ລິ້ງ ສຳຫລັບເຂົ້າຫາ

ທ່ານ Trump ຮຽກຮ້ອງໃຫ້ ຊາວອາເມຣິກັນ ເຊື້ອສາຍອາຟຣິກາ ລອງສິ່ງໃໝ່ເບິ່ງ


ຜູ້ຊົມພາກັນຮ້ອງເຊຍ ຂະນະທີ່ທ່ານ Donald Trump ກ່າວຄຳປາໄສ ຢູ່ເທິງເວທີ ໃນການໂຄສະນາຫາສຽງ ທີ່ເມືອງ Dimondale ລັດ Mich. (19 ສິງຫາ 2016)

ຜູ້ຊົມພາກັນຮ້ອງເຊຍ ຂະນະທີ່ທ່ານ Donald Trump ກ່າວຄຳປາໄສ ຢູ່ເທິງເວທີ ໃນການໂຄສະນາຫາສຽງ ທີ່ເມືອງ Dimondale ລັດ Mich. (19 ສິງຫາ 2016)

​ສະໝັກ​ປະທານາທິບໍດີ​ຂອງ​ພັກຣີພັບ​ບລີ​ກັນ ທ່ານ Donald Trump ພະຍາຍາມ​ທີ່​ຈະ ​ຊັກ​ຊວນ​ໃຫ້​ຜູ້​ມີ​ສິດ​ປ່ອນ​ບັດຊາວ​ອາ​ເມຣິກັນ​ເຊື້ອສາຍ​ອາ​ຟຣິກາ ບໍ່​ໃຫ້ສະໜັບສະໜຸນ​ທ່ານ​ນາງ Hillary Clinton ​ໃນ​ວັນ​ສຸກ​ວານ​ນີ້ໂດຍ​ກ່າວ​ວ່າ ພັກເດ​ໂມ​ແຄຣັດ ​ເຊັ່ນ​ທ່ານ​ນາງ Clinton ບໍ່​ໄດ້​ຖືສຳຄັນໃນການ​ປ່ອນ​ບັດ​ຂອງຊາວອາ​ເມ​ຣິກັນ​ເຊື້ອສາຍ​ອາ​ຟຣິກາ.

​ໃນ​ຄຳ​ປາ​ໄສ ​ທີ່​ເມືອງ Dimondal ​ໃນ​ລັດ Michigan ນັ້ນ ທ່ານ Trump ​ໄດ້​ໃຊ້​ນະຄອນ Detroit ຊຶ່ງຕັ້ງຫ່າງ​ອອກ​ໄປ​ທາງ​ພາກ​ຕາ​ເວັນ​ອອກ​ປະມານ 150 ຫຼັກກິ​ໂລ​ແມັດ​ເປັນ​ຕົວ ຢ່າງ​ທີ່​ສະ​ແດງ​ໃຫ້​ເຫັນ​ວ່າ ພັກ​ເດ​ໂມ​ແຄຣັດບໍ່​ໄດ້​ເອົາ​ຫົວຊາ​ ຕໍ່​ເຂດ​ເທດສະບານ​ດັ່ງກ່າວ​ນັ້ນ​ເລີຍ.

ປະທານໂຄສະນາຫາສຽງຂອງທ່ານ Trump ທ່ານ Paul Manafort

ປະທານໂຄສະນາຫາສຽງຂອງທ່ານ Trump ທ່ານ Paul Manafort

​ທ່ານ Trump ກ່າວ​ວ່າ “ຈົ່ງ​ມອງ​ເບິ່ງ​ວ່າ​ປະຊາ​ຄົມ​ອາ​ເມຣິກັນ​ເຊື້ອສາຍ​ອາ​ຟຣິກາ​ໄດ້​ຮັບ​ຜົນ​ກະທົບ​ຫຼາຍປານ​ໃດພາຍ​ໃຕ້​ການ​ຄວບ​ຄຸມ​ຂອງ​ພັກ​ເດ​ໂມ​ແຄຣັດ. ທ່ານ​ກ່າວ​ອ້າງ​ວ່າ ຫຼາຍ​ກວ່າ 40 ​ເປີ​ເຊັນ​ ຂອງ​ປະຊາຊົນ​ໃນ​ນະຄອນ Detroit ​ໄດ້​ດຳລົງ​ຊີວິດ ຢູ່ໃນຄວາມ ທຸກ​ຍາກ​ແລະ​ເຄິ່ງນຶ່ງ​ຂອງ​ປະຊາຊົນ​ໃນ​ນະຄອນ​ດັ່ງກ່າວບໍ່​ມີ​ວຽກ​ການ​ເຮັດ. ທ່ານ​ເວົ້າວ່າ ມີ​ທາງ​ດຽວ​ເທົ່າ​ນັ້ນທີ່​ຈະ​ມີ​ການ​ປ່ຽນ​ແປງ ກໍ​ຄື​ມີ​ການ​ປ່ຽນຜູ້ນຳ​.

“ສຳລັບ​ພວກ​ທີ່​ໄດ້​ຮັບ​ຄວາມທຸກ​ທໍລະມານ​ແລ້ວ ຂ້າພະ​ເຈົ້າຂໍເວົ້າວ່າ ພວ​ກທ່ານຈະເສຍ​ຫາຍ​ຫຍັງ ​ໂດຍ​ການ​ລອງ​ສິ່ງ​ໃໝ່ໆ ເຊັ່ນ Trump”.

ຜູ້ສະໝັກເປັນປະທານາທິບໍດີ ພັກຣີພັບບລີກັນ ທ່ານ Donald Trump ແລະຜູ້ສະໝັກ ເປັນຮອງປະທານາທິບໍດີ ຮ່ວມກັບທ່ານ ຜູ້ປົກຄອງລັດ Mike Pence

ຜູ້ສະໝັກເປັນປະທານາທິບໍດີ ພັກຣີພັບບລີກັນ ທ່ານ Donald Trump ແລະຜູ້ສະໝັກ ເປັນຮອງປະທານາທິບໍດີ ຮ່ວມກັບທ່ານ ຜູ້ປົກຄອງລັດ Mike Pence

“ທ່ານ​ພວມ​ດຳລົງ​ຊີວິດ​ຢູ່​ໃນ​ຄວາມທຸກ​ຍາກ, ​ໂຮງຮຽນ​ຂອງ​ພວກ​ທ່ານ​ກໍ​ບໍ່​ດີ, ພວກ​ທ່ານ​ ບໍ່ມີ​ວຽກ​ມີ​ການ​ເຮັດ, 58 ​ເປີ​ເຊັນ​ຂອງ​ພວກ​ໜຸ່ມ​ນ້ອຍ​ຂອງ​ພວກ​ທ່ານກໍ​ຫວ່າງ​ງານ ມີ​ຫຍັງ​ລະ​ທີ່​ພວກ​ທ່ານ​ຈະ​ສູນ​ເສຍ.”

ທ່ານ Trump ​ໄດ້​ຖິ້ມ​ໂທດ​ກ່ຽວ​ກັບ​ບັນຫາ​ທາງ​ດ້ານ​ເສດຖະກິດ ຊຶ່ງສ່ວນ​ໃຫຍ່​ແລ້ວ​ແມ່ນ​ເປັນຍ້ອນ​ຂໍ້​ຕົກລົງ​ການ​ຄ້າ ອັນ​ເປັນ​ເນື້ອ​ໄນ​ຫຼັກ​ໃນ​ຄຳ​ປາ​ໄສການ​ໂຄສະນາຫາ​ສຽງ​ຂອງ​ທ່ານ.

ນອກ​ນັ້ນ​ແລ້ວທ່ານ​ຍັງ​ໄດ້​ກ່າວ​ຫາ​ທ່ານ​ນາງ​ Clinton ວ່າ ຢາກ​ເອົາ​ວຽກ​ໃຫ້​ພວກ​ອົບ​ພະ ຍົບ ​ແທນ​ທີ່​ຈະ​ແມ່ນ​ພວກ​ໜຸ່ມ​ນ້ອຍ ຊາວ​ຜິວ​ດຳ ທີ່​ທ່ານ Trump ກ່າວ​ວ່າ ​ໄດ້​ກາຍ​ເປັນ ອົບພະຍົບພາຍ​ໃນ​ປະ​ເທດ​ຂອງ​ຕົນ​ເອງ​ນັ້ນ.

ທ່ານ​ນາງ Clinton ​ໄດ້​ຕອບ​ໂຕ້​ຄືນ ​ໂດຍ​ສົ່ງ​ຂໍ້ຄວາມ​ຈາກ​ຄຳ​ປາ​ໄສຂອງ​ທ່ານ Trump ຜ່ານ​ທາງ Twitter ພ້ອມ​ກັບ​ຄຳ​ເຫັນ​ທີ່​ຂຽນວ່າ “ນີ້​ແມ່ນ​ໂງ່​ຫຼາຍມັນ​ບໍ່​ຖືກ​ເລີຍ​.”

ການ​ຢ່ັງ​ຫາ​ງສຽງ​ສະ​ແດງ​ໃຫ້​ເຫັນ​ວ່າ ທ່ານ Trump ຕ້ອງ​ໄດ້​ດຳ​ເນີນ​ການ​ເພີ້ມຕື່ມ​ຢ່າງ ​ຫຼວງຫຼາຍກັບ​ບັນດາ​ຜູ້​ມີ​ສິດ​ປ່ອນ​ບັດ ​ຊາວ​ຜິວ​ດຳ ຊຶ່ງ​ການ​ສະໜັບສະໜຸນທ່ານ​ໃນ​ກຸ່ມ ​ຄົນພວກ​ນີ້ ​ແມ່ນຕ່ຳຫຼາຍ​ບໍ່​ຮອດ​ສິບເປີເຊັນ. ​ແຕ່​ທ່ານ Trump ​ໃຫ້ຄຳ​ໝັ້ນສັນຍາ​ໃນວັນ​ສຸກ​ວານ​ນີ້ວ່າ ຖ້າ​ທ່ານ​ຫາກ​ຖືກ​ເລືອກ​ ພາຍ​ໃນ​ຕອນ​ທ້າຍ ຂອງ​ການ​ດຳລົງ​ຕຳ​ແໜ່​ງສະ​ໄໝ​ທຳ​ອິດ​ຂອງ​ທ່ານ​ນັ້ນ “ຂ້າພະ​ເຈົ້າຂໍ​ຄຳ​ປະກັນ​ວ່າ ທ່ານ​ຈະ​ໄດ້​ຮັບ​ຄະ​ແນນ​ສຽງ​ຂອງ​ພວກ​ຊາວ​ອາ​ເມຣິກັນ​ເຊື້ອສາຍ​ອາ​ຟຣິກາຫຼາຍກວ່າ 95 ​ເປີ​ເຊັນ.”

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG