ທູດພິເສດດ້ານສິດທິມະນຸດຄົນນຶ່ງຂອງສະຫະປະຊາຊາດ ກຳລັງຮຽກຮ້ອງໃຫ້ ລັດຖະ ບານມຽນມາຍຸດຕິໃນອັນທີ່ທ່ານນາງຮ້ອງວ່າ “ການຈຳແນກກີດກັນທາງ ສະຖາບັນ” ຕໍ່ຊາວມຸສລິມ ເປັນບູລິມະສິດອັນຮີບດ່ວນ.
ທູດພິເສດ Yanghee Lee ທີ່ສິ້ນສຸດການປະຕິບັດງານເປັນເວລາສອງອາທິດຢູ່ໃນປະເທດມຽນມາ ໄດ້ກ່າວຕໍ່ບັນດານັກຂ່າວ ໃນວັນສຸກວານນີ້ວ່າ “ການຈຳ ກັດຮັດແຄບໃນທຳ ນອງນີ້ ເປັນຜົນກະທົບຢ່າງຮ້າຍແຮງຕໍ່ທຸກໆດ້ານຂອງການດຳລົງຊີວິດ ຮວມທັງການໄດ້ຮັບການບໍລິການພື້ນຖານ ແລະຊີວິດການເປັນຢູ່.”
ທ່ານນາງ Lee ກ່າວວ່າ “ມັນຈະແຈ້ງທີ່ວ່າຄວາມເຄັ່ງຕືງທາງສາສະໜາຍັງມີຢູ່ຢ່າງແຜ່ ກວ້າງ ໃນທົ່ວສັງຄົມມຽນມາ. ເຫດຮ້າຍໃນການໃຊ້ຄຳເວົ້າກຽດຊັງ ການຍຸແຫຍ່ໃຫ້ເກີດການຈຳແນກກີດກັນ ຄວາມກຽດຊັງ ແລະຄວາມຮຸນແຮງ ຕະ ຫລອດທັງການບໍ່ໂຍະຍານຜ່ອນຜັນທາງດ້ານສາສະໜາ ຍັງສືບຕໍ່ເປັນສາເຫດທີ່ພາໃຫ້ເກີດຄວາມເປັນຫ່ວງ.”
ທ່ານນາງກ່າວວ່າ ລັດຖະບານຍັງລັ່ງເລໃຈທີ່ຈະປາບປາມບັນດາຜູ້ກະທຳຜິດ ໃນການກໍ່ຄວາມຮຸນແຮງທາງສາສະໜາ ຍ້ອນມີຄວາມຢ້ານກົວວ່າ ມັນອາດຈະນຳໄປສູ່ການເກີດຄວາມເຄັ່ງຄືງເພີ້ມຂຶ້ນ ອັນເປັນກາສົ່ງສັນຍານທີ່ຜິດພາດ.
ທ່ານນາງ Lee ຍັງໄດ້ຕິຕຽນສະພາບການຢູ່ໃນສູນຕ່າງໆ ສຳລັບຊາວມຸສລິມ ໂຣຮິງຢາ ທີ່ບໍ່ມີທີ່ຢູ່ອາໄສ. ທ່ານນາງໄດ້ຮຽກຮ້ອງໃຫ້ບັນດາເຈົ້າໜ້າທີ່ຜ່ອນຜັນການຈຳກັດຮັດແຄບ ກ່ຽວກັບສິດເສລີພາບໃນການເຄື່ອນຍ້າຍໄປມາຂອງເຂົາເຈົ້າ ຊຶ່ງເຮັດໃຫ້ເປັນການຍາກລຳບາກສຳລັບເຂົາເຈົ້າໃນການຊອກຫາວຽກເຮັດງານທຳ.
ພັກສັນນິບາດແຫ່ງຊາດເພື່ອປະຊາທິປະໄຕ ທີ່ນຳພາໂດຍຜູ້ທີ່ໄດ້ຮັບລາງວັນໂນແບລຂະ ແໜງສັນຕິພາບ ທ່ານນາງ Aung San Suu Kyi ໄດ້ກຳອຳນາດໃນມຽນມາເມື່ອເດືອນ ມີນາ ຫລັງຈາກ 50 ປີຂອງການປົກຄອງຂອງພວກທະຫານ.
ແຕ່ວ່າ ຄວາມກຽດຊັງແລະບໍ່ເຊື່ອໃຈລະຫວ່າງຊາວພຸດທີ່ເປັນຊົນກຸ່ມໃຫຍ່ ແລະ ບັນດາສາສະໜາກຸ່ມນ້ອຍ ໂດຍສະເພາະຊາວມຸສລິມ ໄດ້ມີມາເປັນເວລາຫລາຍປີແລ້ວ ແລະມັກຈະຝົດເດືອດກາຍເປັນຄວາມຮຸນແຮງ.
ກຸ່ມຫົວຮຸນແຮງສາສະໜາພຸດໄດ້ຈູດເຜົາວັດມຸສລິມ ໂຈມຕີພວກທີ່ນັບຖື ແລະຍຶດເອົາຊັບສົມບັດຕ່າງຂອງສາສະໜາດັ່ງກ່າວ.