ຣັດເຊຍ ໄດ້ກ່າວໃນວັນອັງຄານມື້ນີ້ວ່າ ນຶ່ງໃນເຮືອບິນລົບອາຍພົ່ນ Su-24 ຂອງຕົນຖືກຍິງຕົກ ຢູ່ໃນບໍລິເວນຊາຍແດນລະຫວ່າງເທີກີ ຕິດກັບຊີເຣຍ ແຕ່ໄດ້ກ່າວວ່າ “ມັນແມ່ນການຍິງຈາກພາກພື້ນດິນ ທີ່ພາໃຫ້ເຮືອບິນຕົກ.”
ແຕ່ເຖິງຢ່າງໃດກໍຕາມ ເຈົ້າໜ້າທີ່ທະຫານຂອງເທີກີ ໄດ້ກ່າວວ່າ ເຮືອບິນລົບໄອພົ່ນ F-16 ຂອງຕົນ ໄດ້ຍິງເຮືອບິນລົບລຳດັ່ງກ່າວ ຫຼັງຈາກເຮືອບິນໄດ້ລະເມີດນ່ານຟ້າຂອງປະເທດ ແລະເມີນເສີຍຕໍ່ການເຕືອນຫຼາຍໆຄັ້ງ ເພື່ອໃຫ້ບິນອອກໄປ.
ກະຊວງປ້ອງກັນປະເທດຂອງຣັດເຊຍ ໄດ້ກ່າວວ່າ ເຮືອບິນລົບອາຍພົ່ນຂອງຕົນບໍ່ໄດ້ບິນ
ອອກຈາກເຂດແດນຂອງຊີເຣຍ ເລີຍ. ຣັດເຊຍ ຍັງໄດ້ກ່າວອີກວ່າ ບັນດານັກບິນຂອງຕົນໄດ້ໂດດອອກຈາກເຮືອບິນ ແຕ່ວ່າ ຊາຕາກຳຂອງພວກເຂົາເຈົ້ານັ້ນຍັງບໍ່ທັນເປັນທີ່ຊາບໄດ້ເທື່ອ. ວີດີໂອຈາກເຂດທ້ອງຖິ່ນ ສະແດງໃຫ້ເຫັນວ່າ ໄດ້ມີນັກບິນສອງຄົນໂດດຈ້ອງລົງມາຈາກເທິງເວຫາ.
ໂຄສົກກະຊວງການຕ່າງປະເທດສະຫະລັດກ່າວວ່າ ພວກເຂົາເຈົ້າຍັງບໍ່ສາມາດຢືນຢັນ
ກ່ຽວກັບ ລາຍງານຂ່າວທີ່ວ່າ ເຮືອບິນລົບອາຍພົ່ນຂອງເທີກີ ໄດ້ຍິງເຮືອບິນລົບທີ່ບໍ່ຊາບຝ່າຍຕົກ ແຕ່ຕົນກໍໄດ້ຕິດຕາມເບິ່ງສະຖານະການຢ່າງໃກ້ຊິດ.
ບັນດາເຈົ້າ ໜ້າທີ່ເທີກີ ໄດ້ອອກຄຳເຕືອນຫຼາຍໆເທື່ອແລ້ວ ກ່ຽວກັບການລະເມີດເຂດນ່ານຟ້າຂອງເຮືອບິນ ໃນລະຫວ່າງສົງຄາມການເມືອງໃນຊີເຣຍ ທີ່ຍືດເຍື້ອມາໄດ້ຫຼາຍກວ່າ 4 ປີເຄິ່ງແລ້ວນັ້ນ. ກອງກຳລັງຂອງເທີກີໄດ້ຍິງເຮືອບິນເຮລິຄອບເຕີຊີເຣຍລຳນຶ່ງໃນປີ 2013 ແລະໃນເດືອນແລ້ວນີ້ ກໍໄດ້ຍິງເຮືອບິນທີ່ບໍ່ມີຄົນຂັບ ທີ່ໄດ້ບິນລະເມີດເຂົ້າໄປໃນເຂດນ່ານຟ້າຂອງຕົນ. ເທີກີ ຍັງໄດ້ຈົ່ມວ່າ ມີຢ່າງນ້ອຍສອງໂອກາດ ທີ່ເຮືອບິນລົບຂອງຣັດເຊຍ ໄດ້ບິນລ່ວງລ້ຳເຂດນ່ານຟ້າຂອງຕົນ.
ຣັດເຊຍ ໄດ້ເລີ້ມການໂຈມຕີທາງທະຫານ ໃນຊີເຣຍ ໃນທ້າຍເດືອນກັນຍາທີ່ຜ່ານມາ. ໃນເດືອນຕຸລາ, ຣັດເຊຍໄດ້ບັນລຸຂໍ້ຕົກລົງກັບສະຫະລັດ ຊຶ່ງເປັນຜູ້ນຳພາບັນດາປະເທດແນວໂຮມໃນການປະຕິບັດງານຖິ້ມລະເບີດ ໂຈມຕີພວກຫົວຮຸນແຮງໃນຊີເຣຍ ເພື່ອຮັກສາໄລຍະ ທີ່ປອດໄພ ແລະການຕິດຕໍ່ສື່ສານ ເພື່ອປ້ອງກັນເຫດການຮ້າຍກາງອາກາດ.