ລິ້ງ ສຳຫລັບເຂົ້າຫາ

ອີຣ່ານ ກຳນົດ ຈະດຳເນີນຄະດີ ນັກຂ່າວສະຫະລັດ ໃນ ວັນທີ 26 ພຶດສະພານີ້


ທ່ານ Jason Rezaian ສັນຊາດອາເມຣິກັນ ເຊື້ອສາຍອີຣ່ານ ເປັນນັກຂ່າວຂອງໜັງສືພິມ Washington Post ຍິ້ມແຍ້ມ ໃນຂະນະທີ່ ໄປຮ່ວມງານໂຄສະນາຫາສຽງ ຂອງປະທານາທິບໍດີອີຣ່ານ ທ່ານ Hassan Rouhani ຢູ່ນະຄອນຫຼວງ ເຕຫະຣ່ານ.

ທ່ານ Jason Rezaian ສັນຊາດອາເມຣິກັນ ເຊື້ອສາຍອີຣ່ານ ເປັນນັກຂ່າວຂອງໜັງສືພິມ Washington Post ຍິ້ມແຍ້ມ ໃນຂະນະທີ່ ໄປຮ່ວມງານໂຄສະນາຫາສຽງ ຂອງປະທານາທິບໍດີອີຣ່ານ ທ່ານ Hassan Rouhani ຢູ່ນະຄອນຫຼວງ ເຕຫະຣ່ານ.

ນັກ​ຂ່າວ​ສະຫະລັດ​ຄົນ​ໜຶ່ງ ທີ່ຖືກ​ກັກ​ຂັງ​ຢູ່​ໃນ​ອີຣ່ານ ​ເກືອບ
​ປີ​ໜຶ່ງແລ້ວ ​ໃນ​ຂໍ້​ກ່າວ​ຫາ​ ​ທີ່ຮວມທັງທຳການເຄື່ອນ​ໄຫວ
​ສອດ​ແນມ ​ແມ່ນ​ມີ​ກຳ​ນົດ ທີ່​ຈະ​ໄປປາກົດ​ໂຕ​ຕໍ່​ສານ​ໃນ
​ອາ​ທິດ​ໜ້ານີ້.

ສື່​ມວນຊົນຂອງ​ທາງ​ການ​ອີຣ່ານ ກ່າວໃນ​ວັນ​ອັງຄານມື້​ນີ້ວ່າ
ການດຳ​ເນີນ​ຄະດີ​ ທ່ານ Jason Rezaian ຊຶ່ງ​ເປັນ​ຫົວໜ້າ
​ຫ້ອງການ ຂອງ​ໜັງສືພິມ Washington Post ປະຈຳ​
ນະຄອນຫຼວງ​ເຕຫະຣ່ານ ຈະ​ເລີ້ມ​ຕົ້ນຂຶ້ນ​ໃນ​ວັນອັງຄານ
​ທີ 26 ພຶດສະພາ.

ອົງການ​ຂ່າວ​ຝຣັ່ງ ​ໄດ້​ອ້າງ​ເຖິງ​ຄຳ​ເວົ້າຈາກທະນາຍ​ຄວາມ ຂອງ​ທ່ານ Rezaian ທີ່ກ່າວວ່າ
ທ່ານ Rezaian ພ້ອມ​ດ້ວຍພັນ​ລະ​ຍາ​ຂອງ​ທ່ານ ​ແລະບຸກຄົນ​ທີ​ສາມ ຊຶ່ງພວກ​ກ່ຽວໄດ້​ຖືກ​
ຈັບ​ກຸມພ້ອມ​ກັນ ເມື່ອເດືອນ ກໍລະກົດ​ປີ​ກາຍ​ນີ້ ຢູ່​ໃນ​ນະຄອນຫຼວງ​ເຕຫະຣ່ານນັ້ນ ຈະໄປ​
ປາກົດ​ໂຕຢູ່​ສານ ​ແລະວ່າການ​ດຳ​ເນີນ​ຄະດີ ຈະ​ເລີ້ມຕົ້ນຂຶ້ນ​ໃນ​ມື້​ດຽວ​ກັນ ຖ້າ​ຫາກ​ມີ​
ເວລາພຽງພໍ.

​ສະຫະລັດ ບັນດາ​ກຸ່ມ​ປົກປ້ອງເສລີພາບດ້ານການຂ່າວ​ ​ແລະ ໜັງສືພິມ Washington Post ຕ່າງກໍຕິຕຽນ ການ​ສືບຕໍ່ຄຸມ​ຂັງ​ທ່ານ Rezaian ຊຶ່ງ​ລວມທັງ 9 ​ເດືອນ​ທີ່​ປາດ​ສະ​ຈາກ
​ການ​ກ່າວ​ຫາໃດໆ. ສ່ວນ​ຄອບ​ຄົວ​ຂອງ​ທ່ານ ​ແລະ ບັນນາທິການ​ໃຫຍ່​ ຂອງ​ໜັງສື​ພິມ​ດັ່ງກ່າວ ທ່ານ Marty Baron ຍັງ​ໄດ້​ບັນຍາຍເຖິງ ການ​ຈຳກັດ​ບໍ່​ອະນຸຍາດໃຫ້​ທ່ານ
Rezaian ພົບ​ກັບທະນາຍຄວາມ​ອີກ​ດ້ວຍ.

​ເມື່ອ​ເດືອນ​ແລ້ວ​ນີ້ ​ໂຄສົກ​ກະຊວງ​ການ​ຕ່າງປະ​ເທດສະຫະລັດ ທ່ານ​ນາງ Maria Harf
ກ່າວ​ວ່າ ຂໍ້​ກ່າວ​ຫາໃນ​ການ​ທຳ​ຜິ​ດ​ໃນ 4 ກະ​ໂທ​ງ ນັ້ນ ​ແມ່ນ “ເປັນຕາ​ຢາກຫົວ ແທ້ໆ”
ແລະ ທຳນຽບຂາວ ກ່າວ​ວ່າ ຂໍ້ຫາເຫລົ່ານີ້ ຄວນ​ທີ່​ຈະ​ຖືກ​ຍົກເລີກ.

ຖ້າພົບເຫັນ​ວ່າມີ​ຄວາມ​ຜິດ ທ່ານ Rezaian ຈະ​ປະ​ເຊີນ​ກັບໂທດ​ໜັກສຸດ ​ຄືຈຳ​ຄຸກ ​ແຕ່ 10
ຫາ 20 ປີ.

ທ່ານ Rezaian ພ້ອມ​ດ້ວຍ​ພັນລະ​ຍາ ​ແລະ ນັກ​ຂ່າວທ່ານ Yeganeh Salehi ຖືກຈັບ​ກຸມ
ຫຼັງຈາກ​ກຳລັງ​ຮັກສາ​ຄວາມ​ປອດໄພອີຣ່ານ ບຸກ​ເຂົ້າໄປ​ໃນ​ເຮືອນ​ພັກ​ຂອງ​ພວກ​ກ່ຽວ ຢູ່​
ນະຄອນຫຼວງ​ເຕຫະຣ່ານ. ທ່ານ Salehi ​ໄດ້​ຖືກ​ປ່ອຍ​ໂຕ ຫຼັງຈາກ​ມີການປະກັນ​ໂຕ​ແລ້ວ
​ແຕ່​ທ່ານ Rezaian ຍັງ​ຖືກທາງການ​ຄວບ​ຄຸມ​ໂຕ​ຢູ່.

XS
SM
MD
LG