້ ເປັນພາສາອັງກິດ:



Calman Cohen ຫົວໜ້າຄະນະກໍາມະການສຸກເສີນສໍາລັບການຄ້າອາເມຣິກັນ ໃຫ້ ທັດສະນະວ່າ:

“ພວກເຮົາທັງໝົດຈະເປັນຝ່າຍທີ່ສູນເສຍ ບໍ່​ວ່າ ປະຊາຊົນ ເສດຖະກິດ ການສ້າງ
ໜ້າວຽກ ຖ້າຫາກກໍລະນີພິພາດລະເບີດ ຂຶ້ນໃນຂົງເຂດນັ້ນ ເພາະວ່າການ​ໄດ້​ເຫັນ​ຜົນ​ຮັບ​ແບບ​ນັ້ນ ມັນບໍ່ໄດ້ນອນຢູ່ ໃນຜົນປະໂຫຍດ ຂອງປະເທດໃດນຶ່ງ​ເລີຍ.”


​ເຖິງ​ແມ່ນ​ວ່າສະຫະລັດບໍ່ໄດ້ເຂົ້າຂ້າງຝ່າຍໃດໃນກໍລະນີຂັດແຍ້ງນີ້ ​ແຕ່ທ່ານ ຈອນ ແຄຣີ ລັດຖະມົນຕີຕ່າງປະເທດສະຫະລັດ ກໍ​ໄດ້ກ່າວຢູ່ທີ່ປະເທດບຣູໄນວ່າ ວໍຊິງຕັນມີຄວາມ ສົນໃຈອັນແຮງກ້າ ຢາກຈະເຫັນບັນຫານີ້ຖືກແກ້ໄຂກັນໄດ້ຢ່າງສັນຕິວິທີ.

ທ່ານແຄຣີ ເວົ້າວ່າ: “ໃນຖານະເປັນປະເທດນຶ່ງໃນ​ເຂດມະຫາສະມຸດແປຊິຟິກ ແລະເປັນອໍານາດປະຈໍານັ້ນ ສະຫະລັດມີຜົນປະໂຫຍດລະດັບຊາດ ໃນການ ອູ້ມຊູຮັກສາ​ໄວ້​ຊຶ່ງສັນຕິພາບແລະສະຖຽນລະພາບ ​ໃນ​ການເຄົາລົບ ຕໍ່ກົດ
ໝາຍ ສາກົນ ​ໃນການຄ້າທີ່ຖືກຕ້ອງຕາມກົດໝາຍ​ແລະ​ບໍ່​ມີ​ສິ່ງ​ກີດຂວາງ
ແລະ​ໃນເສລີພາບໃນການເດີນເຮືອ ຢູ່ເຂດທະເລຈີນໃຕ້.”


ຈີນໄດ້ຕົກລົງທີ່ຈະເຈລະຈາ ຢູ່ປັກກິ່ງ ໃນເດືອນກັນຍາຕໍ່ໜ້ານີ້ ກ່ຽວ​ກັບ​ອັນທີ່ເອີ້ນວ່າ “ກົດປະພຶດປະຕິບັດ” ຫຼື Code of Conduct ນັ້ນ ກັບບັນດາປະເທດສະມາຊິກສະມາ ຄົມອາຊ່ຽນ ເພື່ອຫຼີກລ່ຽງບໍ່​ໃຫ້ເກີດກໍລະນີພິພາດ ຢູ່ໃນເຂດນ່ານນໍ້າທີ່ເປັນຂໍ້ຂັດແຍ້ງ ກັນດັ່ງກ່າວນັ້ນ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG