ລິ້ງ ສຳຫລັບເຂົ້າຫາ

ທ່ານ Trump ຮູ້ສຶກເສຍໃຈ ທີ່ໃຊ້ຄຳເວົ້າ ບໍ່ຖືກ ລະຫວ່າງໂຄສະນາຫາສຽງ


ຜູ້ສະໝັກປະທານາທິບໍດີພັກຣີພັບບລີກັນ ທ່ານ Donald Trump ລະຫວ່າງການໂຄສະນາຫາສຽງທີ່ເມືອງ Charlotte ໃນລັດ North Carolina ເມື່ອວັນທີ 18 ສິງຫາ 2016.

ໃນ​ການ​ຮັບ​ສາລະພາບຕໍ່ໜ້າ​ສາທາລະນະ​ຊົນ ​ທີ່​ບໍ່​ຄ່ອຍເຫັນ​ກັນ ​ໃນ​ວັນ​ພະຫັດ​ວານ​ນີ້ ຜູ້​ສະໝັກ​ປະທານາທິບໍດີ​ຂອງ​ພັກຣີພັບ​ບລີ​ກັນ ທ່ານ Donald Trump ກ່າວ​ວ່າ ທ່ານ​ຮູ້ສຶກ “​ເສຍ​ໃຈ” ​ໃນ​ການ​ໃຊ້​ໂວຫານ​ ກ່າວ​ໂຈມ​ຕີ ​ແລະ​ໝິ່ນປະໝາດ ຈຳນວນ​ນຶ່ງ ທີ່​ໄດ້​ກາຍ​ມາ​ເປັນ​ສັນຍາ​ລັກ​ຂອງ​ທ່ານ ​ໃນ​ລະຫວ່າງ​ການ​ໂຄສະນາຫາ​ສຽງ.

ທ່ານ​ກ່າວ​ຕໍ່​ພວກ​ສະໜັບສະໜຸນທີ່​ເມືອງ Charlotte ໃນລັດ North Carolina ວ່າ “ບາງ​ຄັ້ງບາງ​ຄາວ​ໃນ​ລະຫວ່າງ​ການ​ອະພິປາຍ​ແລະ​ໂຕ້​ຖຽງ​ທີ່​ດຸ​ເດືອດ​ເພັດ​ຮ້ອນກ່ຽວ​ກັບຫຼາຍໆ ​ບັນຫານັ້ນ ທ່ານ​ບໍ່​ສາມາດເລືອກ​ໃຊ້ ​ຄຳ​ເວົ້າທີ່​ຖືກຕ້ອງ ແລະ​ເຊື່ອ​ຫຼືບໍ່​ວ່າ ຂ້າພະເຈົ້າຮູ້ສຶກ ​ເສຍ​ໃຈ ​ໂດຍ​ສະ​ເພາະ​ແລ້ວມັນ​ອາດ​ຈະ​ພາໃຫ້​ເກີດ​ຄວາມ​ເຈັບ​ປວດໃນ​ທາ​ງສ່ວນ​ຕົວ​ແກ່​ຄົນ​ອື່ນ.”

ຫລັງ​ຈາກ​ນັ້ນບໍ່​ດົນ​ຕໍ່​ມາ ທ່ານ Trump ທີ່​ພວກ​ເຮົາ​ເຄີຍ​ເຫັນ ​ກໍ​ກັບ​ຄືນ​ມາ​ອີກ ​ເວລາ​ທ່ານ​ເອີ້ນປະທານາທິບໍດີ​ ບາຣັກ ​ໂອ​ບາ​ມາ​ວ່າ “ຄົນຂີ້ຕົວະ” ​ໂດຍ​ປະຕິ​ເສດ​ວ່າ ການ​ຈ່າຍ​ເງິນ 400 ລ້ານ​ໂດ​ລາ​ ຫວ່າງ​ບໍ່​ດົນ​ມານີ້​ໃຫ້​ແກ່​ອີ​ຣ່ານ ​ເປັນ​ເງິນ​ຄ່າ​ໄຖ່​ ສຳລັບ​ໂຕ​ປະກັນ.

ນອກ​ນັ້ນ ທ່ານ​ຍັງ​ໄດ້​ກ່າວ​ຫາ ​ທ່ານ​ນາງ Hillary Clinton ​ເປັນ​ຄົນ​ຫົວດື້ຍ້ອນ ທ່ານ​ກ່າວ​ວ່າ ທ່ານ​ນາງ​ມອງ​ເຫັນ​ຊາວ​ອາ​ເມຣິກັນ​ເຊື້ອສາຍ​ອາ​ຟຣິກາ​ເປັນ​ພຽງ ​ແຕ່​ຄະ​ແນນ​ສຽງ​ແລະ​ບໍ່​ເອົາ​ຫົວຊາ​ຕໍ່​ໂອກາດ​ທີ່​ພວກ​ເຂົາ​ເຈົ້າສົມຄວນ​ຈະ​ໄດ້​ຮັບ.

ທ່ານ Trump ​ໄດ້​ຮຽກຮ້ອງ​ໂດຍ​ກົງຂໍ​ຄະ​ແນນ​ສຽງ​ຈາກ​ພວກ​ຜູ້​ມີ​ສິດ​ປ່ອນ​ບັດ​ຜິວ​ດຳໂດຍ ​ກ່າວ​ວ່າ ລັດຖະບານ​ຂອງ​ພັກ​ເດ​ໂມ​ແຄຣັດແລະ​ນະ​ໂຍບາຍ​ແບບ​ເສລີ​ນັ້ນໄດ້​ເຮັດ​ໃຫ້ເຂົາ​ເຈົ້າປະສົບ​ກັບ​ຄວາມ​ຜິດ​ຫວັງ. ທ່ານ​ໄດ້​ໃຫ້​ຄຳ​ໝັ້ນສັນຍາ ຕໍ່​ຊາວ​ຜິວ​ດຳ​ວ່າ ຈະ​ເຫັນ​ຜົນ​ແບບ​ບໍ່​ໜ້າ​ເຊື່ອ​ຖ້າ​ທ່ານ​ຫາກ​ຖືກ​ເລືອກ​ເປັນປະທານາທິບໍດີ.

ທ່ານ Trump ຕັ້ງຄຳ​ຖາມ​ວ່າ “ພວກ​ທ່ານ​ຈະ​ເສຍ​ຫາຍ​ຫຍັງ​ໂດຍ​ພະຍາຍາມ​ເຮັດ​ໃນ​ສິ່ງ​ທີ່​ໃໝ່ໆ.”

ພວກ​ຊາວ​ຜິວ​ດຳ ​ຕາມ​ປົກກະຕິ​ແລ້ວ ຈະ​ປ່ອນ​ບັດ​ ໃຫ້​ແກ່​ພັກ​ເດ​ໂມ​ແຄຣັດ ນັບ​ຕັ້ງ​ແຕ່​ໄດ້​ເກີດ​ສະພາບ​ເສດຖະກິດ​ຕົກ​ຕ່ຳ​ຄັ້ງ​ໃຫຍ່ ​ໃນ​ຊຸມ​ປີ 1930​ ຫລັງ​ຈາກ​ໄດ້​ໃຫ້ການ​ສະໜັບ​ສະ ໜັບ​ແກ່​ຜູ້​ສະໝັກ​ຂອງພັກ​ຣີພັບ​ບລີ​ກັນມາ​ເປັນ​ເວລາ​ຫຼາຍໆ​ທົດ​ສະ​ວັດ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG