ປະທານາທິບໍດີ ຢູເຄຣນ ທ່ານ Petro Poroshenko ກ່າວໃນ
ວັນສຸກວານນີ້ວ່າ ທ່ານມີຄວາມຫວັງໄປໃນແງ່ດີ ຫລັງຈາກການ
ເຈລະຈາ ທີ່ນະຄອນຫລວງປາຣີ ກັບບັນດາຜູ້ນຳຣັດເຊຍ ຝຣັ່ງ
ແລະເຢຣະມັນ ເພື່ອຮື້ຟື້ນຂັ້ນຕອນສັນຕິພາບ ໃນພາກຕາເວັນ
ອອກຂອງຢູເຄຣນ.
ທ່ານ Poroshenko ໄດ້ພົບປະ ກັບປະທານາທິບໍດີຣັດເຊຍ
ທ່ານ Vladimir Putin ປະທານາທິບໍດີຝຣັ່ງ ທ່ານ Francois
Hollande ແລະນາຍົກລັດຖະ ມົນຕີເຢຍຣະມັນທ່ານນາງ
Angela Merkel ໃນກອງປະຊຸມສຸດຍອດທີ່ມີການ ລໍຖ້າມາ
ດົນນານແລ້ວນັ້ນທີ່ນະຄອນຫລວງປາຣີ. ນີ້ເປັນການປະຊຸມ
ເທຶ່ອທຳອິດ ນັບແຕ່ບັນດາຜູ້ນຳ ໄດ້ບັນລຸຂໍ້ຕົກລົງສັນຕິພາບ ທີ່ນະຄອນ Minsk ໃນເດືອນກຸມພາທີ່ຜ່ານມາ.
ຂໍ້ຕົກລົງດັ່ງກ່າວໄດ້ປະສົບກັບບັນຫາ ແຕ່ວ່າໄດ້ມີຮ່ອງຮອຍຂອງຄວາມຄືບໜ້າຫວ່າງບໍ່
ເທົ່າໃດອາທິດທີ່ຜ່ານມານີ້ ຮວມທັງການຕົກລົງທີ່ມີຄວາມຄືບໜ້າໃນອາທິດນີ້ ກ່ຽວກັບ
ການຖອນລົດຖັງແລະອາວຸດຍຸດໂທປະກອນຕ່າງໆອອກຈາກເຂດແນວໜ້າ.
ຫລັງຈາກການປະຊຸມກັນແລ້ວ ທ່ານ Poroshenko ກ່າວວ່າ ຝ່າຍລັດຖະບານຈະເລີ້ມ
ຖອຍຄືນໃນວັນເສົາມື້ນີ້ ອີງຕາມອົງການຂ່າວຂອງຣັດເຊຍ.
ໂຄສົກຂອງປະທານາທິບໍດີຣັດເຊຍ ທ່ານ Vladimir Putin ໃນເວລາຕໍ່ມາໄດ້ກ່າວຊົມ
ເຊີຍການເລີ້ມຖອນອາວຸດນີ້ວ່າ ເປັນ “ການເຄື່ອນໄຫວໃນທາງບວກ.”
ການເລືອກຕັ້ງທ້ອງຖິ່ນທີ່ມີແຜນຈະຈັດຂຶ້ນໃນເດືອນນີ້ ຢູ່ໃນເຂດພາຍໃຕ້ການຄວບຄຸມ
ຂອງພວກກະບົດແບ່ງແຍກດິນແດນ ທີ່ສະໜັບສະໜູນຣັດເຊຍຈະໄດ້ຖືກເລື່ອນອອກ
ໄປຢ່າງນ້ອຍສາມເດືອນ.
ທ່ານ Hollande ກ່າວວ່າ “ພວກເຮົາບໍ່ຕ້ອງການໆເລືອກຕັ້ງ ມີຂື້ນຢູ່ພາກຕາເວັນອອກ
ຂອງຢູເຄຣນ ທີ່ບໍ່ໃຫ້ການນັບຖື ຕໍ່ຂໍ້ຕົກລົງນະຄອນ Minsk” ທ່ານ ກ່າວອີກວ່າ ມີຄວາມ
ຕ້ອງການ "ເວລາເພື່ອຮ່າງກົດໝາຍ ແລະກົດໝາຍການເລືອກຕັ້ງ ທີ່ສອດຄ່ອງຢ່າງ
ສົມບູນ ກັບມາດຕະຖານຂອງສາກົນ.”
