ລິ້ງ ສຳຫລັບເຂົ້າຫາ

ສະຫະລັດ ມີແຜນໃຫ້ ກຳປັ່ນລົບຂອງຕົນ ສ່ວນໃຫຍ່ ປະຈຳການ ໃນເຂດປາຊີຟິກ

  • ໄພສານ ວໍຣະຈັກ

ລັດຖະມົນຕີກະຊວງປ້ອງກັນປະເທດສະຫະລັດ ທ່ານ Leon Panetta ເຂົ້າຮ່ວມກອງປະຊຸມສຸດຍອດດ້ານຄວາມໝັ້ນ ຄົງໃນເຂດເອເຊຍ ທີ່ສິງກະໂປ (2 ມິຖຸນາ 2012)

ລັດຖະມົນຕີ​ກະຊວງ​ປ້ອງ​ກັນ​ປະ​ເທດ​ສະຫະລັດ ທ່ານ Leon Panetta ກ່າວວ່າ ສະຫະລັດ
​ຈະ​ຍ້າຍ​ກຳ​ປັ່ນ​ລົບ​ສ່ວນ​ໃຫຍ່​ຂອງ​ຕົນ​ໄປ​ຍັງ​ເຂດ​ເອ​ເຊຍ​ປາຊີ​ຟິກ​ໃນ​ໄລຍະ​ຫຼາຍໆ​ປີ​ຂ້າງ​ໜ້ານີ້
ຊຶ່ງ​ເປັນ​ພາກສ່ວນ​ນຶ່ງ​ຂອງ​ຍຸດ​ທະ​ສາດ​ໃໝ່ ທີ່​ເພັ່ງ​ເລັງ​ໃສ່​ເຂດ​ເອ​ເຊຍ.

ທີ່​ສິງ​ກະໂປ​ໃນ​ວັນ​ເສົາ​ມື້ນີ້ ທ່ານ Panetta ກ່າວ​ຕໍ່​ກອງ​ປະຊຸມ​ພວກ​ເຈົ້າໜ້າ​ທີ່ກະຊວງ​ປ້ອງ
​ກັນ​ປະ​ເທດ ຈາກ 30 ປະ​ເທດ ​ໃນ​ເຂດ​ເອ​ເຊຍ​ປາຊີ​ຟິກວ່າ ກອງທັບ​ເຮືອ​ຂອງ​ສະຫະລັດ​ຈະ
​ຈັດ​ວາງ​ກຳລັງ​ໃໝ່ ຈາກ​ລະດັບ​ໃນ​ປັດຈຸບັນຊຶ່ງ​ແບ່ງ​ເຄິ່ງຕໍ່​ເຄິ່ງລະຫວ່າງ​ມະຫາ​ສະມຸດ​ປາຊີ​ຟິກ​
ແລະ​ມະຫາ​ສະມຸດ​ອັດ​ລັນ​ຕິກ​ເປັນ 60% ຂອງ​ກຳລັງ​ທາງ​ທະ​ເລໃຫ້​ເຂົ້າ​ປະຈຳການ​ຢູ່​ໃນ​ເຂດ
ມະຫາ​ສະມຸດ​ປາຊີຟິກ​ແລະ 40% ​ໃນ​ມະຫາ​ສະມຸດ​ອັດ​ລັນ​ຕິກ.

ນອກ​ນັ້ນ​ແລ້ວ ລັດຖະມົນຕີ​ກະຊວງ​ປ້ອງ​ກັນ​ປະ​ເທດ​ສະຫະລັດຍັງ​ແຈ້ງ​ໃຫ້​ພວກຜູ້ຕາງໜ້າ​
ທີ່​ເຂົ້າຮ່ວມ​ກອງ​ປະຊຸມ ​ວ່າ​ດ້ວຍ​ຄວາມ​ໝັ້ນຄົງປະຈຳ​ປີ ຫຼື Shangri-La Dialogue ວ່າ
ການ​ຍົກຍ້າຍ​ກຳລັງ​ທີ່​ວ່າ​ນີ້ ຈະ​ເສັດ​ສິ້ນລົງ​ໃນ​ປີ 2020. ທ່ານ​ໃຫ້​ຄຳ​ໝັ້ນສັນຍາ​ວ່າ ຈະ​ຂະ
ຫຍາຍ​ກາ​ນຊ້ອມ​ລົບ​ທາງ​ທະຫານ​ຂອງ​ສະຫະລັດ​ຢູ່​ໃນ​ເຂດ​ມະຫາ​ສະມຸດ​ປາຊີ​ຟິກ​ແລະ​ການ
ສົ່ງ​ກຳ​ປັ່ນ​ລົບ​ໄປ​ຢ້ຽມຢາມ​ທ່າ​ກຳປັ່ນໃນ​ເຂດ​ຕ່າງໆ ​ເຊັ່ນ​ມະຫາ​ສະມຸດ​ອິນ​ເດຍ​ເປັນຕົ້ນ.

ບ່ອນ​ທີ່​ຄວາມ​ຮຸນ​ແຮງ​ພວມ​ເກີດ​ຂຶ້ນ​ແລະ​ຄວບ​ຄຸມ​ບໍ່​ໄດ້​ທີ່​ສຳຄັນໆ​ຢູ່​ໃນ​ຂົງ​ເຂດ​ກໍແມ່ນ​ທະ
​ເລຈີນ​ໃຕ້ ທີ່​ຈີນ​ອ້າງ​ກຳມະສິດ​ວ່າ​ເປັນ​ດິນ​ແດນ​ຂອງຕົນ​ເກືອບ​ທັງ​ໝົດ ນັ້ນ. ​ແຕ່​ໄຕ້​ຫວັນ
ຫວຽດນາມ ມາ​ເລ​ເຊຍ ສິງກະ​ໂປ ບຣູນາຍ​ແລະ​ຟີ​ລິບ​ປິນ ຕ່າງ​ກໍ​ໄດ້​ອ້າງ​ເອົາ​ກຳ​ມະ​ສິດ​ໃນ
​ເຂດ​ດັ່ງກ່າວ​ຄື​ກັນ.

ທ່ານ Panetta ​ໃຫ້ການ​ຄໍ້າປະກັນ​ຕໍ່​ພວກ​ຜູ້ຕາງໜ້າ​ທີ່​ເຂົ້າຮ່ວມ​ປະຊຸມ​ວ່າ ການປັບ​ປ່ຽນ​
ກຳລັງ​ກອງທັບ​ເຮືອ​ໃໝ່​ນັ້ນ ບໍ່​ແມ່ນ​ເພື່ອ​ຢັບຢັ້ງ ຫຼືຈຳກັດ​ການ​ເຄື່ອນ​ໄ​ຫວຂອງ​ຈີນ. ທ່ານ
​ເວົ້າວ່າ ວໍ​ຊິງ​ຕັນ​ຈະ​ບໍ່​ເຂົ້າຂ້າງ​ອອກ​ຂາ ​ໃນ​ບັນຫາ​ຂັດ​ແຍ້​ງກ່ຽວ​ກັບ​ເລື່ອງ​ເຂດ​ນໍ້າ​ແດ​ນດິນ
​ແລະ​ຕ້ອງການ​ຢາກ​ໃຫ້​ປັກ​ກິ່ງ ​ສະໜັບສະໜຸນ​ລະ​ບົບ ທີ່​ໃຫ້​ຄວາມ​ກະຈ່າງ​ແຈ້ງ ກ່ຽວ​ກັບ
​ເລື່ອງ​ສິດທິ​ຢູ່​ໃນ​ຂົງ​ເຂດ​ແລະ​ຊ່ອຍ​ແກ້​ໄຂ​ບັນຫາ ຂັດ​ແຍ້​ງຕ່າງໆ.

ລັດຖະມົນຕີ​ປ້ອງກັນ​ປະ​ເທດ​ສະຫະລັດ ພວມ​ຢູ່​ໃນ​ລະຫວ່າງ​ການ​ຢ້ຽມຢາມ​ເອ​ເຊຍ ​ເປັນ
​ເວລາ​ນຶ່ງ​ສັບປະດາຊຶ່ງ​ຈະ​ຮວມທັງ​ການ​ຢຸດ​ແວ່​ທີ່​ປະ​ເທດ​ຫວຽດນາມ​ແລະ​ອິນ​ເດຍນຳ​ດ້ວຍ.

XS
SM
MD
LG