ນາຍົກລັດຖະມົນຕີໄທກ່າວວ່າ ປະເທດໄທກຳລັງປະເຊີນກັບວິກິດການໄພນໍ້າຖ້ວມຢ່າງຮ້າຍ
ແຮງແລະເຂດນະຄອນຫຼວງບາງກອກກໍຈະໄດ້ຮັບຜົນກະທົບນຳດ້ວຍ.
ທ່ານນາງຍິ່ງລັກ ຊິນນະວັດກ່າວໃນຄຳປາໄສທາງໂທລະພາບໃນມື້ວັນສຸກວານນີ້ວ່າ ມີ 252 ຄົນໃນທົ່ວປະເທດໄດ້ເສຍຊີວິດໄປແລ້ວເນື່ອງຈາກໄພນໍ້າຖ້ວມ ຍ້ອນຝົນຕົກໜັກມາໄດ້ສອງ
ເດືອນກວ່າໆ. ທ່ານນາງເຕືອນວ່າໄພນໍ້າຖ້ວມຮ້າຍແຮງພວມຈະມີຜົນກະທົບໂດຍກົງຕໍ່ເຂດ
ບາງກອກ.
ພວກເຈົ້າໜ້າທີ່ໄທພວມພາກັນຟ້າວຟັ່ງສ້າງຄູກັ້ນນໍ້າຢູ່ຕາມແຄມລຳຄອງແລະແມ່ນໍ້າໃນເຂດ
ຊານເມືອງ ທາງກໍ້າເໜືອຂອງບາງກອກ ຂະນະນໍ້າໃນປະລິມານມະຫາສານພວມໄຫຼລົງມາ
ທາງໃຕ້.
ໄດ້ມີການດຳເນີນຄວາມພະຍາຍາມຕ່າງໆ ເພື່ອປ້ອງກັນບໍ່ໃຫ້ອະນຸສາວະລີທີ່ເກົ່າແກ່ແລະ ອຸດສາຫະກຳທີ່ສຳຄັນໆຖືກນໍ້າຖ້ວມ. ທາງກອງທັບຂອງໄທ ກໍໄດ້ສົ່ງພວກທະຫານອອກ ໄປຊ່ອຍພວກປະສົບໄພແລະຄ້າຍທະຫານແຫ່ງຕ່າງໆກໍໄດ້ເປີດໃຫ້ພວກທີ່ຖືກຍົກຍ້າຍໜີ
ຈາກເຮືອນຊານເຂົ້າໄປອາໄສຢູ່.
ລະດັບນໍ້າທີ່ຖີບໂຕສູງຂຶ້ນກຳລັງຂົ່ມຂູ່ເມືອງຫຼວງເກົ່າອະຍຸດທະຍາຂອງໄທຊຶ່ງເປັນສະຖານ ທີ່ມໍລະດົກໂລກຂອງອົງການສະຫະປະຊາຊາດແລະພວກເຈົ້າໜ້າມີຄວາມຢ້ານກົວວ່າ ວັດ ໄຊວັດທະນາຣາມຊຶ່ງມີອາຍຸຫຼາຍຮ້ອຍປີແລ້ວນັ້ນ ອາດຈະໄດ້ຮັບຄວາມເສຍຫາຍຢ່າງເປັນ
ການຖາວອນ.
ເຈົ້າໜ້າທີີ່ຂອງອົງການ UNESCO ທີ່ບາງກອກກ່າວວ່າ ພວກຕົນອາດຈະຮ້ອງຂໍການ
ຊ່ອນເຫຼືອສຸກເສີນສຳລັບວັດເກົ່າແກ່ແຫ່ງນີ້.
ພວກນັກພະຍາກອນອາກາດຂອງໄທກ່າວວ່າ ຄາດວ່າຈະມີຝົນຕົກຕື່ມອີກໃນໄລຍະສອງ ສາມມື້ຂ້າງໜ້ານີ້ແລະເບິ່ງຊົງວ່າສະຖານະການຈະຮ້າຍແຮງລົງຕື່ມ.
