ລິ້ງ ສຳຫລັບເຂົ້າຫາ

ບັນຫາຢູເຄຣນ ສ້າງຄວາມກັງວົນ ໃນການເດີນທາງໄປເອເຊຍ ຂອງ ປ.ໂອບາມາ (ວີ​ດີ​ໂອ ພາສາລາວ/ອັງກິດ)


ການເດີນທາງໄປເອເຊຍ ຂອງປະທານາທິບໍດີ Barack
Obama ໃນອາທິດນີ້ ​ແມ່ນມີຂຶ້ນ ​ໃນ​ທ່າມກາງຄວາມກັງ
ວົນທີ່ເພີ້​ມທະວີ​ຂຶ້ນກ່ຽວ​ກັບ​ຄວາມ​ທະ​ເຍີ​ທະຍານ ຢາກ​ໄດ້
ດິນແດນຂອງປັກກິ່ງ. ຄວາມກັງວົນເຫລົ່ານັ້ນໄດ້ທະວີຂຶ້ນ
ຍ້ອນການກະທຳ​ເມື່ອ​ໄວໆ​ມາ​ນີ້ຂອງຣັດເຊຍຢູ່ໃນຢູເຄຣນ
ແລະຄວາ​ມ​ອາດ​ສາມາດເປັນ​ໄປ​ໄດ້ ທີ່​ວ່າ ນັກຍຸດທະສາດ
ຈີນທັງຫຼາຍ ອາດກຳລັງ​ມອງ​ເຫັນໄຄຣເມຍ ວ່າ ເປັນແບບ
ຢ່າງສຳລັບການຂັດແຍ້ງ​ເລື້ອງ​ດິນແດນຂອງ​ຕົນ ກັບບັນດາ
ປະເທດ​ເພື່ອນ​ບ້ານ. ຜູ້ສື່ຂ່າວວີໂອເອ Bill Ide ມີລາຍງານ
ຈາກປັກກິ່ງ ຊຶ່ງໄຊຈະເຣີນສຸກ ຈະນຳມາສະເໜີທ່ານໃນອັນ
ດັບຕໍ່ໄປ.

ເບິ່ງວີດີໂອ ພາສາລາວ ກ່ຽວກັບລາຍງານນີ້:

ຢູເຄຣນນັ້ນ ອາດຈະ​ເບິ່ງ​ຄື​ວ່າ ຢູ່​ຫ່າງ​ໄກຫຼາຍ ຈາກເຫດການທີ່ກຳລັງ ຜັນ​ຂະ​ຫຍາຍ
ອອກ ຢູ່ໃນຂົງເຂດນຶ່ງທີ່ມີການປ່ຽນແປງຫຼາຍທີ່ສຸດໃນໂລກ ກໍ​ຄື​ຂົງ​ເຂ​ດ​ເອ​ເຊຍ​ນັ້ນ
ແຕ່​ເປັນ​ທີ່ຊັດເຈນວ່າ ຢູເຄຣນຍັງຢູ່ໃນ ຈິດໃຈຂອງບັນດາເຈົ້າໜ້າທີ່ສະຫະລັດ.

ຜູ້ບັນຊາການກອງທັບເຮືອສະຫະລັດ ປະຈຳເຂດມະຫາ​ສະມຸດປາຊິຟິກ ໄດ້ຕັກເຕືອນ
​ເຖິງ​ຄວາມ​ຈຳ​ເປັນ​ທີ່​ຈະ​ຕ້ອງຫຼີກເວັ້ນ ສະຖານະການ ແບບໄຄຣເມຍ ຢູ່ໃນຂົງ​ເຂດ​
ປາຊິຟິກນັ້ນ ​ແລະເຈົ້າໜ້າທີ່ຂັ້ນສູງທ່ານ​ນຶ່ງ ຂອງກະຊວງການຕ່າງປະເທດສະຫະລັດ ກໍ​ໄດ້ກ່າວຕໍ່ບັນດາສະມາຊິກລັດຖະສະພາ ​ເມື່ອ​ຕົ້ນເດືອນນີ້ວ່າ ການລົງໂທດທີ່ຣັດເຊຍ
ຜະເຊີນໜ້າຢູ່ນັ້ນ ຄວນມີ​ຜົນ​ສ້າງ​ຄວາມ​ຢ້ານກົວ ​ໃຫ້​ແກ່ຜູ້ໃດກໍ​ຕາມຢູ່​ໃນ​ປະ​ເທດຈີນ
ທີ່ອາດ​ກຳລັງ​ພິຈາລະນາຢາກຈະ ເອົາການປະຕິບັດຂອງມົສກູ ມາເປັນແບບຢ່າງ.

ໃນຂະນະທີ່ ​ແສນ​ຍານຸພາບ​ທາງທະຫານ ແລະຄວາມໝັ້ນໃຈຂອງຈີນ ເພີ້ມທະວີຂຶ້ນນັ້ນ
ຈີນ​ກໍ​ພົບ​ວ່າ ຕົນ​ເອງ​ໄດ້ເຂົ້າໄປພົວພັນໃນຂໍ້ຂັດແຍ້ງ​ ເລື້ອງ​ດິນແດນຫຼາຍຂຶ້ນ ບໍ່​ວ່າ​ຈະ
ເປັນຂໍ້ຂັດແຍ້ງ​ເລື້ອງເກາະ ດອນ ໃນທະເລຈີນຕາເວັນອອກ ກັບຍີ່ປຸນ ຫຼື ກັບຟີລິປິນ
ແລະ ປະເທດອື່ນໆ ໃນ​ເຂດທະເລຈີນໃຕ້.

ນັກລັດຖະສາດການເມືອງ ຈາກມະຫາວິທະຍາ​ໄລ​ໂບດສາສະ​ໜາ Baptist ຢູ່ຮົງ​ກົງ
ທ່ານ Jean-Pierre Cabestan ກ່າວວ່າ ມີສິ່ງລໍ້ໃຈ ທີ່ເຫັນ​ໄດ້ຢ່າງຈະແຈ້ງ ສຳລັບ
ປັກກິ່ງ ທີ່ຈະພະຍາຍາມປັບ ປ່ຽນສະຖານະພາບ ທີ່​ເປັນ​ຢູ່​ໃນ​ປັດຈຸບັນ ແຕ່ທ່ານກໍກ່າວ
ວ່າ ມີ​ຄວາມແຕກຕ່າງກັນຢ່າງໃຫຍ່ຫຼວງ ລະຫວ່າງຂໍ້ຂັດແຍ້ງຂອງຈີນຢູ່ໃນເອເຊຍ ກັບ
ເຫດການທີ່ເກີດຂຶ້ນ ຢູ່ແຫຼມໄຄຣເມຍ.

ບັນດາ ປະເທດໃນຂົງເຂດເອເຊຍ ທີ່ທ່ານ ໂອບາມາ ຈະຢ້ຽມຢາມ.

ບັນດາ ປະເທດໃນຂົງເຂດເອເຊຍ ທີ່ທ່ານ ໂອບາມາ ຈະຢ້ຽມຢາມ.

ທ່ານ Cabestan ເວົ້າວ່າ:
“ປະການໜຶ່ງ ກໍ​ຄື​ທ່ານຮູ້ຫັ້ນ​ແຫຼະ ຍີ່ປຸນແມ່ນພັນທະ
ມິດຂ​ອງສະຫະລັດ ມີສົນທິສັນຍາດ້ານຄວາມໝັ້ນຄົງ
ລະຫວ່າງສອງປະເທດ ຊຶ່ງບັງຄັບໃຫ້ ສະຫະລັດຕ້ອງ
ເຂົ້າ​ໄປແຊກແຊງ. ຈີນກະຮູ້ດີ ຂ້າພະເຈົ້າຄິດວ່າ ຮູ້ດີ​
ຫຼາຍກ່ວາ​ເກົ່າ​ຊ້ຳ ​ໃນ​ເວລານີ້ ຍ້ອນລັດຖະບານ​ຂອງ​
ທ່ານໂອບາມາ ໄດ້ສົ່ງສັນຍານຫຼາຍໆຢ່າງ ທີ່ຈະແຈ້ງ ​
ໄປໃຫ້​ຈີນ ​ແລະ​ກໍ​ເປັນ​ສັນຍານ ທີ່ແຈ້ງ​ຂຶ້ນ​ເລື້ອຍໆ ​
ບອກ​ໃຫ້​ຮູ້ວ່າ ສະຫະລັດຈະເຂົ້າ​ໄປພົວພັນໃນທຸກໆ
ກໍລະນີທີ່ມີການໃຊ້ກຳລັງທະຫານຢູ່ໃນບໍລິເວນໝູ່
ເກາະ Senkaku ນັ້ນ.”


ຍີ່ປຸນ ຈະເປັນບ່ອນຢຸດ​ແວ່​ແຫ່ງທຳ​ອິດ ໃນການຢ້ຽມຢາມ 4 ປະເທດ ໃນຂົງເຂດນັ້ນ ຂອງປະທານາທິບໍດີ ໂອບາມາ ຊຶ່ງລວມທັງການຢ້ຽມຢາມ ເກົາຫຼີໃຕ້ ແລະອີກ 2 ປະເທດ
ໃນ​ເອເຊຍຕາເວັນອອກສຽງໃຕ້ ທີ່ມີຂໍ້ຂັດແຍ້ງກັບຈີນ ຢູ່ໃນເຂດທະເລຈີນໃຕ້ ກໍ​ຄື ຟີລິປິນກັບມາເລເຊຍ. ສະຫະລັດກ່າວວ່າ ຕົນບໍ່ເຂົ້າຂ້າງກັບ​ຝ່າຍໃດຝ່າຍນຶ່ງ ໃນ
ບັນຫາຂໍ້ຂັດແຍ້ງ​ເຫຼົ່ານັ້ນ ແຕ່ວ່າ ການທີ່ວໍຊິງຕັນ ພະຍາຍາມ ທີ່ຈະປັບຄວາມສົມດຸນ
ຄືນ​ໃໝ່ ຢູ່​ໃນ​ຂົງ​ເຂດ​ເອ​ເຊຍ ໂດຍການ​ເຂົ້າ​ໄປ​ມີໜ້າ​ທາງ​ທະຫານ ໃນຂົງເຂດນັ້ນ
ຫຼາຍຂຶ້ນ ໄດ້ເຮັດໃຫ້ຈີນເກີດຄວາມກັງວົນເຊັ່ນກັນ.

ນັກລັດຖະສາດການເມືອງ ຈາກ​ມະຫາວິທະຍາ​ໄລ ປັກ​ກິ່ງວ່າ​ດ້ວຍ ການສຶກສາ​ຕ່າງ
ປະ​ເທດ ທ່ານ Xie Tao ກ່າວວ່າ ປັກກິ່ງຈະຕິດຕາມ ເບິງຢ່າງໃກ້ຊິດວ່າ ທ່ານໂອບາມາ
ຈະເຮັດແນວໃດ ເພື່ອສ້າງຄວາມ ໝັ້ນໃຈໃຫ້ແກ່ພັນທະມິດທັງຫຼາຍ ໃນຂົງເຂດນັ້ນ ຄືວ່າ
ທ່ານຈະຫລິ້ນ​ບົດບາດ​ ຂອງຜູ້ສ້າງສັນຕິພາບ ດ້ວຍການສົ່ງເສີມ ສະຖຽນລະພາບຢູ່
ໃນຂົງເຂດ ຫຼື ຊຸກຍູ້​ສົ່ງ​ເສີມ​ແນ​ວຄິດ​ໃນ​ທາງລົບ ກ່ຽວ​ກັບຈີນ.

ທ່ານ XIE TAO ເວົ້າວ່າ:
“ຂ້າພະເຈົ້າຫວັງວ່າ ທ່ານໂອບາມາ ຈະ​ເຮັດ​ແນວ​ໃດ​ແນວ​ນຶ່ງ ​ເພື່ອ ລະງັບ
ຄວາມລະ​ແວງຂອງຈີນ ​ແລະວ່າ ທ່ານບໍ່ໄດ້ມາທີ່ນີ້ ເພື່ອທີ່ຈະ ຍັບ​ຍັ້ງຈີນ.


ມີບາງກຸ່ມໃນຈີນເຫັນວ່າ ການສ້າງ​ຄວາມ​ກ້ຳເກິ່ງ​ກັນ​ຄືນ​ໃໝ່ ​ໃນ​ເອ​ເຊຍ ຫຼືການ
“ຫັນ​ໄປ​ຍັງເອເຊຍ ກໍ​ຄື pivot to Asia” ຂອງສະຫະລັດ ຕາມທີ່ເອີ້ນກັນນັ້ນ
ເປັນຄວາມພະຍາຍາມ ເພື່ອ​ຍັບ​ຍັ້ງການ​ໂຜ່​ໂຕຂຶ້ນ​ມາ​ມີ​ອຳນາດຂອງຈີນ. ກຸ່ມດັ່ງກ່ວາ
ໂຕ້​ແຍ້​ງວ່າ ການກະທຳ​ຕ່າງໆ ຂອງວໍຊິງຕັນ ກຳລັງ​ເຮັດໃຫ້ພັນທະມິດ ທັງຫຼາຍ ໃນ
ຂົງເຂດນັ້ນ ມີ​ຄວາມ​ເກ່ງ​ກ້າ​ຂຶ້ນ ຊຶ່ງ​ເປັນ​ການເພີ້ມຄວາມເຄັ່ງຕຶງຂຶ້ນ.
XS
SM
MD
LG