ລິ້ງ ສຳຫລັບເຂົ້າຫາ

ສະຫະລັດມີແຜນການ ສ້າງຄວາມສົມດຸນ ດ້ານທະຫານໃໝ່ ຢູ່ໃນຂົງເຂດເອເຊຍ (ວີດີໂອ)

  • ທອງປານ ເທບວົງສາ

ລັດຖະມົນຕີປ້ອງກັນປະເທດສະຫະລັດ ທ່ານລີອອນ ພາແນັດຕາ (ກາງ) ກັບຄູ່ຕໍາແໜ່ງຈາກເອເຊຍ ທີ່ກອງປະຊຸມສຸດຍອດດ້ານຄວາມໝັ້ນຄົງ ແຫ່ງຂົງເຂດເອເຊຍ ຢູ່ສິງກະໂປ ເມື່ອເດືອນມິຖຸນາ 2012.

ສະຫະລັດ​ໄດ້​ປະກາດ​ອອກ​ໄປ​ເມື່ອ​ຕົ້ນ​ປີ​ນີ້​ວ່າ ຕົນ​ມີ​ແຜນການ​ຈະ​ຫັນປ່ຽນການເນັ້ນໜັກ ດ້ານ​ຄວາມ​ໝັ້ນຄົງ​ຂອງ​ຕົນ ​​ໄປໃສ່​ຂົງ​ເຂດ​ເອ​ເຊຍ. ​ແລະ​ໃນ​ຂະນະ​ທີ່​ຂັ້ນຕອນດັ່ງກ່າວ​ພວມ​ກ້າວ​​ໄປ​ຂ້າງ​ໜ້າຢູ່​ນັ້ນ ກະຊວງ​ປ້ອງ​ກັນ​ປະ​ເທດ​ສະຫະລັດ ຫຼືທໍານຽບຫ້າ​ແຈ ກໍ​ໄດ້​ເປີດ​ເຜີຍ​ໃຫ້​ຮູ້​ລາຍ​ລະອຽດ​ເພີ່ມຕື່ມ​ກ່ຽວ​ກັບ​ວ່າ​ຕົນ​ມີ​ແຜນການ​ຢ່າງ​ໃດ​ທີ່​ຈະ​ສັບ​ປ່ຽນ​ກໍາລັງ​ທະຫານ​ຂອງ​ຕົນ​ໄປ​ຍັງ​ຂົງ​ເຂດ ​ແລະ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ຄວາມ​ສໍາພັນ​ກັບ​ບັນດາພັນທະ​ມິດ​ ຂອງ​ຕົນ. ​ເລຶ່ອງ​ນີ້​ມັນ​ໄດ້​ກາຍ​ເປັນ​ທີ່​ແຈ້ງ​ຂາວ​ແລ້ວ​ວ່າ ການປັບ​ປ່ຽນເພື່ອສ້າງ​ຄວາມ​ສົມ​ດຸນ​ຄືນ​ໃໝ່ ດັ່ງ​ທີ່​ທໍານຽບຫ້າ​ແຈ​ມັກຈະ​ເອີ້ນ​ຄວາມ​ພະຍາ​ຍາມດັ່ງກ່າວ ມັນ​ກໍ​ຈະ​ເປັນການ​ປະຕິບັດ​​ການ ສ້າງ​ຄວາມ​ສົມ​ດຸນ​ກໍ​ວ່າ​ແມ່ນ. ຕາມ​ທີ່​ຜູ້​ສື່​ຂ່າວ​ວີ​ໂອ​ເອ William Ide ລາຍ​ງານ​ນັ້ນ​ ​ແມ່ນ​ວ່າ ​ໃນ​ຂະນະທີ່​ບາງ​ຄົນ​ຍິນ​ດີ​ນໍາ​ການ​ຕັດສິນ​ໃຈ​ຂອງ​ວໍ​ຊິງ​ຕັນ ທີ່​ຈະ​ຫັນ​ປ່ຽນ​ຄວາມ​ສົນ​ໃຈໄປ​ຍັງ​ຂົງ​ເຂດ​ເອ​ເຊຍຫຼາຍຂຶ້ນ​​ໄປ​ນັ້ນ ກໍ​ປ​ະກົດ​ວ່າ​​​ໄດ້​ຍິນຄວາມ​ວິຕົກ​ກັງວົນຈາກ​ປະ​ເທດ​ອື່ນໆ ໂຮມ​ທັງ​ຈີນ​ນັ້ນ​ນໍາ ຊຶ່ງ​ເປັນນຶ່ງ​ຂອງ​ບັນດາ​ປະ​ເທດ ມະຫາອໍານາດທີ່​ກໍາລັງ​ກອງທັບ​ພວມເຕີ​ບ​ໂຕ​ຂຶ້ນນັບມື້​ໃນ​ຂົງ​ເຂດ. ຊຶ່ງ​ທອງ​ປານ ມີ​ລາຍ​ລະອຽດ​ມາສະ​ເໜີ​ທ່ານ​.

ໃນທຸກໆ​ປີ ສະຫະລັດ​ແລະ​ໄທ ຈະ​ຮ່ວມ​ກັນ​ເປັນ​ເຈົ້າພາບທໍາ​ການ​ຊ້ອມ​ລົບທີ່​ໃຫ້​ຊື່ວ່າ​ Cobra
Gold ຊຶ່ງ​ເປັນ​ການ​ຊ້ອມ​ລົບ​ທີ່​ໃຊ້​ເວລາ​ຫຼາຍ​ກວ່າ ນຶ່ງ​ອາທິດ​ທີ່​ໃຊ້​ກະສຸນປືນ​ແທ້ແລະ​ການປະ
ຕິບັດ​ການ​ທີ່ກ່ຽວຂ້ອງ​ກັບ​ກຳລັງ​ທະຫານຕ່າງໆ​ຈາກທົ່ວ​ຂົງ​ເຂດ.

ການ​ຊ້ອມ​ລົບ​ກັນ​ທີ່​ວ່າ​ນີ້ ບໍ່​ແມ່ນ​ເລຶ່ອງ​ໃໝ່ ​ແຕ່​ເປັນ​ນຶ່ງ​ໃນ​ການ​ຊ້ອມ​ລົບ​ແບບ​ຫຼາຍ​ຝ່າຍ​ທີ່​ໃຫຍ່
​ທີ່​ສຸດ​ໃນ​ໂລກ ​ທີ່ເປັນ​ການ​ເນັ້ນ​ຍໍ້າ​ເຖິງຄວາມ​ພະຍາຍາມ​ຕ່າງໆ​ທີ່​ກໍາລັງ​ດໍາ​ເນີນ​ໄປ​ຢູ່​ໃນ​ຂະນະ
​ນີ້ ​ເພື່ອ​ສ້າງ​ຄວາມ​ສົມ​ດຸນໃນການມີໜ້າ​ຂອງ​ຕົນ​ຄືນ​ໃໝ່​ໃນ​ຂົງ​ເຂດ​ເອ​ເຊຍ.

ທ່ານ ອັບ​ບຣາຮໍາ ​ເດນ​ມາກ ນັກວິ​ເຄາະ​ຄວາມ​ໝັ້ນຄົງ​ຜູ້​ນຶ່ງ​ປະ​ຈໍາ​ສໍານັກງານຄົ້ນຄວ້າ​ເອ​ເຊຍ​ແຫ່ງ​ຊາດ ກ່າວ​ວ່າ:

“ແທ້ໆ​ແລ້ວ ການ​ສ້າງ​ຄວາມ​ສົນ​ດຸນ​ຄືນ​ໃໝ່ ​ແມ່ນ​ກ່ຽວ​ກັບ​ການ​ຮັບ​ຮູ້​ວ່າ ປະວັດ​ສາດ​
ໂດຍ​ສ່ວນ​ໃຫຍ່​ທີ່ຈະ​ຖືກ​ບັນທຶກ​ໄວ້​ກ່ຽວ​ກັບ​ສັດຕະ​ວັດທີ່ 21 ນັ້ນ ​ແມ່ນ​ຈະ​ມີ​ຂຶ້ນຢູ່​ໃນ​
ຂົງ​ເຂດ​ເອ​ເຊຍ​ປາຊິ​ຟິກ. ​ແລະ​ເນຶ່ອງຈາກ​ວ່າ​ພວກເຮົາ​ເປັນ​ປະ​ເທດ​ມະຫາ​ອໍານາດໃນ
ຂົງ​ເຂດ​ປາຊິ​ຟິກປະ​ເທດ​ນຶ່ງ ພວກ​ເຮົາ​ກໍຂໍ​ຢາກ​ໃຫ້​ເປັນ​ທີ່​ແນ່​ໃຈ​ວ່າ ພວກ​ເຮົາ​ມີ​ຄວາມ ​
ສາມາດທີ່​ຈະຄຸ້ມຄອງຮັກສາ ​ການ​ເຂົ້າຫາ​ເຂົ້າ​ເຖິງແລະ​ອິດ​ທິພົນຂອງ​ພວກ​ເຮົາຢູ່​ໃນ
​ຂົງ​ເຂດ​ໄວ້​ໄດ້.”

​ເມື່ອ​ເດືອນ​ຜ່ານ​ມາ​ນີ້​ ທ່ານ ລີ​ອອນ ພາ​ແນ​ດຕ້າ ລັດຖະມົນຕີ​ປ້ອງ​ກັນ​ປະ​ເທດ​ສະຫະລັດ ​ໄດ້ໄປ​ຢ້ຽມຢາມ​ຫວຽດນາມ​ເປັນ​ຄັ້ງ​ປະວັດ​ສາດ ທີ່​ໂຮມ​ທັງ ການ​ຢຸດແວ່ທີ່ອ່າວ​ກໍາຣານ ອັນ​ເປັນ​ຈຸດ​ສູນ​ກາງພະລາທິການທະຫານ ທີ່​ສໍາຄັນ​ແຫ່ງ​ນຶ່ງ​ໃນປາງ​ສົງຄາມ​ຫວຽດນາມ. ທ່ານ​ພາ​ແນ​ດ​ຕ້າ ກ່າວ​ວ່າ ສະຫະລັດ​ມີ​ແຜນການ​ທີ່​ຈະເຄຶ່ອນຍ້າຍ​ກອງທັບ​ເຮືອຂອງ​ຕົນ 60 ​ເປີ​ເຊັນ​ໄປ​ຍັງ​ຂົງ​ເຂດ​ປາຊິ​ຟິກ​ພາຍ​ໃຫ້​ໄດ້​ໃນ​ປີ 2020. ທ່ານ ພາແນ​ດຕ້າ ກ່າວ​ວ່າ:

“ຢ່າງແຈ້ງ​ຂາວ​ແລ້ວ​ນັ້ນ ພວກ​ເຮົາ​ຈໍາ​ເປັນ​ຕ້ອງ​ສ້າງ​ຄວາມ​ສໍາພັນ​ດ້ານ​ການປ້ອງ​ກັນ
ປະ​ເທດ​ທີ່​ເຂັ້ມ​ແຂງ​ຂຶ້ນກວ່າ​ເກົ່າ​ກັບປະ​ເທດ​ຕ່າງໆ​ ເຊັ່ນ​ຫວຽດນາມ​ແລະແຫ່ງ​ອື່ນໆ
​ເພື່ອ​ວ່າ​ພວກເຮົາ​ຈະ​ສາມາດ​ສະໜອງ​ການ​ເຝິກອົບ​ລົມ ການຊ່ວຍ​ເຫຼືອ​ ​ແລະ​ສິ່ງ​ໃດໆ
​ກໍ​ຕາມ​ທີ່​ປ​ະ​ເທດ​ເຫຼົ່າ​ນັ້ນ​ຕ້ອງການ​ເພື່ອ​ພະຍາຍ​າມປັບປຸງ​ສະມັດຖະ​ພາບ​ຂອງ​ພວກ
ເຂົ​າ​ເຈົ້າ​ໃຫ້​ດີ​ຂຶ້ນນັ້ນ”

ນອກ​ນີ້​ແລ້ວ ​ໃນຂະນະ​ນີ້​ຟິລິບ​ປິນກໍກໍາລັງ​ຮ້ອງ​ຂໍ​ຄວາມ​ຊ່ວຍ​ເຫຼືອ​ຈາກ​ສະຫະລັດເພີ່ມ​ຂຶ້ນ. ​
ແລະ​ທີ່​ປະ​ເທດໄທ​ນັ້ນ ທັງ​ບັນດາ​ເຈົ້າໜ້າ​ທີ່​ສະຫະລັດ​ແລະ​ໄທ ກໍາລັງ​ປຶກສາ​ຫາລື​ກັນ ທີ່​ຈະ
​ໃຊ້​ຖານ​ທັບ​ອາກາດ​ອູ່ຕະ​ເພົາ ​ໃຫ້​ເປັນ​ສູນ ກາງ​ຖາວອນ​ລະດັບ​ຂົງ​ເຂດເພື່ອ​ການ​ບັນ​ເທົາທຸກ
​ດ້ານ​ມະນຸດສະ​ທໍາ​ແລະ​ໄພພິບັດ.

​ແຕ່​ວ່າ ການ​ທີ່​ສະຫ​ະລັດ​ມີ​ການ​ພົວພັນເພີ່ມ​ຂຶ້ນ​ນັບ​ມື້​ຢູ່​ໃນ​ຂົງ​ເຂດ​ເອ​ເຊຍຕາ​ເວັນ​ອອກສຽງ​
ໃຕ້​ນັ້ນ ​ແມ່ນ​ຈະ​ປະ​ເຊີນ​ກັບ​ບັນຫາທ້າ​ທາຍ​ນາໆປະການ. ຊຶ່ງທ່ານເດນ​ມາກກ່າວ​ວ່າ ສະຫະ
ລັດ​ຈະ​ເອົາ​ແບບຢ່າງ​ໃນ​ອະດີດ​ຜ່ານ​ມາ ​ໃຊ້ນັ້ນ​ບໍ່​ໄດ້. ທ່ານເດ​ນມາກ​ກ່າວ​ວ່າ:

“ມັນ​ຈະ​ເປັນ​ສິ່ງ​ໃດ​ສິ່ງ​ນຶ່ງ ດັ່ງທີ່​ພວກ​ເຮົາ​ໄດ້​ພົບ​ເຫັນ​ມາ​ແລ້ວ​ໃນ​ລະຫວ່າງ​ສົງຄາມ​ເຢັນ
ສົງ​ຄວາມ​ຫວຽດນາມ ​ແຕ່​ວ່າ ເທື່ອ​ນີ້​ມັນເປັນສິ່ງ​ທີ່​ໃໝ່ໆ ທີ່ມີ​ຂະໜາດ​ນ້ອຍ​ກວ່າ ມີ​
ຄວາມ​ວ່ອງ​ໄວຄ່ອງ​ຕົວ ຫຼາຍ​ກວ່າ ​ມີ​ຄວາມ​ສຳພັນ​ທີ່​ຍັ້ງ​ຍືນ​ທາງ​ການ​ເມືອງ​ສໍາລັບ​
ບັນດາ​ຄູ່​ພາຄີ ​ແລະ​ພັນທະ​ມິດ​ຂອງ​ພວກ​ເຮົາ.”

ໃນ​ຂະນະ​ປະທາ​ນາ​ທິບໍດີ​ຟິລິ​ບປິນ ທ່ານ ​ເບ​ນິກ​ໂນ ອາ​ຄີ​ໂນ ຢ້ຽມຢາມ​ນ​ະຄອນ​ຫຼວງ​ວໍ​ຊິງ​ຕັນ
ຂອງສະຫະລັດ ​ເມື່ອ​ເດືອນຜ່ານມາ​ນີ້ ພວກ​ປະ​ທ້ວງ​ໄດ້ ​ເຕົ້າ​ໂຮ​ມກັນ​ຢູ່​ທີ່​ບໍລິ​ເວນ​ນອກ​ສະຖານ
ທູດ​ສະຫະລັດ​ປະ​ຈໍາ​ຟິລິບ​ປິນ ທີ່ພາກັນອອກສຽງ​ສະ​ແດງ​ຄວາມ​ເປັນ​ຫ່ວງ​ຕ່າງໆ​ນາໆ ກ່ຽວ
​ກັບ​ແຜນການ ເພື່ອ​ເພີ່ມການ​ຊ້ອມ​ລົບທາງ​ທະຫານ​ຮ່ວມກັນ ​ແລະ​ສັບ​ປ່ຽນ​ການ​ມີໜ້າ​ປະ​ຈໍາ
ການ​ຂອງກອງທັບ​ສະຫະລັດ​ຢູ່​ທີ່​ນັ້ນ.

ຈີນ ຊຶ່ງ​ເວລາ​ນີ້​ເປັນ​ປະ​ເທດ​ມະຫາ​ອຳນາດ ທີ່ແສນ​ຍານຸພາບທາງທັບ​ເຮືອກໍາລັງ​ເຕີບ​ໂຕ​ຂຶ້ນ
​ນັບ​ມື້​ຢູ່​ໃນ​ຂົງ​ເຂດ ກໍໄດ້ຕໍາ​ໜິ​ຕິຕຽນສະຫະລັດ​ ທີ່​ຈະ​ເຄຶ່ອນຍ້າຍ​ກອງທັບ​ຂອງ​ຕົນ​ມາ​ຍັງ​ຂົງ
​ເຂດ​ເອ​ເຊຍ ​ແລະ​ພ້ອມ​ກັບຄວາມ​ພະຍາຍາມ​ຂອງສະຫະລັດ​ທີ່​ຈະ​ສ້າງ​ຄວາມ​ເຂັ້ມ​ແຂງ​ໃຫ້
​ແກ່ບັນດາ​ພັນທະ​ມິດ​ທາງທະຫານ​ຂອງ​ຕົນນັ້ນ​. ຊຶ່ງ​ປັກ​ກິ່ງ​ເອີ້ນ​ຄວາມ​ພະຍາຍາມ​ນີ້​ວ່າ
​ເປັນ​ການ ​ເຄຶ່ອນ​ໄຫວ​ທີ່​ບໍ່​ຖືກ​ກາລະ​ເທສະ ​ແລະ​ຮຽກຮ້ອງໃຫ້​ສະຫະລັດ​ຈົ່ງ​ເຄົາລົບ​ນັບຖື
​ຜົນ​ປະ​ໂຫຍ​ດຂອງ​ຕົນຢູ່​ໃນ​ຂົງ​ເຂດ.

ທ່ານ Wu Shicun ປະທານສະ​ຖາ​ບັນ​ແຫ່ງ​ຊາດ​ສໍາລັບ​ການ​ສຶກສາ​ເຂດ​ທະ​ເລຈີນ​ໃຕ້ ກ່າວ​ວ່າ:

“​ໃນ​ທັດສະນະ​ຂອງ​ຂ້າພະ​ເຈົ້າ​ແລ້ວ ການທີ່​ສະຫະລັດ ​ເຄຶ່ອນຍ້າຍກໍາລັງທະຫານ
​ຂອງ​ຕົນ ​ເພື່ອ​ສ້າງ​ຄວາມ​ສົນ​ດຸນ​ດ້ານ​ຍຸດ​ທະ​ສາດໃນ​ຂົງ​ເຂດ​ເອ​ເຊຍ-ປາຊິ​ຟິກນັ້ນ ​
ແມ່ນເປັນວັດຖຸ​ປະສົງ​ຢ່າງ​ນຶ່ງຂອງ​ສະຫະ ​ເພື່ອ​ຍັບ​ຍັ້ງຄວບ​ຄຸມຈີນ​”

​ໃນ​ຂະນະທີ່​ມີ​ການ​ຊ້ອມ​ລົບ Cobra Gold ລະຫວ່າງ​ສະຫະລັດ ​ແລະ​ໄທ​ ນັ້ນ ທັງຈີນ​ແລະ
​ຫວຽດນາມກໍ​ເຂົ້າຮ່ວມໃນ​ຖານະ​ເປັນ​ຜູ້​ສັງ​ເກດ​ການ. ແລະສ່ວນ​ໃຫຍ່ກໍ​ເໝືອນ​ກັບການ
​ເຄຶ່ອນຍ້າຍ​ກອງກຳລັງ​ຂອງ​ສະຫະລັດໄປ​ຍັງ​ຂົງ​ເຂດ​ເອ​ເຊຍ​ນີ້​ແລ້ວ ບັນດາ​ເຈົ້າໜ້າ​ທີ່​ທະຫານ
​ສະຫະລັດ​ກ່າວ​ວ່າ ​ມັນເປັນ​ກາ​ນຊ້ອມ​ລົບທີ່ບໍ່​ໄດ້​ແນ​ເປົ້າໝາຍ​ໃສ່​ປະ​ເທດ​ໃດ​ປະ​ເທດ​ນຶ່ງ​ ໂດຍ​ສະ​ເພາະ.

XS
SM
MD
LG