ເຈົ້າໜ້າທີ່ເທີກີໄດ້ອອກໝາຍຈັບພວກນັກຂ່າວຫລາຍສິບຄົນ ທີ່ຖືກກ່າວຫາວ່າ ມີຄວາມສຳພັນກັບນັກສອນສາສະໜາອິສລາມ ທີ່ລີ້ໄພຢູ່ໃນສະຫະລັດ ທີ່ລັດຖະບານກ່າວອ້າງວ່າ ເປັນຜູ້ຢູ່ເບື້ອງຫຼັງການເຮັດລັດຖະປະຫານທີ່ປະສົບກັບຄວາມລົ້ມແຫຼວໃນເດືອນນີ້.
ມີນັກຂ່າວຢ່າງໜ້ອຍໜຶ່ງຄົນໄດ້ຖືກຈັບໃນວັນພຸດມື້ນີ້ ແລະໄດ້ມີການອອກໝາຍຈັບອະ ດີດສະມາຊິກ 47 ຄົນ ຂອງຄະນະບັນນາທິການໜັງສືພິມ Zaman ຊຶ່ງເປັນໜັງສືພິມທີ່ໃຫຍ່ທີ່ສຸດໃນເທີກີ. ໃນເດືອນມີນາປີນີ້ ສານເທີກີໄດ້ສັ່ງໃຫ້ລັດຖະບານເຂົ້າຄວບຄຸມໜັງ ສືພິມດັ່ງກ່າວແລະບໍ່ດົນຫລັງຈາກນັ້ນຕຳຫຼວດກໍໄດ້ບຸກເຂົ້າໄປກວດຄົ້ນສຳນັກງານແຫ່ງຕ່າງໆຂອງໜັງສືພິມ.
ໜັງສືພິມສະບັບນີ້ ມີຄວາມສຳພັນທີ່ໃກ້ຊິດກັບຂະບວນການຂອງນັກສອນສາສະໜາທີ່ ລີ້ໄພຢູ່ສະຫະລັດ ທ່ານ Fetullah Gulen. ນັບຕັ້ງແຕ່ລັດຖະບານໄດ້ເຂົ້າຄວບຄຸມແລ້ວ ໜັງສືພິມດັ່ງກ່າວແມ່ນໄດ້ເອົາທ່າທີນິຍົມລັດຖະບານຢ່າງແຂງຂັນໃນການລາຍງານຂ່າວຂອງຕົນ.
ໃນຕົ້ນອາທິດນີ້ ລັດຖະບານໄດ້ອອກໝາຍຈັບນັກຂ່າວຄົນອື່ນໆ 46 ຄົນຊຶ່ງ 16 ຄົນໃນຈຳນວນນີ້ແມ່ນໄດ້ຖືກເຈົ້າໜ້າທີ່ຈັບໂຕໄວ້ແລ້ວ.
ການປາບປາມພວກນັກຂ່າວ ມີຂຶ້ນໃນຖານະທີ່ເປັນ ພາກສ່ວນນຶ່ງ ຂອງການກວດລ້າງເຈົ້າໜ້າທີ່ລັດຖະບານ ໃນຂອບເຂດທີ່ກວ້າງຂວາງ ແລະພວກຜູ້ນຳດ້ານວິຊາການ ຫຼັງຈາກໄດ້ມີການພະຍາຍາມເຮັດລັດຖະປະຫານແຕ່ປະສົບກັບຄວາມລົ້ມແຫຼວທີ່ເຮັດໃຫ້ເກືອບ 300 ຄົນເສຍຊີວິດ.
ອົງການນິລະໂທດກຳສາກົນກະປະມານວ່າ ມີຫຼາຍກວ່າ 10 ພັນຄົນໄດ້ຖືກຈັບ ນັບແຕ່ໄດ້ມີການພະຍາຍາມເຮັດລັດຖະປະຫານ ເມື່ອວັນທີ 15 ກໍລະກົດເປັນຕົ້ນມາ.