ບັນດາເຈົ້າໜ້າທີ່ທະຫານໄທ ຍອມຮັບວ່າ ການທຸຈະລິດ
ຄໍຣັບຊັ່ນ ໃນບັນດາເຈົ້າໜ້າທີ່ປົກຄອງ ແລະພວກຄົນກາງ
ຫລືນາຍໜ້າ ພ້ອມທັງ ການຂາດການບັງຄັບໃຊ້ກົດໝາຍ
ຕໍ່ຕ້ານການຄ້າມະນຸດ ໄດ້ເຮັດໃຫ້ ລາດຊະອານາຈັກໄທ
ຖືກຈັດໃຫ້ເປັນປະເທດໜຶ່ງ ທີ່ກະທຳຜິດຢ່າງ ຮ້າຍແຮງທີ່
ສຸດ ໃນເລື້ອງການບັງຄັບໃຊ້ ຫຼື ກົດຂີ່ເອົາຮັດເອົາປຽບແຮງ
ງານຕ່າງດ້າວ. ຂະນະທີ່ປະເທດໄທກຳລັງພະຍາຍາມລົບ
ລ້າງ ພາບພົດອັນນັ້ນຂອງຕົນ ແລະ ຮັກສາພວກແຮງງານ
ທີ່ມີຄຸນຄ່າຕໍ່ເສດຖະກິດ ຂອງຕົນໄວ້ນັ້ນ ຜູ້ສື່ຂ່າວວີໂອເອ
Steve Herman ໄດ້ໄປເບິ່ງ ບ່ອນທີ່ເຈົ້າໜ້າທີ່ໄດ້ຈັດຕັ້ງ
ສູນບໍລິການ“ຈຸດດຽວ” ຂຶ້ນມາ ເພື່ອຈົດທະບຽນແຮງງານ
ຕ່າງດ້າວ ຢູ່ຈັງຫວັດສະມຸດສາຄອນ ຊຶ່ງໄຊຈະເລີນສຸກ
ຈະນຳມາສະເໜີທ່ານ.
ເບິ່ງວີດີໂອ ພາສາລາວ ກ່ຽວກັບລາຍງານນີ້:
ເພື່ອສະແດງໃຫ້ເຫັນວ່າ ອຳນາດປົກຄອງທະຫານໄທ ໃຫ້ຄວາມສຳຄັນສູງແນວໃດ ຕໍ່ການ
ປາບປາມການຄ້າມະນຸດນັ້ນ ເສນາທິການທະຫານບົກ ນາຍພົນເອກ ສິຣິໄຊ ດິດຖະກຸລ ໄດ້ໄປມີໜ້າ ໃນມື້ເປີດສູນບໍລິການຈົດທະບຽນແຮງງານ ຕ່າງດ້າວໃໝ່ແຫ່ງໜຶ່ງ ເມື່ອວັນທີ 30 ມິຖຸນາ ຜ່ານມານີ້.
ປະມານ 2,000 ຄົນ ສ່ວນຫຼາຍແມ່ນແຮງງານຈາກປະເທດມຽນມາ ໄດ້ໄປຈົດທະບຽນ ທີ່
ສູນດັ່ງກ່າວໃນມື້ທຳອິດນັ້ນ. ພວກເຂົາໄດ້ຖືກຖ່າຍຮູບໄວ້ ແປະໂປ້ມື ແລະສາຍແສງເອັກ
ສະເຣ ແລະໄດ້ໃຫ້ຕົວຢ່າງເລືອດ ກັບ ປັດສະວະ ຫລື ຍ່ຽວ ເພື່ອເອົາໄປກວດ. ເພື່ອເປັນ
ການແລກປ່ຽນ ພວກເຂົາເຈົ້າໄດ້ຮັບບັດແຮງງານປະຈຳຕົວ ຊົ່ວຄາວ. ຖ້າຫາກວ່າ ພວກ
ເຂົາເຈົ້າຜ່ານການກວດດ້ານພື້ນຖານ ຄວາມເປັນມາ ແລະດ້ານການແພດແລ້ວ ພວກເຂົາ
ຈະໄດ້ຮັບໃບຢັ້ງຢືນໃຫ້ເຮັດວຽກໃນປະເທດໄທ ຕໍ່ໄປໄດ້.
ຄາດຄະເນກັນວ່າ ມີແຮງງານກຳປູເຈຍປະມານ 200,000 ຄົນໄດ້ພາກັນໜີອອກຈາກໄທ
ຕັ້ງແຕ່ມື້ກໍ່ລັດຖະປະຫານ ເມື່ອວັນທີ 22 ພຶດສະພາ ຍ້ອນຢ້ານການປາບປາມ ແຮງງານ
ຕ່າງດ້າວທັງໝົດ ທັງພວກທີ່ມີເອກະສານ ຖືກຕ້ອງ ຫຼື ບໍ່ມີເອກະສານ.
ອຳນາດປົກຄອງທະຫານ ຖິ້ມໂທດໃສ່ພວກເຈົ້າໜ້າທີ່ໄທທີ່
ທຸຈະລິດ ວ່າເປັນຜູ້ປ່ອຍຂ່າວລືຕ່າງໆ ທີ່ພາໃຫ້ພວກແຮງງານ
ຕ່າງຊາດແຕກຕື່ນ ໜີອອກໄປ ເພື່ອທີ່ພວກເຂົາເຈົ້າຈະສາມາດ
ຮຽກຮ້ອງເອົາເງິນ ເວລາພວກແຮງງານກຳປູເຈຍກັບຄືນເຂົ້າມາ
ໄທໃນທີ່ສຸດນັ້ນ.
ນາຍພົນ ສິຣິໄຊ ດິດຖະກຸລ ເອີ້ນເຫດການນີ້ ວ່າເປັນຄວາມ
ເຂົ້າໃຈ ຜິດຂ້າມຊາຍແດນຄັ້ງໃຫຍ່.
ນາຍພົນ Sirichai Distakul ເວົ້າວ່າ “ພວກເຮົາໄດ້ອະນຸຍາດໃຫ້ພວກເຂົາເຈົ້າກັບ
ຄືນມາ ຈຳນວນໜຶ່ງແລ້ວ ໂດຍທີ່ບໍ່ມີໜັງສືເດີນທາງຫຍັງເພາະວ່າ ພວກປະກອບ
ການທັງຫຼາຍ ຈະມີບັນຫາ ໃນການດຳເນີນທຸລະກິດຂອງພວກເຂົາເຈົ້າ ຖ້າຫາກ
ພວກແຮງງານເຫຼົ່ານັ້ນ ບໍ່ມາຢູ່ໜີ້.”
ຄົນງານກໍ່ສ້າງ ທ້າວ Sam Phai ເປັນຜູ້ໜຶ່ງໃນໝູ່ແຮງງານກຳປູເຈຍ ຈຳນວນນ້ອຍໆ
ທີ່ບໍ່ໄດ້ໜີອອກໄປ.
ທ້າວ Sam Phai ເວົ້າວ່າ “ຂ້ອຍບໍ່ຢາກກັບຄືນເມືອບ້ານ. ຂ້ອຍຮູ້ວ່າ ມັນເປັນການ ຍາກຫຼາຍ ທີ່ຈະກັບຄືນເຂົ້າມາທີ່ນີ້ອີກ ຖ້າຂ້ອຍອອກໄປແລ້ວ. ຂ້ອຍຍາກເຮັດວຽກ
ຢູ່ໜີ້ຕໍ່ໄປ. ນາຍຈ້າງຂ້ອຍບອກຂ້ອຍວ່າ ຂ້ອຍສາມາດຢູ່ໜີ້ໄດ້ ຄັນຂ້ອຍໄດ້ຮັບບັດ ແຮງງານໃໝ່ນີ້. ມັນຈະອຳນວຍໃຫ້ນາຍຈ້າງ ຂອງຂ້ອຍ ປ້ອງກັນບໍ່ໃຫ້ ຕຳຫລວດ
ຈັບຂ້ອຍໄປ ຖ້າມີການກວດຄົ້ນ.”
ຄວາມຄາດ ຫວັງກໍແມ່ນວ່າ ລະບົບໃໝ່ນີ້ ໃນແບບທະຫານ
ຈະຄ່ອຍໆ ປູກຝັງ ໃຫ້ມີກົດລະບຽບ ແລະ ຄວາມສັດຊື່. ບັນດາ
ເຈົ້າໜ້າທີ່ກວດຄົນເຂົ້າເມືອງ ບອກກັບ ວີໂອເອ ວ່າ ພວກເຂົາ
ເຈົ້າຄາດໝາຍວ່າ ຈະຫັນປ່ຽນ 90 ເປີເຊັນ ຂອງແຮງງານຕ່າງ
ຊາດທີ່ບໍ່ໄດ້ຂຶ້ນທະບຽນ ໃນໄທ ໃຫ້ໄດ້ຮັບສະຖານະພາບ ທີ່
ຖືກຕ້ອງຕາມກົດໝາຍ.
ທ່ານ Athit Boonyasopat ຜູ້ວ່າການຈັງຫວັດສະມຸດສາຄອນ ເວົ້າວ່າ “ໂດຍລວມແລ້ວ ຖ້າພວກເຮົາເຮັດຕາມຂັ້ນຕອນ ມັນກໍຈະບໍ່ມີການທຸຈະລິດ. ຢູ່ໃນຂັ້ນຈັງຫວັດນັ້ນ ພວກເຮົາຢຶດໝັ້ນປະຕິບັດນະໂຍບາຍ ທີ່
ວາງອອກໂດຍ ຄະນະຮັກສາຄວາມສະຫງົບແຫ່ງຊາດ ຄສຊ ຫຼື National Council
for Peace and Order. ມັນໂປ່ງໃສສົມຄວນ.”
ທ້າວ Myint Aung ຊາວມຽນມາຈາກລັດ Rakhine ໃນມຽນມາ ໄດ້ເຮັດວຽກງານກໍ່ສ້າງ
ຢູ່ໃນໄທ ເປັນເວລາ 2 ປີ ມາແລ້ວ. ລາວເອງກໍມີຄວາມຫວັງສູງ ກັບລະບົບໃໝ່ນີ້.
ທ້າວ Myint Aung ເວົ້າວ່າ “ລະບັບເກົ່ານັ້ນ ມັນທຸຈະລິດ. ພວກເຮົາຕ້ອງອາໃສ
ພວກນາຍໜ້າເພື່ອຂໍເອົາບັດປະຈຳຕົວ ໃຫ້ພວກເຮົາ. ແຕ່ຕຳຫລວດກໍຍັງຮຽກຮ້ອງ
ເອົາຄ່າສິນບົນອີກ ເວລາທີ່ພວກເຮົາເອົາບັດຂອງພວກເຮົາໃຫ້ເບິ່ງ. ຂ້ອຍໄດ້ຍິນ
ວ່າ ບັດປະຈຳຕົວໃໝ່ນີ້ ຈະຊ່ວຍຫຼາຍ ແລະ ປອດໄພ.”
ອີກສິ່ງໜຶ່ງ ທີ່ເປັນແຮງຈູງໃຈ ໃຫ້ນຳໃຊ້ລະບົບໃໝ່ນີ້ ກໍຄື: ພວກແຮງງານບໍ່ມີເອກະສານ ທີ່ມາຈົດທະບຽນ ຈະບໍ່ໄດ້ຮັບການ ນີລະໂທດກຳ ແລະ ນາຍຈ້າງ ຜູ້ທີ່ນຳແຮງງານຂອງ
ຕົນ ມາສູນບໍລິການຈົດທະບຽນ ຈຸດດຽວນັ້ນ ກໍຈະບໍ່ຖືກລົງໂທດເຊັ່ນກັນ.
