ລິ້ງ ສຳຫລັບເຂົ້າຫາ

ສະຫະລັດ ສະໜັບສະໜຸນ ການເລືອກຕັ້ງ ໃນໄທ (ສະໄລດ໌/ວີດີໂອ)

  • ດາຣາ ບັກ​ຄໍາ

ນາຍົກລັດຖະມົນຕີໄທ ສະແດງຄວາມຮູ້ສຶກສະເທືອນອາລົມ ແລະທໍ້ໃຈ ຫລັງຈາກຖະແຫລງຕໍ່ນັກຂ່າວ ຢູ່ບາງກອກ ເມື່ອວັນທີ 10 ທັນວາ 2013.

ນາຍົກລັດຖະມົນຕີໄທ ສະແດງຄວາມຮູ້ສຶກສະເທືອນອາລົມ ແລະທໍ້ໃຈ ຫລັງຈາກຖະແຫລງຕໍ່ນັກຂ່າວ ຢູ່ບາງກອກ ເມື່ອວັນທີ 10 ທັນວາ 2013.

ວັນອັງຄານວານນີ້ ລັດຖະບານໄທໄດ້ປະຕິເສດ
ອີກຄັ້ງນຶ່ງ ຕໍ່ຄໍາຮຽກຮ້ອງຈາກບັນດາຜູ້ນໍາຂອງພວກປະທ້ວງ
ທີ່ໃຫ້ລາອອກ ແລ້ວປ່ອຍໃຫ້ສະພາປະຊາຊົນ ທີ່ຖືກແຕ່ງຕັ້ງ
ເອົານັ້ນ ເຂົ້າມາບໍລິຫານປະເທດແທນ. Steve herman ຜູ້ສື່
ຂ່າວວີໂອເອ ທີ່ບາງກອກ ມີລາຍງານເລື້ອງນີ້ ຊຶ່ງດາຣາຈະນໍາ
ມາສະເໜີທ່ານ.


ນຶ່ງ​ມື້​ຫລັງ​ຈາກ​ທີ່​ນາຍົກລັດຖະມົນຕີ​ໄທ ທ່ານ​ນາງຢິ່ງລັກ ຊິນນະ
​ວັດ ​ໄດ້​ອອກ​ມາ​ປະກາດຍຸບ​ສະພາ ​ແລະ​ຮຽກ​ການ​ເລືອກ​ຕັ້ງ​ໃໝ່​
ຂຶ້ນ ກໍປະກົດ​ແລ​ເຫັນ​ໄດ້​ວ່າ ການ​ປະ​ທ້ວງ​ຢູ່​ຕາມ​ຖະໜົນ​ຫົນທາງ
​ໃນ​ເມືອງ​ຫລວງ​ບາງກອກ ຕໍ່ຕ້ານ​ລັດຖະບານ​ຂອງ​ທ່ານ​ນາງ​ນັ້ນ ​ໄດ້​ສ້າງ​ຄວາມ​ສະ​ເທືອ​ນ
ອາລົມ ​ແລະ​ຄວາມທໍ້​ໃຈ​ໃຫ້​ແກ່​ທ່ານ​ນາງ ຢ່າງ​ໃຫຍ່. ໃນ​ການ​ອອກ​ມາ​ຖະແຫລ​ງສັ້ນໆ​ຕໍ່​ນັກ​ຂ່າວ ທີ່​ຖືກ​ຖ່າຍ​ທອດ​ອອກໂທລະພາບ ​ໃນ​ວັນ​ອັງຄານ​ວານ​ນີ້ ທ່ານ​ນາງ​ໄດ້​ຮ້ອງ​ຂໍ​ເອົາ​ຄວາມ​ເຂົ້າອົກເຂົ້າ​ໃຈ ຈາກ​ປະຊາຊົນ​ວ່າ ທ່ານ​ນາງ​ຈະ​ຕ້ອງ​ໄດ້​ສືບ​ຕໍ່​ປະຕິບັດ​ໜ້າ​ທີ່ເປັນ
​ນາຍົກລັດຖະມົນຕີ​ຮັກສາ​ການ​ຊົ່ວຄາວ​ຕໍ່​ໄປ ຈົນ​ຮອດ​ມື້​ເລືອກ​ຕັ້ງ ​ຄື​ວັນ​ທີ 2 ກຸມພາ ປີໜ້າ
​ນັ້ນ ​ເຖິງ​ແມ່ນ​ມີ​ການ​ຮຽກຮ້ອງ​ຊໍ້າ​ແລ້ວ​ຊໍ້າ​ອີກຈາກ​ຝ່າຍຄ້ານ ​ໃຫ້​ທ່ານ​ນາງ​ລາ​ອອກໂດຍ
ທັນທີ​ກໍ​ຕາມ. ນາຍົກລັດຖະມົນຕີ​ໄທ ກ່າວ​ດ້ວຍ​ນໍ້າ​ສຽງ​ສັ່ນໆ​ວ່າ:

“ພວກ​ເຮົາ​ຈະ​ເປັນ​ແບບ​ນີ້​ກັນ​ຕໍ່​ໄປ​ບໍ? ຂ້າພະ​ເອງ​ກໍ​ໄດ້​ຖອຍ​ຈົນ​
ບໍ່​ມີ​ບ່ອນ​ຈະ​ຖອຍ​ແລ້ວ. ຂໍ​ຄວາມ​ເປັນ​ທໍາ​ນໍາ​ບັນດາ​ທ່ານ​ດ້ວຍ.”


ຂະນະ​ທີ່​ທ່ານ​ນາງ​ຢິ່ງລັກ ກ້າວ​ລົງ​ມາ​ຈາກ​ແທ່ນ​ກ່າວ​ຄໍາ​ປາ​ໄສ​ນັ້ນ ພວກ​ນັກ​ຂ່າວ​ສັງ​ເກດ​
ເຫັນ​ນໍ້າຕາ ​ ຢູ່ໃນ​ເບົ້າຕາ​ຂອງ​ທ່ານ​ນາງ. ຢູ່​ທາງ​ນອກ​ສະ​ໂມ​ສອນ​ຂອງ​ກອງທັບ ບ່ອນ​ທີ່​
ທ່ານ​ນາງ​ທໍາ​ການ​ພົບ​ປະ​ຫາລື​ກັບ​ຄະນະ​ລັດຖະບານ​ນັ້ນ ພວກ​ປະ​ທ້ວງ​ສືບ​ຕໍ່​ກົດ​ດັນ​ໃຫ້​
ທ່ານ​ນາງ ລົງ​ຈາກ​ອໍານາດ.

ໃນ​ມື້ກ່ອນ ຄື​ມື້​ວັນ​ຈັນ​ນັ້ນ ພວກ​ປະ​ທ້ວງ​ກ່ວາ 150 ພັນ​ຄົນ ​ໄດ້​ພາກັນ​ເດີນ​ຂະ​ບວນ ​ໄປ​ຍັງ​ທໍານຽບລັດຖະບານ ​ເພື່ອ​ສະ​ແດງ​ການ​ຄັດຄ້ານ​ຕໍ່​ອັນ​ທີ່​ເຂົາ​ເຈົ້າ​ກາ​ໜ້າ​ວ່າ ​ເປັນ​ອໍານາດ​ປົກຄອງ​ທີ່​ບໍ່​ຖືກຕ້ອງ​ຕາມກົດ ໝາຍ ທີ່​ຄວບ​ຄຸມ​ໂດຍ​ອ້າຍ​ຂອງ​ທ່ານ​ນາງ​ຢິ່ງລັກ ອະດີດ​ນາຍົກລັດ ຖະມົນຕີ​ ທັກສິນ ຊິນນະ​ວັດ ທີ່​ໄດ້​ຫລົບໜີ​ໄປ​ຢູ່​ຕ່າງປະ​ເທດ ​ເພື່ອຫລີກ​ລ່ຽງ​
ໂທດ​ຈໍາ​ຄຸກ ຍ້ອນ​ຖືກ​ຕັດສິນ​ວ່າ​ມີ​ຄວາມ​ຜິດ​ໃນ​ຂໍ້ຫາ​ສໍ້​ລາດ​ບັງ​ຫລວງ.


ໃນ​ຂະນະ​ທີ່​ລັດຖະບານ​ກະກຽມ​ຫ້າງ​ຫາ ສໍາລັບ​ການ​ເລືອກ​ຕັ້ງ ທີ່​ຈະ​ມີ​ຂຶ້ນ​ໃນ​ອີກ​ບໍ່​ຮອດ
60 ມື້ ຄື​ໃນ​ວັນ​ທີ 2 ກຸມພາ​ນັ້ນ ພວກ​ທີ່​ຄັດຄ້ານ​ຕໍ່ ທ່ານ​ນາງ​ຢິ່ງລັກ ກໍ​ສືບ​ຕໍ່​ຮຽກຮ້ອງ​ໃຫ້​
ຈັດ​ຕັ້ງ​ສະພາ​ປະຊາຊົນ​ຂຶ້ນ​ມາ ບໍລິຫານ​ປະ​ເທດ​ແທນ​ລັດຖະບານ​ຂອງ​ທ່ານ​ນາງ.

ສະພາບ​ການ​ບໍ່​ໄປ​ບໍ່​ມາ​ທາງ​ການ​ເມືອງ​ຂອງ​ໄທ ຊຶ່ງ​ເປັນ​ນຶ່ງ​ໃນ​ບັນດາ​ປະ​ເທດ​ທີ່​ມີ​ການ​
ເປີດ​ກ້ວາງ​ທາງ​ການ​ເມືອງ ຫລາຍ​ກ່ວາ​ປະ​ເທດ​ອື່ນໆ​ໃນ​ຂົງ​ເຂດ​ເອ​ເຊຍ​ຕາ​ເວັນ​ອອກສຽງ​
ໃຕ້​ນັ້ນ ​ໄດ້​ສ້າງ​ຄວາມ​ເປັນ​ຢູ່​ໃນ​ຕ່າງປະ​ເທດ. ກະຊວງ​ການ​ຕ່າງປະ​ເທດ​ສະຫະລັດ ​ໄດ້​
ອອກ​ຄໍາ​ຖະ​ແຫລ​ງສະບັບ​ນຶ່ງ ສະໜັບສະໜຸນ​ຂັ້ນ​ຕອນ​ປະຊາທິປະ​ໄຕ ຢູ່​ໃນ​ໄທ ​ໂຮມ​ທັງ​
ການ​ເລືອກ​ຕັ້ງ​ນັ້ນ. ​ໂຄສົກ​ກະຊວງ​ຕ່າງປະ​ເທດ ທ່ານ​ນາງ Jen Psaki ກ່າວ​ວ່າ ວໍ​ຊິງ​ຕັນ​
ຢາກ​ເຫັນ​ສະຖານະ​ການ​ຖືກ​ແກ້​ໄຂ ​ໂດຍ​ປາດ​ສະ​ຈາກ​ຄວາມ​ຮຸນ​ແຮງ​ໃດໆ​ຕື່ມ​ອີກ. ​
ໂຄສົກ Psaki ​ເວົ້າ​ວ່າ:

“ຈຸດ​ສຸມ​ຂອງ​ພວກ​ເຮົາ​ໃນ​ເລື້ອງ​ນີ້ ກໍ​ຄື​ສືບ​ຕໍ່​ຊຸກຍູ້​ໃຫ້​ມີ​ການ​ແກ້​ໄຂ​ແບບ​ສັນຕິ
ກ່ຽວ​ກັບ​ສິ່ງ​ທີ່​ກໍາລັງ​ດໍາ​ເນີນ​ໄປ​ຢູ່​ໃນ​ໄທ​ນັ້ນ ​ແລະ​ແນ່​ນອນ​ວ່າ ພວກ​ເຮົາ​ກໍາລັງ​ຕິດຕາມ​ເບິ່ງ​ສະຖານະ​ການ​ຢ່າງ​ໃກ້ຊິດ ດັ່ງ​ທີ່​ຄໍາ​ຖະ​ແຫລ​ງຂອງ​ພວກ​ເຮົາ​ເປັນ​
ຫລັກ​ຖານ​ໄດ້​ດີ ​ແຕ່​ກໍ​ບໍ່​ໄດ້​ໝາຍ​ຄວາມ​ ວ່າ ພວກ​ເຮົາ​ໃຫ້ການ​ສະໜັບ​ສະ​ໜຸນ
​ແກ່​ຝ່າຍ​ໃດ​ຝ່າຍ​ນຶ່ງ​ໂດຍ​ສະເພາະ​ ໃນ​ເລື້ອງ​ນີ້.”


ທີ່​ປັກ​ກິ່ງ ​ໂຄາກ​ກະຊວງ​ການ​ຕ່າງປະ​ເທດ​ຈີນ ທ່ານ Hong Lei ກໍ​ໄດ້​ສະແດງ​ການ​ສະໜັບ​ສະໜຸນ ຕໍ່​ການ​ເລືອກ​ຕັ້ງ​ເຊ່ນ​ກັນ ​ໂດຍ​ກ່າວ​ວ່າ:

“​ໃນ​ຖານະ​ເປັນ​ປະ​ເທດ​ເພື່ອນ​ບ້ານ​ທີ່​ເປັນ​ມິດ​ກັບ​ໄທ​ນັ້ນ ຈີນ​ຫວັງ​ວ່າການ​
ເລືອກ​ຕັ້ງ​ຈະ​ດໍາ​ເນີນ​ໄປຢ່າງ​ລາຍ​ລື່ນ ​ແລະ​ຈີນ​ຢາກ​ເຫັນ​ທຸກ​ພັກ​ຝ່າຍ​ປະຕິ
ບັດ​ການ ຢູ່​ພາຍ​ໃນ​ຂອບ​ເຂດ​ຂອງ​ລັດຖະທໍາ​ມະນູນ ​ແລະ​ກົດໝາຍ.”


ບໍ່​ເປັນ​ທີ່​ແຈ້ງ​ຂາວ​ໃນ​ເວລາ​ນີ້​ເທື່ອ​ວ່າ ຝ່າຍ​ຄ້ານ​ຈະ​ຂໍ້​ວາ​ບາດ​ ການ​ເລືອກ​ຕັ້ງ​ຫລື​ບໍ່ ຊຶ່ງ​ເຂົາ​ເຈົ້າ​ກ່າວ​ວ່າ ​ເຂົາ​ເຈົ້າ​ຈະ​ເປັນ​ຝ່າຍ​ເສຍ​ປຽບ​ຕາມ​ເຄີຍ.

ທ່ານ​ສຸ​ເທບ ​ເທືອ​ກສຸບັນ ຜູ້​ນໍາ​ຝ່າຍ​ຄ້ານ​ຄົນ​ນຶ່ງ ທີ່​ໄດ້​ລາ​ອອກ​ຈາກ​ພັກ​ປະຊາທິປັດ ​ໄດ້​
ຮຽກຮ້ອງ​ໃຫ້​ບັນດາ​ລັດຖະກອນ ​ໄປ​ລາຍ​ງານ​ໂຕ​ຕໍ່​ກຸ່ມ​ປະ​ທ້ວງ ​ແທນ​ທີ່​ຈະ​ໄປ​ຫາ​ລັດຖະ
ບານ. ນອກ​ນີ້ ທ່ານ​ສຸ​ເທດ ຊຶ່ງ​ປະ​ເຊີນ​ກັບ​ການ​ຖືກ​ຈັບ ​ໃນຂໍ້​ຫາ​ກໍ່​ກະບົດ​ນັ້ນ ຍັງ​ໄດ້​ຮຽກ
ຮ້ອງ​ໃຫ້​ມີ​ການ ຈັດ​ຕັ້ງ​ກໍາລັງ​ອາສາ​ສະມັກ​ຮັກສາ​ຄວາມ​ປອດ​ໄພ​ຂອງ​ຄຸ້ມ​ບ້ານ​ຂຶ້ນ ມາ
ເພື່ອ​ຮັກສາ​ຄວາມ​ສະ​ງົບ ​ແທນ​ຕໍາຫລວດ​ທີ່​ທ່ານ​ກ່າວ​ວ່າ ສໍ້​ລາດບັງ​ຫລວງ ກັບ​ເຂົ້າ​ຂ້າງ​
ແລະ​ປ້ອງ​ກັນ​ລັດຖະບານ​ຊຸດ​ປັດຈຸບັນ​ນັ້ນ.

ເບິ່ງລາຍງານວີດີໂອ ຂອງ Steve Herman ກ່ຽວກັບການເມືອງໄທ:

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG