ເຈົ້າໜ້າທີ່ໄທກ່າວວ່າ ການໂຈມຕີຮ້າຍແຮງ ທີ່ສານເຈົ້າ
ໃນສັບປະດານີ້ ຢູ່ບາງກອກ ປະເທດໄທ ແມ່ນມີທ່າທາງວ່າ
ເປັນການວາງແຜນທີ່ມີຜູ້ສົມຮູ້ຮ່ວມຄິດນຳກັນຢ່າງນ້ອຍ 10 ຄົນ
ຊຶ່ງຮວມທັງຊາວຕ່າງຊາດຈຳນວນນຶ່ງ ແລະເຊື່ອກັນວ່າ ບໍ່ແມ່ນ
ເປັນການໂຈມຕີໂດຍ ກຸ່ມກໍ່ການຮ້າຍນາໆຊາດ.
ທ່ານພັນເອກ Winthai Suvaree ໂຄສົກຂອງພວກທະຫານ
ທີ່ປົກຄອງປະເທດຢູ່ໃນເວລານີ້ ໄດ້ກ່າວໃນຖະແຫຼງການທີ່ອອກ
ທາງໂທລະພາບໃນວັນພະຫັດມື້ນີ້ວ່າ: “ເຫດລະເບີດທີ່ວ່ານີ້
ບໍ່ຊົງວ່າ ຈະພົວພັນກັບກຸ່ມກໍ່ການຮ້າຍນາໆຊາດ.”
ນອກນັ້ນທ່ານຍັງໄດ້ກ່າວວ່າ “ຊາວຈີນ ບໍ່ແມ່ນເປົ້າໝາຍໂດຍກົງ” ຂອງການໂຈມຕີໃນເຊົ້າວັນຈັນຜ່ານມານີ້ ທີ່ສານເຈົ້າເອຣະວັນ ຊຶ່ງເປັນທີ່ນັບຖືຂອງພວກນັກທ່ອງທ່ຽວຊາວຈີນແລະຊາວຕ່າງປະເທດນັ້ນ.
ກ່ອນໜ້ານີ້ ຜູ້ບັນຊາການຕຳຫຼວດແຫ່ງຊາດ ທ່ານ Somyot Poompanmoung ໄດ້ກ່າວວ່າ ມີຢ່າງນ້ອຍ 10 ຄົນ ໄດ້ຊ່ອຍກັນວາງແຜນການໂຈມຕີຄັ້ງນີ້ ທີ່ໄດ້ສັງຫານຢ່າງນ້ອຍ 22 ຄົນ ແລະບາດເຈັບອີກຫຼາຍຮ້ອຍຄົນ. ທ່ານຍັງໄດ້ກ່າວວ່າ ກຸ່ມດັ່ງກ່າວ ໄດ້ວາງແຜນເພື່ອໂຈມຕີດ້ວຍລະເບີດຄັ້ງນີ້ປະມານນຶ່ງເດືອນລ່ວງໜ້າ.
ໃນວັນພຸດວານນີ້ ລັດຖະບານໄດ້ອອກໝາຍຈັບ ແລະຮູບແຕ້ມ ຂອງຊາຍຊາວຕ່າງດ້າວ ທີ່ເຊື່ອກັນວ່າ ເປັນຜູ້ວາງລະເບີດໂຈມຕີ ໃນວັນຈັນແລ້ວ ທີ່ສານເຈົ້າເອຣະວັນ.
ຮູບແຕ້ມຂອງຕຳຫຼວດ ສະແດງໃຫ້ເຫັນວ່າ ຜູ້ຊາຍຄົນດັ່ງກ່າວ ມີຜົມຍາວດຳກູດບໍ່ເປັນລະ ບຽບ ແລະໃສ່ແວນຕາມົນ ຂອບເປັນປລາສຕິກ. ພວກເຈົ້າໜ້າທີ່ ສະເໜີໃຫ້ເງິນລາງວັນ 28,000 ໂດລາ ແກ່ຜູ້ໃດກໍຕາມທີ່ມີຂໍ້ມູນ ນຳໄປສູ່ການຈັບກຸມຜູ້ຕ້ອງສົງໄສຄົນນີ້.
ຊາຍໜຸ່ມຮ່າງສູງ ຜອມ ທີ່ສວມໃສ່ເສື້ອຍືດສີເຫຼືອງ ໄດ້ປາກົດໃຫ້ເຫັນຢູ່ໜ້າຈໍກ້ອງວົງຈອນປິດ ໄດ້ຍ່າງອອກໄປຈາກສະຖານທີ່ເກີດເຫດຢ່າງສະງົບງຽບ ຫຼັງຈາກທີ່ໄດ້ວາງຖົງເປ້ທີ່ລາວພາຍໄປ ໄວ້ກ້ອງມ້ານັ່ງ ກ່ອນທີ່ມັນຈະລະເບີດຂຶ້ນນັ້ນ.
ເຈົ້າໜ້າທີ່ຕຳຫຼວດ ກ່າວວ່າ ມີຢ່າງນ້ອຍອີກ 2 ຄົນ ຊຶ່ງຜູ້ນຶ່ງໃສ່ເສື້ອສີແດງ ແລະອີກຜູ້ນຶ່ງໃສ່ເສື້ອສີຂາວ ທີ່ເຫັນຢູ່ໃນກ້ອງວົງຈອນປິດນັ້ນ ກໍຖືວ່າເປັນພວກຕ້ອງສົງໄສໃນການໂຈມຕີຄັ້ງນີ້.
ພົນຕີ Apichart Suriboonya ໄດ້ບອກກັບ ອົງການຂ່າວຝຣັ່ງໃນວັນພະຫັດມື້ນີ້ວ່າ ລັດ ຖະບານໄທ ຈະຂໍຄວາມຊ່ອຍເຫຼືອຈາກໜ່ວຍງານຕຳຫຼວດນາໆຊາດ ເພື່ອຕາມລ່າຫາໂຕ ພວກຕ້ອງສົງໄສ ທີ່ທຳການໂຈມຕີຄັ້ງນີ້.
