ລິ້ງ ສຳຫລັບເຂົ້າຫາ

ສະຫະລັດ ຈະຊົດເຊີຍ ຄ່າເສຍຫາຍ ສຳລັບການ ໂຈມຕີໃສ່ ໂຮງໝໍ ອັຟການິສຖານ


ຮູບນີ້ສະແດງໃຫ້ເຫັນ ພາບຄວາມເສຍຫາຍທີ່ໂຮງໝໍໃນເມືອງ Kunduz ອັຟການິສຖານ ທີ່ຖືກໂຈມຕີທາງອາກາດໂດຍ ສະຫະລັດ ໃນວັນທີ 3 ຕຸລາ ເຮັດໃຫ້ 12 ຄົນເສຍຊີວິດ.

ຮູບນີ້ສະແດງໃຫ້ເຫັນ ພາບຄວາມເສຍຫາຍທີ່ໂຮງໝໍໃນເມືອງ Kunduz ອັຟການິສຖານ ທີ່ຖືກໂຈມຕີທາງອາກາດໂດຍ ສະຫະລັດ ໃນວັນທີ 3 ຕຸລາ ເຮັດໃຫ້ 12 ຄົນເສຍຊີວິດ.

ສະຫະລັດ ຈະ​ມອບ “​ເງິ​ນສະ​ແດງ​ຄວາມ​ເສຍໃຈ” ສຳລັບ​ຜູ້​ທີ່​ໄດ້​ເສຍ​ຊີວິດ ​ຫຼື ​ໄດ້​ຮັບ​ບາດ​ເຈັບ​ໃນ​ການ​ໂຈມ​ຕີ​ທາງ​ດ້ານອາກາດ ຂອງສະຫະ​ລັດ ທີ່​ລະ​ເບີດ​ໄດ້​ຕົກ​ຢ່າງ​ພິ​ດ​ພາດ​ໃສ່​ໂຮງໝໍຂອງ ທ່ານໝໍ​ບໍ່​ມີ​ພົມ​ແດນ​ໃນ​ເມືອງ Kunduz, ​ອັ​ຟກາ​ນິສຖານ ​ໃນ​ວັນ​ທີ 3 ຕຸລາ​ທີ່​ຜ່ານ​ມາ​ນີ້.

​ໂຄສົກ​ກະຊວງ​ປ້ອງ​ກັນ​ປະ​ເທດ ທ່ານ Peter Cook ​ໄດ້​ກ່າວ​ວ່າ ທະຫານ​ ສະຫະລັດ ​ໃນ​ ອັ​ຟກາ​ນິສຖານ ​ຈະ​ເຮັດ​ວຽກກັ​ບຜູູ້ທີ່​ໄດ້​ຮັບ​ຜົນ​ກະທົບ​ເພື່ອ​ພິຈາລະນາ​ການ​ໃຊ້​ຈ່າຍ​ທີ່ເໝາະ​ສົມ. ທ່ານ​ກ່າວ​ວ່າ ຖ້າ​ມີ​ຄວາມ​ຈຳ​ເປັນ, ລັດຖະບານ​ຈະ​ຫາ​ທາງ​ແກ້​ໄຂເພີ່ມເຕີມ ຈາກລັດຖະ​ສະພາ.

ກ່ອນ​ໜ້າ​ນີ້, ທ່ານ Cook ໄດ້້ກ່າວວ່າ ຈຳນວນຂອງຄ່າໃຊ້ຈ່າຍແມ່ນ ຍັງບໍ່ທັນໄດ້ຖືກ ພິຈາລະນາເທື່ອ. ເງິນຈະຖືກຈ່າຍໃຫ້ “ປະຊາຊົນທີ່ ໄດ້ຮັບບາດເຈັບ ບໍ່ແມ່ນຈາກ ການຕໍ່ສູ້ ແລະ ຄອບຄົວຂອງປະຊາຊົນ ທີ່ຖືກຂ້າຕາຍ ທີ່​ບໍ່ສ່ວນໃນການສູ້ຮົບ ເຊິ່ງເປັນຜົນຈາກການ ປະຕິບັດການຂອງທະຫານ ສະຫະລັດ.”

ກຸ່ມທາງການແພດ, ຮູ້ຈັກກັນໂດຍຄຳຫຍໍ້ໃນພາສາ ຝຣັ່ງ ຂອງພວກ ເຂົາເຈົ້າວ່າ MSF, ​ໄດ້​ກ່າວ​ວ່າການ​ໂຈມຕີ​ທາງ​ອາກາດ​ໄດ້​ເຮັດ​ໃຫ້​ຄົນເຈັບ 10 ຄົນ ​ແລະ ສະມາຊິກ​ພະນັກງານ MSF 12 ຄົນ​ເສຍ​ຊີວິດ. ມູນ​ນິທິກຸສົນ​ນີ້​ໄດ້​ກ່າວໃນ​ວັນ​ພະຫັດ​ທີ່​ຜ່ານ​ມາ​ວ່າ 33 ຄົນ​ແມ່ນ​ຍັງ​ສູນຫາຍ​ຢູ່, ລວມມີຄົນ​ໄຂ້ 9 ຄົນ ​ແລະ ສະມາຊິກ​ພະນັກງານ 24 ຄົນ.

MSF ​ໄດ້​ສິ້ນ​ສຸດ​ການ​ປະຕິ​ບັດ​ການ​ຂອງ​ພວກ​ເຂົາ​ເຈົ້າ​ໃນ​ເມືອງ Kunduz ຫຼັງ​ຈາກ​ຖືກໂຈມ ຕີ​ທາງ​ອາກາດ ​ແລະ ​ໄດ້​ຮຽກຮ້ອງ​ໃຫ້​ມີ​ການ​ສືບສວນ​ສອບ​ສວນ​ຢ່າງ​ເປັນ​ອິດສະຫຼະ ​ໃນ​ການ​ໂຈມ​ຕີ​ພາຍ​ໃຕ້​ສົນທິສັນຍາ Geneva. ກຸ່ມ​ດັ່ງ​ກ່າວເວົ້າ​ວ່າ ການ​ກວດ​ສອບ​ທີ່​ດຳ​ເນີນ​ໂດຍ ສະຫະລັດ, ອັ​ຟກ​ານິສຖານ ​ແລະ NATO ​ແມ່ນ​ບໍ່​ພຽງພໍ ​ແລະ ​ໄດ້​ສະ​ເໜີ​ວ່າ ການ​ໂຈມ​ຕີ​ມີຄ່າ​ເທົ່າ​ກັບ​ອາ​ຊະ​ຍາ​ກຳ​ສົງຄາມ.

ສົນທິສັນຍາ Geneva ​ແມ່ນ​ການຈັດ​ຕັ້ງ​ຂອງ​ສົນທິສັນຍາ​ສາກົນ ​ແລະ ລະບຽບການທີ່​ກຳນົດ​ພຶດຕິ​ກຳ​ຂອງ​ຄວາມ​ຂັດ​ແຍ້​ງທີ່​ໃຊ້​ອາວຸດ ​ແລະ ​ແນ​ໃສ່​ເພື່ອ​ປົກ​ປ້ອງ​ປະຊາ​ຊົນ​ທີ່​ບໍ່​ໄດ້​ເຂົ້າ​ຮ່ວມ​ໃນ​ພາວະ​ສົງຄາມ ​ແລະ ຜູ້​ທີ່​ບໍ່​ໄດ້​ມີ​ສ່ວນ​ຮ່ວມ​ຕໍ່ສູ້​ອີກ​ຕໍ່​ໄປ.

XS
SM
MD
LG