ລິ້ງ ສຳຫລັບເຂົ້າຫາ

ສະພາ ຢູ​ເຄຣນ ​ຍົກ​ເລີກ​ ກົດໝາຍ​ ທີ່ຈຳກັດ ການ​ປະ​ທ້ວງ​ (ວີດີໂອ/ສະໄລດ໌)


ສະພາ​ແຫ່ງ​ຊາດ​ຢູ​ເຄຣນ​ໄດ້​ຍົກ​ເລີກ​ກົດໝາຍ​ທີ່​ເປັນ​ຂໍ້​ຂັດ​ແຍ້​ງ
ກັນ​ຊຸດ​ນຶ່ງ ທີ່​ຈໍາກັດ​ຮັດ​ແຄບ ການ​ປະ​ທ້ວງ​ໃນ​ທີ່​ສາທາລະນະ​
ນັ້ນ ​ໃນ​ຂະນະ​ທີ່ ນາຍົກລັດຖະມົນຕີຢູ​ເຄຣນ ທ່ານ Mykola
Azarov ​ໄດ້ສະ​ເໜີທີ່​ຈະລາ​ອອກ​ ​ໃນ​ອັນ​ທີ່​ລັດຖະບານ​ເອີ້ນ​ວ່າ
​ເປັນຄວາມ​ພະຍາຍາມເພື່ອ ຊຸກຍູ້ໃຫ້ມີການປະ​ນີປະນອມທາງ
​ການ​ເມືອງ.

ເວັບໄຊ້ຂອງລັດຖະບານ​ຢູ​ເຄຣນ ໄດ້ປະກາດຂ່າວດັ່ງກ່າວ
ໃນວັນອັງຄານມື້ນີ້ ​ໂດຍໄດ້ພິມເຜີຍແຜ່ຖະແຫຼງການຂອງທ່ານ
Azarov ທີ່ກ່າວວ່າ ທ່ານຢາກຊຸກຍູ້ໃຫ້ມີ “ການປະ​ນີ ປະນອມ
ກັນທາງສັງຄົມແລະການເມືອງ”
ຫຼັງຈາກໄດ້ມີການປະທ້ວງ
ມາເປັນເວລາ 2 ເດືອນ ຊຶ່ງເມື່ອຫວ່າງມໍ່ໆມານີ້ ໄດ້ເກີດການປະທະກັນ ຢ່າງຮຸນແຮງ
ລະຫວ່າງພວກປະທ້ວງແລະຕໍາຫຼວດ.

ທ່ານກ່າວວ່າ ທ່ານຫວັງວ່າ ການລາອອກຂອງທ່ານ ຊຶ່ງຍັງຈະຕ້ອງໄດ້ຮັບການອະນຸມັດ
ຈາກປະທານາທິບໍດີ Viktor Yanukovych ເສຍກ່ອນນັ້ນ ຈະເປີດໂອກາດໃຫ້ມີການ
ແກ້ໄຂຢ່າງ ສັນຕິ ຕໍ່ວິກິດການທາງດ້ານການເມືອງ ຂອງປະເທດໄດ້.

ຫລາຍໆ​ຊົ່ວ​ໂມງ​ຕໍ່​ມາ ສະພາ​ແຫ່ງ​ຊາດ​ກໍ​ໄດ້ລົງມະຕິ​ເຫັນ​ດີ​ໃຫ້ຍົກເລີກ ກົດໝາຍຕໍ່ຕ້ານ
ການປະທ້ວງ ທີ່ໄດ້ກໍ່ໃຫ້ເກີດການປະທ້ວງຕໍ່ຕ້ານລັດຖະບານຢ່າງຮຸນແຮງຈຳນວນນຶ່ງ
ຢູ່ນະຄອນ ຫລວງ Kyiv ແລະບ່ອນອື່ນໆນໍາ. ແຕ່ປະທານາທິບໍດີ Yanukovych ກ່າວ​ວ່າ
ການນິລະ ໂທດກໍາ​ໃຫ້ແກ່ພວກປະທ້ວງ ຫລາຍ​ສິບ​ຄົນ ທີ່ຖືກຈັບ​ຢູ່​ບ່ອນ​ຊຸມນຸມ​ປະ​ທ້ວງ​ນັ້ນ
ຈະ​ມີ​ຂຶ້ນ​ໄດ້ ກໍ​ຕໍ່​ເມື່ອພວກປະທ້ວງພາກັນ​ເອົາ ​ສິ່ງ​ກີດຂວາງ​ຕ່າງໆທີ່​ເຂົາ​ເຈົ້າ​ຕັ້ງ​ຂຶ້ນ​ນັ້ນ​ລົງ
​ແລະ​ອອກ​ໄປ​ຈາກ​ຖະໜົນ​ຫົນທາງ.


ປະທານາທິບໍດີ Yanukovych ​ໄດ້​ປະກາດ​ໃນ​ວັນ​ຈັນ​ວານ​ນີ້​ວ່າ ທ່ານ​ໄດ້​ຕົກລົງ​ທີ່​ຈະ​ຍົກ
ເລີກ​ພວກ​ກົດໝາຍ​ຕໍ່​ຕ້ານ​ການ​ປະ​ທ້ວງ​ນັ້ນ ຫລັງ​ຈາກ​ໄດ້​ພົບ​ປະ​ກັບ​ບັນດາ​ຜູ້ນໍາ​ຝ່າຍ​ຄ້ານ.

ພວກ​ປະ​ທ້ວງ ​ໄດ້ພາກັນອອກຈາກຕຶກໂຮງການກະຊວງຍຸຕິທໍາ ທີ່ພວກເຂົາເຈົ້າໄດ້ເຂົ້າຍຶດ
ໃນຄືນແລ້ວນີ້ ແຕ່ກໍໄດ້ໃຫ້ຄໍາໝັ້ນສັນຍາວ່າ ພວກຕົນຈະກັບຄືນມາອີກ ຖ້າຫາກວ່າ ບໍ່ມີ
ຄວາມກ້າວໜ້າເກີດຂຶ້ນ ໃນການຍຸຕິການປະເຊີນໜ້າກັນກັບທາງລັດຖະບານນັ້ນ.

​ ຜູ້ນໍາ​ຝ່າຍ​ຄ້ານທ່ານ Arseniy Yatsenyuk ໄດ້ປະຕິເສດຢ່າງເປັນທາງການຕໍ່ຂໍ້ສະເໜີ
ຂອງປະທານາທິບໍດີ Yanukovych ທີ່ຈະແຕ່ງຕັ້ງໃຫ້ທ່ານເປັນນາຍົກລົດຖະມົນຕີ ແຕ່ຍັງ
ບໍ່ທັນເປັນທີ່ຈະແຈ້ງເທື່ອວ່າ ຂໍ້ສະເໜີຫຼ້າສຸດຂອງທ່ານ ທີ່ຈະຍົກເລີກ ​ກົດໝາຍຕໍ່ຕ້ານ
ການປະທ້ວງນັ້ນ ຈະໄດ້ຮັບການຕອບຮັບແບບໃດ.

XS
SM
MD
LG