ລິ້ງ ສຳຫລັບເຂົ້າຫາ

ສຫລ ເພີ່ມການຊ່ອຍເຫຼືອ ແກ່ຜູ້ປະສົບໄພ ນໍ້າຖ້ວມ ຢູ່ກໍາປູເຈຍ

  • ສິງ ບູຣົມມະວົງ

ພວກຊາວບ້ານກໍາປູເຈຍ ພາກັນຂີ່ເຮືອລໍຖ້າການບໍລິຈາກ ເຂົ້າປາຫານ ເນື່ອງຈາກໄພນໍ້ຖ້ວມ ໃນແຂວງກັນດາລ ກໍາປູເຈຍ. ວັນທີ 2 ພະຈິກ 2011.2011.

ສະຫະລັດ​ໃຫ້ການ​ຊ່ອຍ​ເຫລືອ​ເປັນ​ມູນ​ຄ່າ​ເກືອບ 1 ລ້ານ 5 ​ແສນ​ໂດ​ລາແກ່​ກໍາປູ​ເຈຍ​ເພື່ອ
ນໍາ​ໄປ​ແກ້​ໄຂ​ຄວາມ​ຮຽກຮ້ອງ​ຕ້ອງການ​ທີ່ຈຳເປັນຕ່າງໆກ່ຽວກັບເລື່ອງນໍ້າ​ດື່ມ ສຸຂະ​ອະນາ
ໄມ ການ​ກະ​ເສດ​ແລະ​ການ​ດໍາລົງ​ຊີວິດ​ຂອງ​ປະຊາ​ຊົນ​ຢູ່​ໃນ​ຂົງເຂດ​ທີ່​ໄດ້ຮັບ​ຄວາມ​ເສຍ
ຫາຍ​ຈາກ​ໄພ​ນໍ້າ​ຖ້ວມ​ນັ້ນ.

ສະຖານທູດ​ສະຫະລັດ​ທີ່​ກຸງ​ພະນົມ​ເປັນອອກ​ຖະ​ແຫລ​ງການ​ສະບັບ​ນຶ່ງ​ໃນ​ວັນ​ອັງຄານ​ວານ​
ນີ້​ວ່າ ການ​ຊ່ອຍ​ເຫລືອ​ດັ່ງກ່າວ​ຈະ​ດໍາ​ເນີນ​ໄປ​ໂດຍຜ່ານພະແນກການໃຫ້ຄວາມຊ່ອຍເຫຼືອ
ກ່ຽວກັບໄພພິບັດຕ່າງປະເທດ​ຂອງອົງການພັດທະນາ​ລະຫວ່າງ​ຊາດ​ສະຫະລັດ.

ເງິນ​ຊ່ອຍ​ເຫລືອ​ກ້ອນ​ນີ້​ຈະ​ມອບ​ໃຫ້​ພວກ​ອົງການ​ຊ່ອຍ​ເຫລືອ​ບັນ​ເທົາ​ທຸກຕ່າງໆ​ທີ່​ເຮັດ​
ວຽກ​ຢູ່​ໃນ​ກໍາປູ​ເຈຍ​ນັ້ນ​ກໍ​ຄື ອົງການ Save the Children ​ແລະ World Vision ນັ້ນ.

ຖະ​ແຫລງການ​ຂອງ​ສະຖານທູດ​ສະຫະລັດ​ເວົ້າ​ວ່າ ສອງ​ອົງການ​ນີ້​ຈະເຂົ້າ​ຫາ​ພວກ​ປະຊາ
ຊົນ​ທີ່​ໄດ້​ຮັບ​ຜົນ​ກະທົບ​ຈາກ​ໄພ​ນໍ້າ​ຖ້ວມ​ຫຼາຍ​ເກືອບ 60 ພັນ​ຄົນ​ໃນ​ໄລຍະ 6 ​ເດືອນ​ຂ້າງ
ໜ້າ​ນີ້.

ອົງການ Save the Children ​ໄດ້​ຮບ​ເງິນ​ຊ່ອຍ​ເຫລືອ 50 ພັນ​ໂດ​ລາ​ແລ້ວ​ຈາກ
ລັດຖະບານ​ສະຫະລັດ​ໃນ​ເດືອນ​ແລ້ວ​ນີ້ ​ແລະ​ຈະ​ໄດ້​ຮັບ​ເງິນຊ່ອຍ​ເຫລືອ​ລ້າ​ຕື່ມ​ອີກ
750 ພັນ​ໂດ​ລາ.

ເງິນ​ຊ່ອຍ​ເຫລືອ​ບັນ​ເທົາ​ທຸກ​ດັ່ງກ່າວ​ຈະ​ຖືກ​ນໍາ​ໄປ​ໃຊ້​ຈ່າຍ​ໃນ 3 ​ແຂວງ​ທີ່​ໄດ້​ຮັບ​ຜົນ​ກະ
ທົບຫລາຍ​ທີ່​ສຸດ ຄື​ໃນ​ແຂວງ​ກໍາ​ປອງ​ຈາມ ​ແຂວງ​ກໍາ​ປົງ​ທົມ​ແລະ​ແຂວງກັນດາລ.

ນັບ​ຕັ້ງ​ແຕ່​ເດືອນ​ກໍລະກົດ​ເປັນ​ຕົ້ນ​ມາ ຝົນຕົກ​ໜັກ​ໄດ້​ພາ​ໃຫ້​ເກີດ​ນໍ້າ​ຖ້ວມ​ໃນ​ທົ່ວ​ພາກ​
ພື້ນ​ເອ​ເຊຍ​ຕາ​ເວັນ​ອອກສຽງ​ໃຕ້ ອັນ​ມີ​ໄທ ກໍາປູ​ເຈຍ​ແລະ​ຫວຽດນາມ ຊຶ່ງ​ກໍາລັງ​ໄດ້​ຮັບ
ຜົນ​ກະທົບ​ຫລາຍ​ກວ່າ​ໝູ່. ອົງການ​ຊ່ອຍ​ເຫລືອ​ສະຫະລັດ​ຫລື USAID ກ່າວ​ວ່າ ປະຊາ
ຊົນ​ຈໍານວນ​ຫລາຍກວ່າ 800 ​ຄົນໃນ​ຂົງ​ເຂດ​ໄດ້​ເສຍ​ຊີວິດ​ໄປແລະ​ປະມານຕື່ມອີກ 10
ລ້ານຄົນໄດ້​ຮັບ​ຜົນ​ກະທົບ​ຈາກ​ອຸ​ທົກ​ກະ​ໄພທີ່ວ່ານີ້.

ໜັງສືພິມ Phnom Penh Post ​ແຈ້ງ​ໃຫ້​ຊາບ​ໃນ​ວັນ​ອັງຄານ​ວານ​ນີ້​ວ່າ ລັດຖະບານ
ປະເທດເດັນ​ມາກໄດ້​ເພີ້ມການ​ຊ່ອຍ​ເຫລືອ​ຂອງ​ຕົນ​ຂຶ້ນ​ເປັນ​ສອງ​ເທົ່າ​ໂຕ​ໃຫ້​ແກ່​ພວກ​ປະ
ສົບໄພນໍ້າ​ຖ້ວມ​ໃນ​ເຂດ​ຊົນນະບົດຂອງ​ກໍາປູ​ເຈຍຄື 60 ພັນ​ໂດ​ລາ​ເປັນ​ເງິນ​ຊ່ອຍ​ເຫ​ລື​ອ
ລ້າ​ແກ່​ອົງການ​ພັດທະ​ນາ​ຊົນນະບົດ​ຫລື Life With Dignity. ​ເງິນ​ຊ່ອຍ​ເຫລືອ​ລ້າ​ກ້ອນ
ນີ້​ມີ​ວັດຖຸ​ປະສົງ​ເພື່ອ​ຊ່ອຍ​ເຫລືອ​ປະຊາຊົນ​ປະມານ 7 ​ແສນ​ຄົນ​ໃນ​ແຂວງ​ກໍາ​ປົງ​. ​ນໍ້າ​
ຖ້ວມ​ໄດ້​ທໍາລາຍ​ເນື້ອ​ທີ່​ປູກເຂົ້າ​ຂອງ​ປະຊາຊົນປະມານ 60 ສ່ວນ​ຮ້ອຍ​ໃນ​ແຂວງ​ພາກ​
ກາງຂອງ​ກໍາປູ​ເຈຍ.

XS
SM
MD
LG