ສະຫະພັນກຳມະບານນຶ່ງຂອງອາເມຣິກາ ກ່າວວ່າ ພວກລັກເຈາະ
ຂໍ້ມູນ ຫຼື hackers ໄດ້ເຈາະເອົາຂໍ້ມູນສ່ວນຕົວທີ່ສຳຄັນ ຂອງ
ບັນດາພະນັກ ງານລັດຖະບານກາງທັງໝົດໄປ ຫຼັງຈາກໄດ້ມີການ
ໂຈມຕີທາງອິນເຕີເນັດຄັ້ງໃຫຍ່ ທີ່ບັນດາເຈົາໜ້າທີ່ ສະຫະລັດ
ກ່າວວ່າ ມີຈຸດເລີ້ມຕົ້ນມາຈາກຈີນນັ້ນ.
ສະຫະພັນ ພະນັກງານລັດຖະບານ ອາເມຣິກັນ ໄດ້ກ່າວອ້າງ
ໃນວັນພະຫັດວານນີ້ ຢູ່ໃນຈົດໝາຍສະບັບນຶ່ງ ທີ່ສົ່ງເຖິງ
ຫ້ອງການຄຸ້ມຄອງ ພະນັກງານຫຼື OPM ຊຶ່ງເປັນອົງການ
ຊັບພະຍາກອນມະນຸດ ຂອງລັດຖະບານກາງສະຫະລັດ ທີ່ໄດ້
ຕົກເປັນເປົ້າໝາຍ.
ທ່ານ David Cox ປະທານຂອງສະຫະພັນ ກ່າວໃນຈົດໝາຍວ່າ “ພວກແຮັກເກີ້ ເວລາ
ນີ້ ມີຢູ່ໃນຄອບຄອງ ຂໍ້ມູນສ່ວນຕົວຂອງພະນັກ ງານລັດຖະບານກາງທຸກໆຄົນ
ພະນັກງານລັດຖະບານກາງທີ່ກະສຽນແລ້ວ ທຸກໆຄົນ ແລະ ອະດີດພະນັກງານ
ລັດຖະບານກາງ ຫຼາຍເຖິງ ນຶ່ງລ້ານຄົນພ້ອມ.”
ອົງການ OPM ກ່າວເມື່ອອາທິດແລ້ວນີ້ ວ່າ ມີຈຳນວນພະນັກງານທັງ ໃນປັດຈຸບັນ ແລະ
ອະດີດ ຫຼາຍເຖິງ 4 ລ້ານຄົນ ອາດໄດ້ຮັບຜົນກະທົບ ຈາກການເຈາະຂໍ້ມູນ ເມື່ອເດືອນ
ທັນວາ ຊຶ່ງເປັນເຫດການຮົ່ວໄຫລ ຂອງຂໍ້ມູນພະນັກງານລັດຖະບານ ທີ່ຮ້າຍແຮງສຸດ
ໃນຮອບຫຼາຍໆປີ.
