ສະຫະລັດກ່າວໃນວັນພະຫັດວານນີ້ວ່າ ຕົນຈະກົດດັນໃຫ້ມີການຫ້າມຂາຍອາວຸດຂອງອົງ ການສະຫະປະຊາຊາດຕໍ່ພວກທີ່ຮັບຜິດຊອບໃນການກໍ່ຄວາມຮຸນແຮງຢູ່ຊູດານໃຕ້ ຊຶ່ງໄດ້ເພີ້ມທະວີຂຶ້ນລະຫວ່າງພວກຊົນຊາດຊົນເຜົ່າ.
ທ່ານນາງ Samantha Power ເອກອັກຄະລັດຖະທູດສະຫະລັດ ປະຈຳອົງການສະຫະປະຊາຊາດ ກ່າວຕໍ່ສະມາຊິກ ຂອງ ສະພາຄວາມໝັ້ນຄົງວ່າ “ໃນໄລຍະສອງສາມມື້ຂ້າງໜ້ານີ້ ສະຫະລັດຈະນຳສະເໜີ ການຫ້າມບໍ່ໃຫ້ຂາຍອາວຸດໃຫ້ແກ່ຊູດານໃຕ້ ແລະໄດ້ແນເປົ້າໝາຍການລົງໂທດໃສ່ສ່ວນບຸກຄົນ ທີ່ໄດ້ສ້າງຄວາມເສຍຫາຍຮ້າຍແຮງຕໍ່ການບັນລຸສັນຕິພາບອັນຖາວອນຢູ່ໃນຊູດານໃຕ້.”
ທ່ານນາງກ່າວຕື່ມວ່າ ການເຄື່ອນໄຫວດັ່ງກ່າວນີ້ ຈະເປັນບາດກ້າວສຳຄັນເພື່ອຊ່ອຍຍຸຕິການກໍ່ຄວາມຮຸນແຮງໂດຍກຳລັງລັດຖະບານ ແລະພວກຝ່າຍຄ້ານຕໍ່ພົນລະເຮືອນ ທີ່ປະ ເທດຊາດໄດ້ຖືກທຳລາຍຍ້ອນສົງຄາມ ໃນໄລຍະສາມປີທີ່ຜ່ານມານີ້.
ເຖິງແມ່ນມີການຫ້າມຂາຍອາວຸດ ກໍຈະບໍ່ສາມາດຍຸຕິຢ່າງສິ້ນເຊີງ ຕໍ່ການຫລັ່ງໄຫລຂອງອາວຸດໄປຍັງປະເທດດັ່ງກ່າວ ຫລືກຳຈັດອາວຸດທີ່ມີຢູ່ແລ້ວນັ້ນກໍຈິງຢູ່ ທ່ານນາງ Power ກ່າວວ່າ ມັນສາມາດທີ່ຈະສ້າງຄວາມແຕກຕ່າງໄດ້ໂດຍສະເພາະ ໃນການປ້ອງກັນບໍ່ໃຫ້ ມີການໄດ້ຮັບອາວຸດໜັກ ເຮືອບິນ ຫຼືລົດທະຫານ ໃນຈຳນວນເພີ້ມຂຶ້ນ.
ຊູດານໃຕ້ ໄດ້ກ້າວເຂົ້າສູ່ບັນຫາຂັດແຍ້ງ ທາງການເມືອງ ນັບແຕ່ເດືອນທັນວາ ປີ 2013 ເປັນຕົ້ນມາທີ່ໄດ້ກໍ່ໃຫ້ເກີດຄວາມຮຸນແຮງລະຫວ່າງພວກຊົນຊາດຊົນເຜົ່າຊຶ່ງພາໃຫ້ເສດ ຖະກິດປະສົບກັບຄວາມລົ້ມແຫຼວ ເຮັດໃຫ້ມີຜູ້ເສຍຊີວິດແລະອົບພະຍົບຫລົບໄພຫຼາຍໆພັນຄົນແລະໄດ້ກໍ່ໃຫ້ເກີດວິກິດການທາງດ້ານມະນຸດສະທຳທີ່ເຊື່ອວ່າມີປະຊາຊົນເກືອບ 5 ລ້ານຄົນຂາດແຄນອາຫານການກິນຢ່າງໜັກ.
ແຕ່ການທີ່ຈະຊັກຊວນໃຫ້ສະພາຄວາມໝັ້ນຄົງເຫັນພ້ອມກ່ຽວກັບການຫ້າມຂາຍອາວຸດແລະແນເປົ້າໝາຍການລົງໂທດນັ້ນ ອາດຈະປະສົບ ກັບຄວາມຫຍຸ້ງຍາກ. ເວລາຄວາມ ຄິດກ່ຽວກັບການຫ້າມຂາຍອາວຸດ ໄດ້ຖືກຍົກຂຶ້ນມາໂອ້ລົມກັນ ເທື່ອທຳອິດ ເມື່ອຫຼາຍໆເດືອນກ່ອນ ສະມາຊິກບາງປະເທດ ຂອງສະພາຄວາມໝັ້ນຄົງ ໄດ້ສະແດງຄວາມລັງເລໃຈຍ້ອນຢ້ານວ່າ ມາດຕະການດັ່ງກ່າວ ແມ່ນຍາກທີ່ຈະບັງຄັບໃຊ້ໄດ້ ແລະນັ້ນ ຈະສ້າງຄວາມເສຍຫາຍໃຫ້ແກ່ລັດຖະບານຈູບາ ແລະເປັນການສະໜັບສະໜຸນຝ່າຍຄ້ານໄປໃນຕົວ.
ຣັດເຊຍ ແມ່ນນຶ່ງ ທີ່ສະແດງໃຫ້ເຫັນວ່າ ບໍ່ຍອມທີ່ຈະອ່ອນທ່າທີຂອງຕົນລົງ.
