ລິ້ງ ສຳຫລັບເຂົ້າຫາ

ໄຊຊະນະ ຂອງທ່ານ Trump ຢູ່ລັດ Indiana ກົດດັນ ໃຫ້ທ່ານ Cruz ຖອນໂຕ


ຜູ້ສະໝັກປະທານາທິບໍດີ ຂອງພັກຣີພັບບລີກັນ ທ່ານ Ted Cruz ພ້ອມດ້ວຍພັນລະຍາ ຍານາງ Heidi ປະກາດໂຈະ ການໂຄສະນາຫາສຽງຢ່າງເປັນທາງການ.

ຜູ້ສະໝັກປະທານາທິບໍດີ ຂອງພັກຣີພັບບລີກັນ ທ່ານ Ted Cruz ພ້ອມດ້ວຍພັນລະຍາ ຍານາງ Heidi ປະກາດໂຈະ ການໂຄສະນາຫາສຽງຢ່າງເປັນທາງການ.

ຜູ້ນຳ​ຂອງ​ຄະນະ​ກຳມະການ​ແຫ່ງ​ຊາດ​ຂອງ​ພັກ​ຣີພັບ​ບລີ​ກັນຮ້ອງ​ທ່ານ Donald Trump ວ່າ ​ເປັນ​ຜູ້​ທີ່​ເຊື່ອ​ວ່າ​ຈະ​ໄດ້ຮັບ​ການ​ແຕ່ງຕັ້ງ​ໃຫ້​ເປັນ​ຜູ້​ສະໝັກ​ປະທານາທິບໍດີຂອງ​ພັກຫຼັງ​ຈາກ​ທ່ານ​ໄດ້​ຮັບ​ໄຊຊະນະໃນ​ການ​ເລືອກ​ຕັ້ງຂັ້ນຕົ້ນທີ່​ລັດ Indiana ​ໃນ​ວັນ​ອັງຄານ​ວານ ນີ້.

ທ່ານ Trump ​ໄດ້​ຊະນະ 53 ​ເປີ​ເຊັນ​ຂອງ​ຄະ​ແນນ​ສຽງ​ທັງ​ໝົດ​ ສະມາຊິກ​ສະພາ​ສູງ​ຈາກ​ລັດ​ເທັກ​ຊັສ ທ່ານ Ted Cruz ​ໄດ້​ຮັບ 37 ​ເປີ​ເຊັນ​ ແລະ​ຜູ້​ປົກຄອງ ລັດ​ໂອ​ຮາ​ຍ​ໂອ ທ່ານ John Kasich ​ໄດ້​ຮັບ 7​ ​ເປີ​ເຊັນ.

ຫຼັງ​ຈາກ​ບໍ່​ສາມາດ​ເອົາ​ຊະນະໃນ​ລັດ​ທີ່​ມີ​ຄວາມສຳຄັນຕໍ່​ການ​ດຳ​ເນີນ​ຄວາມ​ພະຍາມ​ເພື່ອ​ຍຸຕິ​ທ່ານ Trump ບໍ່​ໃຫ້​ໄດ້​ຮັບ​ພວກ​ຜູ້ຕາງໜ້າ​ພຽງພໍ ​ເພື່ອ​ໃຫ້​ໄດ້​ຮັບການ​ແຕ່ງຕັ້ງ ​ເປັນ​ຜູ້ ສະໝັກ​ປະທານາທິບໍດີ​ຂອງ​ພັກ​ແລ້ວ ທ່ານ Cruz ກໍ​ໄດ້​ຖອນ​ໂຕ​ອອກ​ຈາກ​ການ​ແຂ່ງຂັນ. ທ່ານ​ກ່າວ​ຕໍ່​ພວກ​ສະໜັບສະໜຸນ​ວ່າ ​ເສັ້ນທາງໄປ​ສູ່​ໄຊຊະນະ​ແມ່ນໄດ້ຮັບການຂັດຂວາງ ແລະ​ພວກ​ຜູ້​ມີ​ສິດ​ປ່ອນ​ບັດ​ໄດ້​ເລືອກ​ເອົາ​ຜູ້​ອື່ນ.

ທ່ານ Trump ​ເອີ້ນ​ການ​ຊະນະ​ຂອງ​ທ່ານ​ທີ່​ລັດ Indiana ວ່າ ເປັນ​ໄຊຊະນະ​ອັນ​ຍິ່ງ​ໃຫຍ່. ທ່ານ​ໄດ້​ສະ​ແດງ​ຄວາມ​ດີ​ໃຈ ​ຕໍ່​ທ່ານ Cruz ​ໂດຍ​ເວົ້າວ່າ ທ່ານ Cruz ​ແລະ​ຜູ້​ສະໝັກ​ຄົນ​ອື່ນໆ​ຂອງ​ພັກຣີພັບ​ບລີ​ກັນ​ຊຶ່ງ​ຄັ້ງນຶ່ງມີ​ຢູ່​ເປັນ​ຈຳນວນຫຼວງຫຼາຍນັ້ນ ແມ່ນ​ເປັນ​ຜູ້ແຂ່ງຂັນ​ ທີ່ສະຫຼາດ​ແລະ​ເກັ່ງ​ກ້າ​ສາມາດ. ນອກ​ນັ້ນ ທ່ານ Trump ຍັງ​ໄດ້​ຮຽກຮ້ອງ​ໃຫ້​ມີ​ຄວາມ​ສາ ມັກຄີ​ກັນ​ພາຍ​ໃນ​ພັກ.

ທ່ານ Reince Priebus ປະທານຄະນະ​ກຳມະການ​ແຫ່ງ​ຊາດ​ຂອງ​ພັກ​ຣີພັບ​ບລີ​ກັນກໍ​ໄດ້​ສະ​ແດງ​ຄວາມ​ເຫັນ​ທີ່​ຄ້າຍຄື​ກັນ ​ໃນ​ຕອນ​ແລງວັນ​ອັງຄານ​ວານ​ນີ້ ​ໂດຍ​ກ່າວວ່າ ພັກ​ຣີພັບ​ບລີ​ກັນ​ຕ້ອງ​ໄດ້​ສາມັກຄີ​ກັນເພື່ອ​ຈະ​ເອົາ​ຊະນະ​ທ່ານ​ນາງ Hillary Clinton ​ໃນ​ການ​ເລືອກ​ຕັ້ງທົ່ວ​ໄປ​ໃນ​ເດືອນ​ພະຈິກ.

​ໂຄສົກ​ຂອງ​ທ່ານ Kasich ກ່າວ​ວ່າ ຜູ້​ປົກຄອງ​ລັດ​ໂອ​ຮາ​ຍ​ໂອ​ ຍັງ​ຈະ​ທຳ​ການ​ຕໍ່ສູ້​ຕໍ່​ໄປ ​ທີ່​ກອງ​ປະຊຸມ​ໃຫຍ່​ຂອງ​ພັກ ​ໃນ​ເດືອນກໍລະກົດ ບ່ອນ​ທີ່​ທ່ານ​ຫວັງ​ວ່າ ຈະໄດ້​ຖືກແຕ່ງຕັ້ງ​ໃຫ້​ເປັນ​ຜູ້​ສະໝັກ​ຂອງ​ພັກໃນ​ການ​ປ່ອນ​ບັດ​ລົງ​ຄະ​ແນນ​ສຽງ​ຮອບ​ທີ​ສອງ​ຫຼືທີ​ສາມ.

ສຳລັບ​ພັກ​ເດ​ໂມ​ແຄຣັດ​ສະມາຊິກ​ສະພາ​ສູງ​ຈາກ​ລັດ Vermont ທ່ານBernie Sanders ​ໄດ້​ເອົາ​ຊະນະ ​ທ່ານ​ນາງ Clinton ​ໃນ​ການ​ເລື​ອກຕັ້ງຂັ້ນຕົ້ນ ທີ່​ລັດ Indiana ​ໂດຍ​ໄດ້​ຮັບ​ຄະ​ແນນ​ສຽງ 53 ​ເປີ​ເຊັນ. ​ເຖິງ​ແມ່ນ​ໄດ້​ຮັບ​ໄຊຊະນະ​ກໍ​ຈິງ ​ແຕ່​ທ່ານ​ກໍ​ຍັງ​ມີ​ພວກ​ຜູ້ຕາງ​ໜ້າ ໜ້ອຍ​ກວ່າ​ທ່ານ​ນາງ Clinton ຢ່າງ​ຫຼວງຫຼາຍຢູ່ແລະ​ຕ້ອງ​ໄດ້ຮັບ​ໄຊຊະນະ​ຢ່າງ​ໃຫຍ່​ຫຼວງ ​ໃນ​ກ່ານ​ເລືອກ​ຕັ້ງຂອງ​ລັດ​ຕ່າງໆ​ທີ່​ຍັງ​ເຫລືອ​ຢູ່ ຈຶ່ງ​ຈະ​ໄລ່​ທັນ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG