ຜູ້ມີຄະແນນສຽງນຳໜ້າ ຂອງພັກຣີພັບບລີກັນ ທ່ານ Donald Trump ໄດ້ຮັບໄຊຊະນະເພີ້ມຕື່ມ ໃນການເລືອກຕັ້ງຂັ້ນຕົ້ນຢູ່ໃນ 5 ລັດທາງພາກຕາເວັນອອກສຽງເໜືອ ຂອງສະ ຫະລັດ ເຮັດໃຫ້ທ່ານຫຍັບໃກ້ເຂົ້າໄປສູ່ການມີຄະແນນສຽງຜູ້ຕາງໜ້າພຽງພໍເພື່ອໃຫ້ໄດ້ຮັບການແຕ່ງຕັ້ງເປັນຜູ້ສະໝັກປະທານາທິບໍດີຂອງພັກ.
ທ່ານ Trump ໄດ້ຮັບໄຊຊະນະຢ່າງງ່າຍດາຍທີ່ລັດ Connecticut, Delaware, Mary- land, Pennsylvania ແລະລັດ Rhode Island ຊຶ່ງໃນແຕ່ລະລັດ ທ່ານໄດ້ຮັບຄະແນນສຽງຫຼາຍກວ່າ 55 ເປີເຊັນ.
ໃນການຖະແຫລງຕໍ່ພວກສະໜັບສະໜຸນ ເມື່ອຄືນແລ້ວນີ້ ທ່ານ Trump ໄດ້ປະກາດວ່າ ການແຂ່ງຂັ້ນ ໄດ້ສິ້ນສຸດລົງແລ້ວ ແລະເອີ້ນໂຕທ່ານເອງວ່າ ເປັນຜູ້ທີ່ເຊື່ອວ່າ ຈະໄດ້ຮັບການແຕ່ງຕັ້ງຈາກພັກ. ຫຼັງຈາກການປ່ອນບັດໃນວັນອັງຄານວານນີ້ແລ້ວ ທ່ານ Trump ໄດ້ຮັບຄະແນນຜູ້ຕາງໜ້າ 950 ຄະແນນ ຂອງຈຳນວນທີ່ຕ້ອງການທັງໝົດ 1,237 ຄະ ແນນເພື່ອໃຫ້ໄດ້ຮັບການແຕ່ງຕັ້ງ ຊຶ່ງເປັນຈຳນວນທີ່ຍັງບໍ່ທັນມີການຄ້ຳປະກັນວ່າ ທ່ານ ຈະໄດ້ຮັບກ່ອນກອງປະຊຸມໃຫຍ່ຂອງພັກໃນເດືອນກໍລະກົດຈະມານີ້.
ຄູ່ແຂ່ງຂອງທ່ານ ສະມາຊິກສະພາສູງຈາກລັດເທັກຊັສ ທ່ານTed Cruz ແລະຜູ້ປົກຄອງລັດ Ohio ທ່ານ John Kasich ຈະບໍ່ສາມາດໄດ້ຮັບຈຳນວນຜູ້ຕາງໜ້າ ທີ່ຕ້ອງການທັງໝົດເພື່ອໃຫ້ໄດ້ຮັບການແຕ່ງຕັ້ງ ຈາກຈຳນວນຜູ້ຕາງໜ້າທີ່ຍັງເຫລືອຢູ່ໃນເວລານີ້ ແລະພວກທ່ານຈຶ່ງໄດ້ເພັ່ງເລັງໃສ່ການສະກັດກັ້ນບໍ່ໃຫ້ທ່ານ Trump ໄດ້ຮັບຄະແນນສຽງພຽງ ພໍແທນ.
ໃນການແຂ່ງຂັນຂອງພັກເດໂມແຄຣັດນັ້ນ ອະດີດລັດຖະມົນຕີການຕ່າງປະເທດສະຫະ ລັດທ່ານນາງ Hillary Clinton ໄດ້ຮັບຄະແນນສຽງເພີ້ມຂຶ້ນເພື່ອໃຫ້ໄດ້ຮັບການແຕ່ງຕັ້ງ ຈາກພັກ ໂດຍໄດ້ຮັບໄຊຊະນະ ຢູ່ໃນ 4 ລັດ ໃນວັນອັງຄານວານນີ້. ສະມາຊິກສະພາສູງຈາກລັດ Vermont ທ່ານ Bernie Sanders ໄດ້ຊະນະແຕ່ພຽງລັດດຽວ ຄືລັດ Rhode Island.
ເວລານີ້ ທ່ານນາງ Clinton ໄດ້ຮັບຄະແນນສຽງພວກຜູ້ຕາງໜ້າຢູ່ 2,141 ຄະແນນຮວມ ທັງອັນທີ່ເອີ້ນວ່າຜູ້ຕາງໜ້າພິເສດຫຼື super delegates ທີ່ປະກອບດ້ວຍເຈົ້າໜ້າທີ່ຂອງພັກທີ່ໃຫ້ຄຳໝັ້ນສັນຍາວ່າ ຈະສະໜັບສະໜຸນທ່ານນາງ ຊຶ່ງເຮັດໃຫ້ທ່ານນາງ Clinton ຍັງຕ້ອງການຄະແນນສຽງຜູ້ຕາງໜ້າຕື່ມອີກແຕ່ພຽງ 242 ຄະແນນເທົ່ານັ້ນ ຈຶ່ງຈະພຽງພໍສຳລັບການຖືກແຕ່ງຕັ້ງໃຫ້ເປັນຜູ້ສະໝັກຂອງພັກ.
ທ່ານນາງໄດ້ກ່າວຕໍ່ພວກສະໜັບສະໜຸນ ທີ່ພາກັນສະແດງຄວາມດີອົກດີໃຈ ທີ່ນະຄອນ Philadelphia ວ່າ ທ່ານນາງຈະທ້ອນໂຮມພັກເດໂມແຄຣັດເຂົ້າເປັນນຶ່ງດຽວ ເພື່ອເອົາຊະນະການເລືອກຕັ້ງປະທານາທິບໍດີໃນເດືອນພະຈິກປີນີ້ແລະສືບຕໍ່ໃຫ້ການສະໜັບສະໜຸນຢ່າງແຂງຂັນ ຕໍ່ຄວາມເປັນຫົວກ້າວໜ້າຂອງພັກທີ່ເຄີຍມີມານັ້ນ.
ສ່ວນທ່ານ Sanders ໄດ້ປະກາດວ່າ ຈະໂຄສະນາຫາສຽງຕໍ່ໄປຈົນຮອດກອງປະຊຸມໃຫຍ່ຂອງພັກ. ທ່ານໄດ້ກ່າວຢ້ຳເຖິງທ່າທີດັ່ງກ່າວໃນແລງວັນອັງຄານວານນີ້ໂດຍເວົ້າວ່າ ທ່ານ ຈະຕໍ່ສູ້ເພື່ອຍາດເອົາທຸກຜູ້ຕາງໜ້າ ເພື່ອຈະມີອິດທິພົນ ຕໍ່ການຮ່າງຫົວຂໍ້ ໃນການປະຊຸມໃຫຍ່ຂອງພັກ.
