ຜູ້ສະໝັກເປັນປະທານາທິບໍດີສະຫະລັດ ພັກຣີພັບບລິກັນ ທ່ານ Donald Trump ນັກການເມືອງທີ່ກ້າເວົ້າກ້າວ່າ ທີ່ບໍ່ຢູ່ໃນວົງການໆເມືອງ ໄດ້ທ້າທາຍຕໍ່ສິ່ງທີ່ຄິດວ່າເປັນໄປບໍ່ ໄດ້ແລະໄດ້ຊະນະບັນດານັກການເມືອງທີ່ມີປະສົບການຈຳນວນຫຼວງຫລາຍ ໃນການ ເລືອກຕັ້ງຂັ້ນຕົ້ນປີນີ້ ແລະໄດ້ຮັບເອົາການສະເໜີແຕ່ງຕັ້ງເປັນຜູ້ສະໝັກເປັນປະທານາທິ ບໍດີຈາກພັກຂອງທ່ານຢ່າງເປັນທາງການໃນວັນພະຫັດອາທິດແລ້ວນີ້. ທ່ານ Trump ໄດ້ ໃຫ້ຄຳໝັ້ນສັນຍາທີ່ຈະທຳການ ປ່ຽນແປງທາງດ້ານການເມືອງຢ່າງກວ້າງຂວາງ ສ້າງ ຄວາມຮັ່ງມີ ແລະເຮັດໃຫ້ອາເມຣິກາມີຄວາມປອດໄພຄືນໃໝ່ ໃນຄຳປາໄສ ທີ່ສ້າງຄວາມຕື່ນເຕັ້ນໃຫ້ແກ່ບັນດາຜູ້ຕາງໜ້າ ໃນມື້ທີສີ່ແລະກໍເປັນມື້ສຸດທ້າຍຂອງກອງປະຊຸມໃຫຍ່ແຫ່ງຊາດ ພັກ ທີ່ເມືອງ Cleveland. ນັກຂ່າວແຫ່ງຊາດຂອງວີໂອເອ Jim Malone ມີລາຍງານເພີ້ມເຕີມ ກ່ຽວກັບທ່ານ Trump ໃນຄ່ຳຄືນອັນຍິ່ງມະໂຫລານ ຈາກນະຄອນ Cleveland ຊຶ່ງ ກິ່ງສະຫວັນ ຈະນຳມາສະເໜີທ່ານ.
ມັນເປັນຊ່ວງເວລາທາງການເມືອງອັນຍິ່ງໃຫຍ່ສຸດຂອງທ່ານ Donald Trump ຢູ່ໃນເວທີຂອງແສງສີແລະທ່ານ Trump ກໍມີຄວາມກະຕືລືລົ້ນທີ່ຈະຍຶດເອົາມາ.
ທ່ານ Trump ຜູ້ສະໝັກເປັນປະທານາທິບໍດີພັກຣີພັບບລິກັນ ກ່າວວ່າ “ພ້ອມກັນແລ້ວ ພວກເຮົາຈະນຳພາພັກຂອງພວກເຮົາ ກັບຄືນສູ່ທຳນຽບຂາວ ແລະພວກເຮົາຈະນຳພາປະເທດຊາດຂອງພວກເຮົາກັບຄືນສູ່ຄວາມປອດໄພ ຄວາມ ຈະເລີນຮຸ່ງເຮືອງ ແລະ ຄວາມສະຫງົບສຸກ. ພວກເຮົາຈະເປັນປະເທດນຶ່ງທີ່ມີຄວາມເອື້ອເຟື້ອເພື່ອແຜ່ ແລະອົບອຸ່ນ ແຕ່ວ່າພວກເຮົາຍັງເປັນປະເທດທີ່ມີກົດ ໝາຍແລະມີລະບຽບວິໄນທີ່ເຄັ່ງຄັດ.”
ໂດຍມີຄອບຄົວຂອງທ່ານພາກັນນັ່ງເບິ່ງ ແລະຫລາຍພັນຄົນທີ່ເປັນສະມາຊິກພັກຣີພັບບລິກັນພາກັນຕື່ນເຕັ້ນຢູ່ໃນຫ້ອງປະຊຸມໃຫຍ່ນັ້ນ ທ່ານ Trump ໄດ້ຊອກຫາຊ່ອງທາງທີ່ຈະສ້າງຄວາມສາມັກຄີພາຍໃນພັກຫລັງຈາກທາງກອງປະຊຸມໃນບາງຄັ້ງໄດ້ມີການແຕກແຍກກັນ.
ແລະທ່ານຍັງໄດ້ກ່າວໂຈມຕີຄູ່ແຂ່ງຂອງທ່ານຈາກພັກເດໂມແຄຣັດ ອະດີດລັດ ຖະມົນຕີຕ່າງປະເທດ ທ່ານນາງ Hillary Clinton.
ທ່ານ Trump ກ່າວວ່າ “ຫຼັງຈາກສົງຄາມເປັນເວລາສິບຫ້າປີຢູ່ໃນພາກຕາເວັນອອກກາງ ຫລັງຈາກໄດ້ໃຊ້ຈ່າຍເງິນຫລາຍຕື້ໂດລາ ແລະຫຼາຍພັນຄົນໄດ້ເສຍຊີວິດໄປ ສະ ຖານະການຍັງໄດ້ຊຸດໂຊມລົງຕື່ມແບບທີ່ບໍ່ເຄີຍມີມາກ່ອນ. ນີ້ເປັນມໍລະດົກຕົກທອດຂອງທ່ານນາງ Hillary Clinton ນັ້ນຄືຄວາມຕາຍ ຄວາມຫາຍຍະນະ ການກໍ່ການຮ້າຍ ແລະຄວາມອ່ອນແອ.”
ໃນຕອນນຶ່ງຂອງການກ່າວຄຳປາໄສນັ້ນ ທ່ານ Trump ໄດ້ຖືກລົບກວນຈາກພວກປະທ້ວງ. ທ່ານ Trump ກ່າວວ່າ “ຕຳຫລວດຂອງພວກເຮົາຍິ່ງໃຫຍ່ສໍ່າໃດ? ແລະນຄອນ Cleveland ຍິ່ງໃຫຍ່ສໍ່າໃດ?
ແລະຕໍ່ມາ ທ່ານໄດ້ໃຫ້ຄຳໝັ້ນສັນຍາ ທີ່ຈະເອົາມາດຕະການແບບເດັດຂາດຕໍ່ ກ່ານອໍ່ອາຊະຍາກຳ.
ທ່ານ Trump ກ່າວວ່າ “ໃນການແຂ່ງຂັນເອົາທຳນຽບຂາວດັ່ງກ່າວນີ້ ຂ້າພະເຈົ້າເປັນ ຜູ້ສະໝັກ ທີ່ຈະປະຕິບັດຕາມ ລະບຽບກົດໝາຍຢ່າງເຄັ່ງຄັດ.”
ທ່ານ Trump ໄດ້ຖືກແນະນຳໂດຍລູກສາວຂອງທ່ານ ຄືຍານາງ Ivanka ຜູ້ທີ່ໄດ້ເວົ້າກ່ຽວ ກັບພໍ່ຂອງຍານາງ ເຖິງດ້ານທີ່ດີຂອງທ່ານ.
ຍານາງ Ivanka ກ່າວວ່າ“ພໍ່ຂອງຂ້າພະເຈົ້າບໍ່ພຽງແຕ່ເຂັ້ມແຂງ ແລະມີຄວາມສາມາດ ອັນຈຳເປັນ ທີ່ຈະເປັນປະທານາທິບໍດີຄົນຕໍ່ໄປຂອງພວກເຮົາ ແຕ່ຍັງມີ ຄວາມເມດຕາ ກະລຸນາ ແລະເຫັນອົກເຫັນໃຈ ທີ່ຈະຊ່ວຍໃຫ້ທ່ານເປັນຜູ້ນຳທີ່ປະ ເທດນີ້ຕ້ອງການ.”
ທ່ານ Trump ໄດ້ກ່າວຢ້ຳ ໃນການໃຫ້ຄຳໝັ້ນສັນຍາຂອງທ່ານ ທີ່ຈະສ້າງ ກຳແພງຢູ່ຊາຍ ແດນຕິດກັບເມັກຊິໂກ ການເຈລະຈາທີ່ຂຸ້ນຂ້ຽວກວ່າເກົ່າກ່ຽວ ກັບຂໍ້ຕົກລົງການຄ້າ ແລະ ການເອົາຊະນະກຸ່ມລັດອິສລາມ.
ແລະທ່ານໄດ້ມ້ວນທ້າຍຄຳປາໄສຂອງທ່ານ ດ້ວຍຄຳໝັ້ນສັນຍາ ຊຶ່ງບັດນີ້ໄດ້ເປັນທີ່ຄຸ້ນ ເຄີຍໃນການໂຄສະນາຫາສຽງ.
ທ່ານ Trump ກ່າວວ່າ “ເຖິງຊາວອາເມຣິກັນທັງມວນ ໃນຄ່ຳຄືນວັນນີ້ ຢູ່ໃນ ເມືອງໃຫຍ່ແລະເມືອງນ້ອຍທັງຫຼາຍຂອງພວກເຮົາ ຂ້າພະເຈົ້າຂໍໃຫ້ຄຳໝັ້ນສັນ ຍາດັ່ງກ່າວນີ້. ພວກເຮົາຈະເຮັດໃຫ້ອາເມຣິກາເຂັ້ມແຂງອີກຄັ້ງນຶ່ງ. ພວກເຮົາຈະເຮັດໃຫ້ອາເມຣິກາ “
ມີຄວາມພູມໃຈອີກຄັ້ງນຶ່ງ. ພວກເຮົາຈະເຮັດໃຫ້ອາເມຣິ ກາມີຄວາມປອດໄພອີກຄັ້ງນຶ່ງ ແລະພວກເຮົາຈະເຮັດໃຫ້ອາເມຣິກາ ຍິ່ງໃຫຍ່ ອີກຄັ້ງນຶ່ງ.”
ຢູ່ນອກຫ້ອງປະຊຸມໃຫຍ່ ພວກປະທ້ວງໄດ້ພາກັນສືບຕໍ່ໂຮມຊຸມນຸມ ເປັນມື້ທີສີ່ ແຕ່ໄດ້ຖືກ ຄວບຄຸມໄວ້ ໂດຍພວກເຈົ້າໜ້າທີ່ຕຳຫລວດເປັນຈຳນວນຫຼວງຫຼາຍ. ການເພັ່ງເລັງທາງ ການເມືອງ ບັດນີ້ ໄດ້ຫັນໄປສູ່ທ່ານນາງ Hillary Clinton ແລະພັກເດໂມແຄຣັດທີ່ຈະຈັດ ກອງປະຊຸມໃຫຍ່ມື້ນີ້ຢູ່ນະຄອນ Philadelphia. ບັນດາຜູ້ສະໜັບສະໜູນທ່ານນາງ Clinton ໄດ້ອອກການໂຄສະນາໃໝ່ ທີ່ສະ ແດງໃຫ້ເຫັນວ່າ ແຕ່ກ່ອນທ່ານ Trump ໄດ້ ຍ້ອງຍໍທ່ານນາງ Clinton.
ການໂຄສະນາຂອງກຸ່ມ Priorities USA ກ່າວວ່າ“ທ່ານນາງ Hillary Clinto ຂ້າພະ ເຈົ້າຄິດວ່າ ທ່ານເປັນຜູ້ຍິງທີ່ດີຫລາຍ ທ່ານນາງໄດ້ເຮັດວຽກ ໜັກອີ່ຫລີ ແລະຂ້າພະ ເຈົ້າຄິດວ່າ ເຮັດໜ້າທີ່ໄດ້ດີຫລາຍ.”
ບັດນີ້ກອງປະຊຸມໃຫຍ່ພັກຣິພັບບລີກັນທີ່ເມືອງ Cleveland ໄດ້ກາຍເປັນປະຫວັດສາດ ໄປແລ້ວ ທ່ານ Donald Trump ຫວັງວ່າຈະໄດ້ຂຽນອີກຢ່າງໜ້ອຍບົດນຶ່ງ ຢູ່ໃນປະຫວັດ ການເມືອງຂອງທ່ານໃນເດືອນພະຈິກຈະມາເຖິງນີ້.