ລິ້ງ ສຳຫລັບເຂົ້າຫາ

ບໍລິສັດ BP ຈະຈ່າຍ ຄຳປັບໃໝ 4.500 ລ້ານໂດລາ


ເຮືອດັບໄຟ ພວມພາກັນມອດໄຟ ທີ່ກຳລັງລຸກໄໝ້ ຢູ່ຖານເຈາະນໍ້າມັນ Deepwater Horizon, ເດືອນເມສາ 2010.
ບໍລິສັດນໍ້າມັນຍັກໃຫຍ່ບີພີຂອງອັງກິດກ່າວວ່າ ຕົນໄດ້ບັນລຸການ
ຕົກລົງກັບຄະນະໄອຍະການ ຂອງສະຫະລັດ ທີ່ຈະຮັບຜິດ ແລະ
ຈ່າຍຄ່າເສຍຫາຍຫຼາຍເປັນປະວັດການ ໃນມູນຄ່າ 4.500 ລ້ານ
ໂດລາກ່ຽວກັບເຫດລະເບີດໃນປີ 2010 ທີ່ຖານເຈາະນໍ້າມັນ
ແລະເຮັດໃຫ້ມີນໍ້າມັນຮົ່ວໄຫລຢູ່ໃນບໍລິເວນອ່າວເມັກຊິໂກ.

ພາຍໃຕ້ການຕົກລົງ ທີ່ມີການປະກາດໃຫ້ຊາບ ໃນວັນພະຫັດ
ວານນີ້ ບໍລິສັດບີພີຈະຍອມຮັບຜິດ ຕໍ່ຄວາມຜິດດ້ານອາຍາຮ້າຍ
ແຮງ 11 ກະທົງໃນການປະຕິບັດທີ່ບໍ່ຖືກຕ້ອງ ກ່ຽວກັບການເສຍ
ຊີວິດ ຂອງພວກຄົນງານ 11 ຄົນ ໃນອັນທີ່ເອີ້ນກັນວ່າ ເຫດລະ
ເບີດທີ່ຖານເຈາະນໍ້າ ມັນ Deepwater Horizon ນັ້ນ.

ໃນອີກດ້ານນຶ່ງນັ້ນ ກະຊວງຍຸຕິທໍາສະຫະລັດກໍໄດ້ຟ້ອງຫົວໜ້າ ຄວບຄຸມທີ່ຖານເຈາະນໍ້າມັນ Deepwater Horizon ສອງຄົນ ໃນຖານຂ້າຄົນຕາຍໂດຍ ບໍ່ເຈດຕະນາ ທີ່ມີການກ່າວຫາວ່າບໍ່ເອົາຫົວຊານໍາການເຕືອນກ່ອນເກີດເຫດລະເບີດ ໃນ ຂະນະດຽວກັນຜູ້ບໍລິຫານຄົນນຶ່ງຂອງບໍລິສັດບີພີກໍປະເຊີນກັບຂໍ້ຫາຂັດຂວາງການສືບສວນ ໂດຍມີການກ່າວຫາວ່າ ຕົວະຕໍ່ ລັດຖະສະພາສະຫະລັດ. ບັນດາທະນາຍຄວາມ ຂອງບຸກ ຄົນທັງສາມ ທີ່ບໍ່ໄດ້ຮວມຢູ່ໃນການຕົກລົງ ໃນວັນພະຫັດວານນີ້ ກ່າວວ່າ ເຂົາເຈົ້າຈະຕໍ່ສູ້ ກັບຂໍ້ກ່າວຫາເຫຼົ່ານີ້.

ນອກນັ້ນ ບໍລິສັດ BP ຍັງຕົກລົງທີ່ຈະຈ່າຍຄ່່າປັບໃໝ 525 ລ້ານໂດລາຕໍ່ຄະນະກໍາມາທິ ການຫຼັກຊັບແລະຕະຫຼາດຫຼັກຊັບ.

ໃນວັນທີ 20 ເດືອນເມສາ ປີ 2010 ເຫດລະເບີດທີ່ຖານເຈາະນໍ້າມັນດັ່ງກ່າວ ໄດ້ພາໃຫ້ ເກີດນໍ້າມັນຮົ່ວໄຫຼຄັ້ງໃຫຍ່ທີ່ສຸດເປັນປະວັດການລົງໃສ່ທະເລໂດຍມີນໍ້າມັນທັງໝົດເກືອບ ຫ້າລ້ານຖັງ ຮົ່ວໄຫລອອກໃສ່ບໍ ລິເວນອ່າວເມັກຊິໂກ ພາຍໃນລະຍະສາມເດືອນ.

ຫົວໜ້າບໍລິຫານຂອງບໍລິສັດນໍ້າມັນ BP ທ່ານ Bob Dudley ກ່າວວ່າ ບໍລິສັດມີຄວາມ ເສົ້າສະລົດໃຈ ກ່ຽວກັບການເສຍຊີວິດຢູ່ໃນເຫດຮ້າຍດັ່ງກ່າວ ພ້ອມທັງຜົນກະທົບຈາກ ການຮົ່ວໄຫລຂອງນໍ້າມັນທີ່ມີຕໍ່ເຂດແຄມຝັ່ງທະເລຂອງອ່າວເມັກຊິໂກ.
XS
SM
MD
LG