ໃນວັນອັງຄານວານນີ້ ພວກເຮືອບິນລົບ ຂອງເທີກີ ໄດ້ແນເປົ້າໝາຍໃສ່ ພວກນັກລົບ
ຈາກພັກກຳມະກອນເຄີດດິສຖານ ຫຼື PKK ທີ່ຖືກຫ້າມນັ້ນ ພ້ອມດ້ວຍ ສະມາຊິກຂອງ
ກຸ່ມກຳລັງປົກປ້ອງປະຊາຊົນເຄີດ ຫຼື YPG ຊຶ່ງເປັນເຄືອຂ່າຍສຳຄັນ ຂອງຊາວເຄີດ ທີ່
ຕໍ່ສູ້ຢູ່ແນວໜ້າຂອງອີຣັກ ແລະ ຊີເຣຍ ບ່ອນທີ່ໜ່ວຍກຳລັງຂອງຊາວເຄີດ ມີບົດບາດ
ທີ່ສຳຄັນ ໃນການເຕົ້າໂຮມຊາວເຄີດ ທີ່ບໍ່ໜຽວແໜ້ນປານໃດ ຕໍ່ສູ້ຕ້ານຢັນ ພວກຫົວ
ຮຸນແຮງຈັດ ລັດອິສລາມ.
ພວກຜູ້ສັງເກດການ ຈາກອົງການສິ້ງຊອມສິດທິມະນຸດ ຊີເຣຍ ໄດ້ກ່າວໃນວັນພຸດ
ມື້ນີ້ ວ່າ ປະຊາຊົນ ຢ່າງໜ້ອຍ 28 ຄົນ ຖືກຂ້າຕາຍ ໃນການໂຈມຕີທາງອາກາດ
ໂດຍມີປະມານອີກ 20 ຄົນ ໄດ້ຮັບບາດເຈັບ.
ເທີກີ ສະຫະລັດ ແລະ ສະຫະພາບຢູໂຣບ ໄດ້ກຳນົດໃຫ້ພັກ PKK ເປັນອົງການກໍ່
ການຮ້າຍ ໃນການຜັກດັນຕໍ່ຕ້ານລັດຖະບານ Ankara ມາໄດ້ຫຼາຍທົດສະຫວັດ
ເພື່ອຕົນຈະໄດ້ປົກຄອງຕົນເອງ ໃນພາກຕາເວັນອອກສຽງໃຕ້ຂອງເທີກີ ແລະ ໃນ
ວັນອັງຄານວານນີ້ ກອງທັບຂອງເທີກີ ໄດ້ອອກມາປົກປ້ອງ ການໂຈມຕີທາງອາກາດ
ທີ່ຂະຫຍາຍວົງກວ້າງອອກໄປ ນັ້ນ.
ຖະແຫລງການສັ້ນໆຂອງກອງທັບເທີກີ ໄດ້ກ່າວວ່າ “ເພື່ອທຳລາຍແຫລ່ງສູນລວມ
ກໍ່ການຮ້າຍເຫຼົ່ານີ້ ຊຶ່ງເປັນໄພຂົ່ມຂູ່ຕໍ່ຄວາມໝັ້ນຄົງ ຄວາມເອກກະພາບ ກຽດສັກສີ
ແລະ ປະເທດຊາດຂອງພວກເຮົາ ແລະ ເປັນສິດທິສ່ວນນຶ່ງ ຂອງພວກເຮົາ ອີງຕາມ
ກົດໝາຍສາກົນ ການໂຈມຕີທາງອາກາດທັງຫຼາຍ ຈຶ່ງໄດ້ຖືກປະຕິບັດການໄປ.”
