ລິ້ງ ສຳຫລັບເຂົ້າຫາ

ສປຊ ລາຍງານວ່າ ການຜະລິດ ຝິ່ນ ໃນອັຟການິສຖານ ຫຼຸດລົງ 48 ເປີເຊັນ


ໃນພາບຖ່າຍເມື່ອ ວັນທີ 10 ພຶດສະພາ 2013, ພວກກະເສດຕະກອນ ອັຟການິສຖານ ເກັບກ່ຽວ ຝິ່ນດິບ ໃນຂະນະທີ່ ທຳງານໃນສວນຝິ່ນ ຢູ່ເຂດ Khogyani ຂອງເມືອງ Jalalabad ທາງພາກຕາເວັນອອກ ຂອງນະຄອນຫຼວງກາບູລ, ປະເທດອັຟການິສຖານ.

ຫ້ອງການຄວບຄຸມຢາ​ເສບ​ຕິດ ​ແລະ ອາ​ຊະ​ຍາ​ກຳ ຂອງອົງການ​
ສະຫະ​ປະຊາ​ຊາດ ຫຼື UNODC ​ໄດ້​ລາຍ​ງານ ​ໃນ​ວັນ​ພຸດ​ມື້​ນີ້
ວ່າ ຈຳນວນ​ຂອງ​ຝິ່ນ ທີ່​ໄດ້​ຜະລິດ ຢູ່​ໃນ​ອັຟກາ​ນິສຖານ ​ໃນ​ປີ​ນີ້
ໄດ້ຫລຸດ​ລົງ​ 48 ​ເປີ​ເຊັນ.

ທ່ານ Andrey Avetisyan ຜູ້ຕາງໜ້າ​ປະຈຳ​ຂົງ​ເຂດ ຂອງ
ອົງການ UNODC ​ໄດ້​ກ່າວຖະ​ແຫລ​ງຕໍ່​ບັນດາ​ນັກ​ຂ່າວ ຢູ່​ໃນ
ນະຄອນຫຼວງກາ​ບູລ ​ໃນ​ຂະນະ​ທີ່ ​ເປີດ​ເຜີຍ​ການ​ຄົ້ນພົບ ໃນ
​ການສຳຫຼວດຝິ່ນ ຂອງ​ອັຟກາ​ນິສຖານຄັ້ງຫຼ້າສຸດ ໂດຍ​ເວົ້າ​ວ່າ
“ພວກ​ເຮົາພົບວ່າ ມີການຜະລິດຝິ່ນ 3,300 ​ໂຕນ ​ໃນ​ປີ​ນີ້
​ເມື່ອ​ປຽບທຽບ​ໃສ່ 6,400 ​ໂຕນ ໃນ​ປີ​ກາຍ​ນີ້.”

ອົງການ UNODC ​ໄດ້​ໃຫ້​ເຫດຜົນ​ກ່ຽວກັບ​ການ​ຫລຸດລົງ ​ຢ່າງຫຼວງຫຼາຍນັ້ນວ່າ ​ເປັນ
ຍ້ອນ​ການ​ຮ່ວມ​ມື ທີ່​ດີ​ຂຶ້ນ ລະຫວ່າງ ອົງການພິທັກ​ກົດໝາຍ​ຕ່າງໆ ​ແລະບັນດາ​ເຈົ້າໜ້າ​ທີ່
ຜູ້ອອກ​ນະ​ໂຍບາຍ​ອັຟກາ​ນິສ ຖານ​. ການ​ຫລຸດ​ລົງ ​ແມ່ນ​ມີ​ຄວາມ​ສຳຄັນ​ ຫລັງ​ຈາກຫຼາຍປີ
ທີ່​ມີ​ການ​ເພີ້​ມຂຶ້ນ ຢ່າງ​ຕໍ່​ເນື່ອງ ​ໃນ​ການ​ປູກຝັງ ​ແລະ ການ​ຜະລິດຝິ່ນ​ໃນ​ປະ​ເທດດັ່ງກ່າວ.

ທ່ານ Avetisyan ​ໄດ້​ກ່າວ​ຕື່ມ​ອີກ​ວ່າ ການ​ປູກຝັງ​ຝິ່ນ ​ໃນ​ປີ 2015 ຍັງ​ໄດ້​ຫລຸດ​ລົງ ​ໃນ​
ອັດຕາສະ​ເລ່ຍ 19 ​ເປີ​ເຊັນ ທົ່ວ​ປະ​ເທດ ​ແຕ່​ຫາກ​ວ່າ ມັນ​ໄດ້​ເພີ້​ມຂຶ້ນ ຢູ່​ທາງ​ພາກ​ເໜືອ​
ຂອງ​ອັຟກາ​ນິສຖານ ​ເພາະ​ເປັນ ຍ້ອນ​ສະພາບຄວາມ​ໝັ້ນຄົງ​ ຢູ່​ໃນ​ບໍລິ​ເວນດັ່ງກ່າວ
ຊຸດໂຊມລົງ.

​ແຂວງ Helmand ຍັງ​ຄົງ​ເປັນ​ເຂດ​ທີ່​ຜະລິດຝິ່ນໃຫຍ່​ທີ່​ສຸດ ​ແຕ່ກໍ​ໄດ້​ ​ຫລຸດ​ລົງຢ່າງເປັນ
ປະຫວັດການ ​ໃນ​ອັດຕາສະ​ເລ່ຍ 16 ​ເປີ​ເຊັນ ນັບ​ແຕ່​ປີ​ກາຍ​ນີ້​ເປັນ​ຕົ້ນ​ມາ. ຍັງ​ມີ ການ​
ຫລຸດ​ລົງ ຢູ່​ໃນ​ແ​ຂວງ Kandahar Kapisa, Zabul, Farah, Nimoroz, Herat,
Nangarhar, Laghman ​ແລະ Badkhashan ອີກດ້ວຍ.

ທ່ານ Avetisyan ​ໄດ້​ເນັ້ນວ່າ ບັນຫາຢາ​ເສບ​ຕິດ​ຂອງອັຟການິສຖານ ຍັງ​ຄົງ​ເປັນບັນຫາ
ທີ່ໃຫຍ່​ຢູ່ ​ແລະ ຜົນສຳ​ເລັດ​ໃນ​ການ​ຕໍ່ຕ້ານ​ມັນ​ນັ້ນ ສາມາດ​ບັນລຸ​ໄດ້ ພຽງ​ຢ່າງ​ດຽວ ​ດ້ວຍ​
ການ​ຮ່ວມ​ມື​ກັນ​ຢ່າງ​ໃກ້​ຊິດ ລະຫວ່າງ ລັດຖະບານ ​ແລະ ປະຊາຄົມນາໆ​ຊາດ.

XS
SM
MD
LG