ຕໍາຫລວດນະຄອນນີວຢອກໄດ້ຈັບກຸມຊາຍຄົນນຶ່ງ ທີ່ພວກຕໍາຫລວດກ່າວວ່າ ກໍາລັງວາງ
ແຜນຈະທໍາການໂຈມຕີໂຮງໄປສະນີ ລົດຕໍາຫລວດ ແລະພວກທະຫານທີ່ກັບຄືນມາປະ
ເທດຫລັງຈາກປະຈໍາການຢູ່ໃນອີຣັກແລະອັຟການິສຖານນັ້ນ.
ທ່ານ Michael Bloomberg ເຈົ້າຄອງກໍາແພງນະຄອນນີວຢອກ ກ່າວຕໍ່ບັນດານັກຂ່າວ
ໃນວັນອາທິດວານນີ້ວ່າ ນາຍ Jose Pimentelໄວ 27 ປີ ໄດ້ຄວາມບັນດົນໃຈມາຈາກ
ກຸ່ມ al-Qaida ແຕ່ຜູ້ກ່ຽວດໍາເນີນການພຽງຜູ້ດຽວ ແລະບໍ່ໄດ້ເປັນສ່ວນນຶ່ງຂອງແຜນ
ການທີ່ໃຫຍ່ກ່ວາໃດໆ.
ທ່ານ Raymond Kelly ຫົວໜ້າຕໍາຫລວດນະຄອນນີວຢອກ ກ່າວວ່າ ຜູ້ຕ້ອງສົງໄສໄດ້
ເລີ້ມຜະລິດລະເບີດທໍ່ 3 ລູກແລ້ວເວລາຖືກຕໍາຫລວດຈັບໃນຕອນບ່າຍວັນເສົາຜ່ານມານີ້.
ພວກໄອຍະການກ່າວ ໃນການໃຫ້ການຂັ້ນຕົ້ນຕໍ່ສານໃນຕອນແລງວັນອາທິດວານນີ້ວ່າ
ຍັງເຫລືອເວລາປະມານຊົ່ວໂມງດຽວ ນາຍ Pimentel ກໍຈະຜະລິດລະເບີດເຫລົ່ານັ້ນສໍາ
ເລັດ.
ນາຍ Pimentel ໄດ້ຖືກກາວຫາວ່າ ວາງແຜນສ້າງລະເບີດເພື່ອເປົ້າໝາຍທໍາການກໍ່ການ
ຮ້າຍ ແລະມີເຄື່ອງມືຢູ່ໃນຄວາມຄອບຄອງເພື່ອກໍ່ຄວາມຮຸນແຮງ.
ທາງການເວົ້າວ່າ ພົນລະເມືອງອາເມຣິກັນຄົນນີ້ໄດ້ປ່ຽນສາສະໜາເປັນອິດສະລາມ ແລະ
ມີຄວາມເຫລື້ອມໄສໃນໂຕນັກບວດຫົວຮຸນແຮງ Anwar Al-Awlaki ທີ່ໄດ້ຖືກສັງຫານໃນ
ຕົ້ນປີນີ້ ໃນການໂຈມຕີທາງອາກາດຂອງສະຫະລັດທີ່ເຢເມນນັ້ນ.
