ຢູເຄຣນ ຕັ້ງໃຈທີ່ຈະສືບຕໍ່ດຳເດີນການໂຄສະນາເພື່ອຖອນບໍ່ໃຫ້ ຣັດເຊຍ ມີອຳນາດໃນການ ໃຊ້ສິດຍັບຢັ້ງ ຢູ່ໃນສະພາຄວາມໝັ້ນຄົງ ສະຫະປະຊາຊາດ, ເວລາສະມັດຊາໃຫຍ່ ສະຫະປະຊາຊາດ ເປີດກອງປະຊຸມປະຈຳປີ ແລະ ການອະພິປາຍໃນທ້າຍເດືອນນີ້.
ລັດຖະສະພາ Verkhovna Rada ຂອງ ຢູເຣນ, ໄດ້ລົງຄະແນນສຽງຢ່າງເປັນເອກະສັນ ໃນວັນພຸດວານນີ້ ສະໜັບສະໜູນການ
ລິເລີ່ມ ຂອງສາກົນ ເພື່ອປ້ອງກັນການໃຊ້ສິດຍັບຢັ້ງເພື່ອກີດກັ້ນຮ່າງຍັດຕິແລະການ ດຳເນີນການຂອງສະພາຄວາມໝັ້ນຄົງ ໃນກໍລະນີທີ່ “ຄວາມຂັດແຍ້ງບໍ່ສາມາດປ່ຽນແປງໄດ້.”
ເຈົ້າໜ້າທີ່ ຢູເຄຣນ ໄດ້ກ່າວວ່າ ພວກເຂົາເຈົ້າແລເຫັນມຸມມອງ ໃນຂໍ້ຈຳກັດຂອງການໃຊ້ສິດຍັບຢັ້ງໃນສະພາຄວາມໝັ້ນຄົງ ຈະຫຼຸດລົງຢ່າງເປັນຄ່ອຍເປັນຄ່ອຍໄປ, ແລະ ໃນທີ່ສຸດກໍຈະລົບລ້າງອຳນາດທັງໝົດຂອງແຕ່ລະປະເທດ ໃນການກີດກັ້ນການລົງຄະແນນສຽງ.
ເອກອັກຄະລັດຖະທູດ ຢູເຄຣນ ປະຈຳສະຫະປະຊາຊາດ ທ່ານ Yuriy Sergeyev, ໄດ້ຂຽນຂໍ້ຄວາມລົງໃນ Twitter ເມື່ອວັນອັງຄານທີ່ຜ່ານມານີ້ວ່າ ສະມາຊິກຂອງສະມັດຊາໃຫຍ່ 67 ຈາກ 193 ປະເທດ ໄດ້ຊີ້ໃຫ້ເຫັນວ່າ ພວກເຂົາສະໜັບສະໜູນຕໍ່ການເຄື່ອນໄຫວດັ່ງກ່າວ. ແຕ່ວ່າ ຣັດເຊຍ ບໍ່ໄດ້ໃຫ້ຄວາມສຳຄັນຕໍ່ໍ່ຂໍ້ສະເໜີຂອງ ຢູເຄຣນ.
ເຖິງແມ່ນວ່າຂໍ້ສະເໜີຂອງ ຢູເຄຣນ ເພື່ອປະຕິຮູບຂັ້ນຕອນຂອງສະພາ ຄວາມໝັ້ນຄົງຈະຖືກ ນຳໃຊ້ກັບສະມາຊິກຖາວອນທັງໝົດ 5 ປະເທດກໍຕາມ, ແຕ່ມັນມີເປົ້າໝາຍແນໃສ່ ຣັດເຊຍ ໂດຍສະເພາະ, ເຊິ່ງໄດ້ໃຊ້ສິດຍັບຢັ້ງຂອງພວກເຂົາ 6 ເດືອນທີ່ຜ່ານມາ ເພື່ອກີດກັ້ນການລົງ ມະຕິດຂອງສະພາຄວາມໝັ້ນຄົງ ໃນການສະໜັບສະໜູນການກ່າວຫາ ຂອງ ຢູເຄຣນ ວ່າ ມອສໂກ ມີຄວາມຜິດກ່ຽວກັບ “ການຮຸກຮານທາງທະຫານ” ຕໍ່ ຢູເຄຣນ. Kyiv ໄດ້ກ່າວ ປະນາມ ການສະໜັບສະໜູນ ຂອງ ຣັດເຊຍ ຕໍ່ພວກແບ່ງແຍກດິນແດນ ທີ່ພວມຕໍ່ສູ້ ເພື່ອແຍກໂຕອອກຈາກ ຢູເຄຣນ ແລະ ການຍຶດເອົາແຫຼມ Crimea ເຊິ່ງເຄີຍເປັນສ່ວນໜຶ່ງຂອງ
ຢູເຄຣນ ນັ້ນ ເຂົ້າເປັນດິນແດນຂອງພວກເຂົາ.
