ກຸ່ມສິ້ງຊອມສິດທິມະນຸດກຸ່ມນຶ່ງ ກ່າວວ່າ ພວກຫົວຮຸນແຮງ
ອິສລາມ ໄດ້ເຂົ້າຄວບຄຸມສ່ວນໃຫຍ່ ຂອງສູນອົບພະຍົບ
ຂອງຊາວປາແລສໄຕນ໌ ຢູ່ເຂດຊານນະຄອນຫລວງ
Damascus ຂອງຊີເຣຍ.
ກຸ່ມສິ້ງຊອມສິດທິມະນຸດຊີເຣຍ ຫຼື Syrian Observatory for
Human Rights ກ່າວໃນວັນເສົາວານນີ້ ວ່າ ພວກນັກຕໍ່ສູ້ ຈາກ
ລັດອິສລາມ ແລະ ພວກແນວໂຮມ al-Nusra ຊຶ່ງເປັນເຄືອຂ່າຍ
ຂອງ al-Qaida ໃນຊີເຣຍໄດ້ຄວບຄຸມເນື້ອທີ່ປະມານ 90 ເປີເຊັນ
ຂອງ ສູນອົບພະຍົບ Yarmouk. ທັງສອງກຸ່ມດັ່ງກ່າວ ໄດ້ທຳການຕໍ່ສູ້ຮ່ວມກັນ ຕ້ານພວກກະບົດອື່ນໆ ລວມທັງພວກທະຫານບ້ານຊາວຊີເຣຍ ແລະ ຊາວປາແລສໄຕນ໌ ທີ່ຕໍ່ຕ້ານລັດຖະບານຊີເຣຍ.
ນອກຈາກ ການປະທະກັນທາງພາກພື້ນດິນຫຼາຍໆບັ້ນແລ້ວ ບັນດາ ເຈົ້າໜ້າທີ່ອົງການ
ສະຫະປະຊາຊາດ ກ່າວວ່າ ຄ້າຍດັ່ງກ່າວຍັງໄດ້ຖືກກອງກຳລັງຊີເຣຍ ໂຈມຕີດ້ວຍປືນໃຫຍ່. ຄວາມຮຸນແຮງໃນຊ່ວງອາທິດຜ່ານມາ ໄດ້ເຮັດໃຫ້ພົນລະເຮືອນ ປະມານ 18,000 ຄົນ ລວມທັງ ພວກເດັກນ້ອຍຫຼາຍໆຄົນ ທີ່ອາໄສຢູ່ສູນອົບພະຍົບນັ້ນ ຕົກຄ້າງ ຢູ່ໃນສູນ.
ໃນວັນເສົາວານນີ້ ສະຫະລັດ ໄດ້ປະນາມການໂຈມຕີຕໍ່ສູນອົບພະຍົບ Yarmouk ນັ້ນ
ແລະ ກ່າວວ່າ ການກະທຳດັ່ງກ່າວຂອງກຸ່ມລັດອິສລາມ ແລະ ພັນທະມິດຂອງພວກເຂົາ ແມ່ນເປັນ “ອັນຕະລາຍຢ່າງຮ້າຍແຮງ” ຕໍ່ພົນລະເຮືອນ ທີ່ໄດ້ດຳລົງຊີວິດພາຍໃຕ້ການປິດລ້ອມ ເປັນເວລາ 2 ປີ ມາແລ້ວ ໂດຍໄດ້ຖືກກີດກັນ ບໍ່ໃຫ້ໄດ້ຮັບສະບຽງອາຫານ ອຸປະ
ກອນທາງການແພດ ແລະ ສິ່ງຈຳເປັນຕ່າງໆທີ່ມີຄວາມຕ້ອງການຫຼາຍທີ່ສຸດ.