ພາບຄວາມເສຍຫາຍໜັກອັນນຶ່ງຈາກໄພນໍ້າຖ້ວມປີ 2011 ທີ່ສ້າງຄວາມຫາຍະນະຂອງໄທ
ທີ່ບໍ່ລືມເລືອນໄດ້ ກໍຄືແຖວລົດ Honda ທີ່ເຫັນແຕ່ຫລັງຄາສີຂາວ ຢູ່ເທິງໜ້ານໍ້າຂຸ່ນດໍາຂອງ
ນໍ້າຖ້ວມໂຮງງານ ທີ່ຈັງຫວັດອະຢຸດທະຢາ ຫ່າງຈາກເມືອງຫລວງບາງກອກ ໄປທາງທິດ
ເໜືອພຽງ 60 ຫລັກກິໂລແມດ.
ບັດນີ້ ຫລັງຈາກທີ່ໄດ້ໃຊ້ເວລາທໍາຄວາມສະອາດມ້ຽມມັດຜັດສີມາໄດ້ສາມສີ່ເດືອນ ແລະໃຊ້
ຈ່າຍເງິນຫລາຍລ້ານໂດລາ ເພື່ອປ່ຽນຫຸ່ນຍົນແລະເຄຶ່ອງຈັກຕ່າງໆນັ້ນແລ້ວ ໂຮງງານມູນຄ່າ
700 ລ້ານໂດລາແຫ່ງນີ້ ກໍພ້ອມທີ່ຈະເປີດດໍາເນີນການຜະລິດລົດຄືນອີກ.
ນາຍ ພີຣະພັດ ກະໜົກນາກ ຜູ້ຈັດການໂຮງງານຜະລິດລົດຍົນ Honda ຫວັງຢ່າງຍິ່ງວ່າ
ໃນບໍ່ຊ້ານີ້ ໂຮງງານແຫ່ງນີ້ກໍຈະສາມາດຜະລິດລົດໃຫ້ໄດ້ປະມານ 240,000 ຄັນຕໍ່ປີ ເພື່ອ
ໃຫ້ພຽງພໍກັບຄວາມຮຽກຮ້ອງຕ້ອງການ ທີ່ເພິ່ມທະວີຂຶ້ນໃນທົ່ວຂົງເຂດເອເຊຍ. ລາວເວົ້າວ່າ:
“ແມ່ນແລ້ວ ມັນເປັນການເລິ່ມຕົ້ມໃໝ່ອີກສໍາລັບພວກເຮົາ ເພາະວ່າທຸກໆຄົນໄດ້ຊ່ວຍກັນ
ສ້າງສາກອບກູ້ບໍລິສັດຄືນມາໃໝ່ ດ້ວຍເຫື່ອແຮງຂອງແຕ່ ລະຄົນ.”
ທ່ານ Horoshi Kobayashi ປະທານແລະຫົວໜ້າບໍລິຫານບໍລິສັດ Asia Honda ຍານຍົນ
ກ່າວວ່າ ການທໍາຄວາມສະອາດມ້ຽນມັດຜັດສີໂຮງງານໃຫ້ຄືນສູ່ສະພາບເດີມ ທີ່ໃຊ້ເວລາດົນ
ກວ່າສາມເດືອນນັ້ນ ໄດ້ເປັນການທ້າທາຍອັນໃຫຍ່ຫລວງ ເກີນກວ່າຈະອະທິບາຍໄດ້.
“ເພື່ອຈະເຮັດໃນສິ່ງນີ້ ພວກເຮົາຕ້ອງໄດ້ຮ້ອງຂໍໄປຍັງຜູ້ປ້ອນວັດຖຸ ຜູ້ຜະລິດເຄຶ່ອງຈັກແລະ
ບັນດາຜູ້ຮ່ວມງານຂອງພວກເຮົາ ໃຫ້ຊ່ວຍກັນທໍາຄວາມສະອາດ ມ້ຽນມັດທຸກສິ່ງຢ່າງ.
ດັ່ງນັ້ນ ມັນເປັນການທ້າທາຍໃຫຍ່ຫລາຍ ຄືເຄຶ່ອງຈັກກົນໄກຕ່າງໆໃນໂຮງງານໄດ້ຖືກ
ທໍາລາຍໄປໝົດ. ດັ່ງນັ້ນ ການທີ່ໂຮງງານຈະສາມາດຜະລິດຄືນໄດ້ອີກນັ້ນ ແມ່ນໄດ້ໃຊ້
ເວລາໄວທີ່ສຸດເປັນປະວັດການ”
ໄພນໍ້າຖ້ວມປີກາຍນີ້ ໄດ້ກວມໄປ
ທົ່ວຂົງເຂດທົ່ງຮາບພາກກາງຂອງ
ໄທ ຍັງຜົນໃຫ້ 800 ຄົນເສຍຊີວິດ
ແລະສ້າງຄວາມເສຍຫາຍປະມານ
45 ພັນລ້ານໂດລາ. ຫລາຍໆຄົນ
ໄດ້ຖິ້ມໂທດໃສ່ລັດຖະບານວ່າ ຮັບ
ມືກັບວິກິດການຢ່າງຜິດພາດ. ນັບ
ຕັ້ງແຕ່ນັ້ນມາ ການປ່ຽນແປງແນວ
ຄິດດັ່ງກ່າວໄດ້ເປັນບູລິມະສິດລະ
ດັບສູງສຸດອັນນຶ່ງ ສໍາລັບລັດຖະ
ບານຂອງນາຍົກລັດຖະມົນຕີ
ຢິ່ງລັກ ຊິນນະວັດ.
ທາງຝ່າຍລັດຖະບານກ່າວວ່າ ໄພ
ນໍ້າຖ້ວມເມື່ອປີຜ່ານມາ ສ່ວນໃຫຍ່
ແລ້ວແມ່ນເປັນຍ້ອນ ບໍ່ໄດ້ມີການ
ລະບາຍນໍ້າຈາກອ່າງເກັບນໍ້າ ອອກຫລາຍພໍໃນພາກເໜືອ ໃນຕອນຕົ້ນໆຂອງລະດູຝົນນັ້ນ
ແລະວ່າ ເວລານີ້ພວກເຂົາເຈົ້າກໍາລັງຕິດຕາມເບິ່ງຢ່າງໃກ້ຊິດ ລະດັບນໍ້າໃນອ່າງເກັບນໍ້າຕາມ
ເຂຶ່ອນຕ່າງໆ.
ເມື່ອເດືອນແລ້ວນີ້ ຄະນະລັດຖະບານຂອງທ່ານນາງຍິ່ງລັກ ໄດ້ອະນຸມັດງົບປະມານ 800 ລ້ານໂດລາ ເພື່ອໃຊ້ເປັນທຶນດໍາເນີນໂຄງການປ້ອງກັນນໍ້າຖ້ວມ ປະມານ 240 ໂຄງການ.
ພື້ນທີ່ການກະເສດຫລາຍຮ້ອຍພັນເຮັກຕ້າ ແມ່ນຈະຖືກຈັດໄວ້ໃຫ້ເປັນເຂດເກັບນໍ້າ ຫລືທີ່
ເອີ້ນກັນອີກຊື່ນຶ່ງວ່າ “ແກ້ມລິງ” ນັ້ນ. ນອກນີ້ ພວກເຈົ້າໜ້າທີ່ຍັງກໍາລັງກວດຂີ້ຕົມອອກ
ຈາກກົ້ນຄອງນໍ້າແຫ່ງຕ່າງໆໃນບາງກອກ ແລະສ້ອມແປງປະຕູລະບາຍນໍ້າ ແລະກໍາແພງ
ກັ້ນນໍ້ານໍາ.
ທ່ານ ໂຄບາຢາຊິ ຈາກບໍລິສັດຮອນດາ ກ່າວວ່າ ໂດຍລວມແລ້ວ ທ່ານພໍໃຈກັບພວກມາດຕະ
ການປ້ອງກັນນໍ້າຖ້ວມເຫລົ່ານັ້ນ.
ລັດຖະບານໄທໄດ້ພະຍາຍາມໃຫ້ຄວາມໝັ້ນໃຈຄືນໃໝ່ ແກ່ພວກນັກລົງທືນ ແລະບັນດາບໍລິສັດປະກັນໄພວ່າ ພວກໂຮງຈັກໂຮງງານແລະສູນກາງການຜະລິດຕ່າງໆ ຈະປອດໄພຈາກໄພນໍ້າຖ້ວມຫລາຍຂຶ້ນໃນປີນີ້. ນອກນັ້ນ ລັດຖະບານຍັງຕັ້ງງົບປະມານປະກັນໄພໄວ້ ຈໍານວນ 1600 ລ້ານໂດລາ ແລະອີກ 11,300 ລ້ານໂດລາ ເປັນເງິນກູ້ຢືມສໍາລັບປ້ອງກັນນໍ້າຖ້ວມ.
ນາຍ ພິຈິດ ຣັດຕະກຸນ ອະດີດຜູ້ວ່າ ກທມ ຫລືເມືອງຫລວງບາງກອກ ແລະເປັນທີ່ປຶກສາດ້ານປ້ອງກັນນໍ້າຖ້ວມ ກ່າວວ່າ ລັດຖະບານແມ່ນໄດ້ເລິ່ມຕົ້ນດີ ທີ່ໄດ້ຈັດທໍາແຜນແມ່ບົດສໍາລັບປ້ອງກັນນໍ້າຖ້ວມ ແຕ່ວ່າມັນກໍ ຍັງເປັນພຽງແຕ່ສິ່ງນຶ່ງ ທີ່ມີຢູ່ໃນໜ້າເຈັ້ຍຊື່ໆ. ລາວອະທິບາຍວ່າ:
“ພວກເຂົາເຈົ້າຍັງບໍ່ແນ່ໃຈວ່າ ໃນຄັ້ງນີ້ ເທົ່າເຖິງປັດຈຸບັນນີ້ ມີຫຍັງແດ່ ທີ່ຮ່າງໄວ້ຢູ່ໃນເຈັ້ຍສໍນັ້ນ ໄດ້ຖືກຫັນປ່ຽນມາເປັນການກະທໍາ ແລະພ້ອມທີ່ຈະ ຈັດຕັ້ງ ປະຕິບັດຕາມແຜນການ. ອັນນີ້ ແຫລະທີ່ຂ້າພະເຈົ້າເປັນຫ່ວງ ນໍາ.”
ສິ່ງທ້າທາຍທີ່ປະເຊີນໜ້າລັດຖະບານຢູ່ໃນເວລານີ້ ແມ່ນການທ້າທາຍທີ່ເປັນ ຜົນສືບເນື່ອງມາຈາກການພັດທະນາທີ່ມີມາໄດ້ຫລາຍສິບປີ ທີ່ບໍ່ໄດ້ພິຈາລະ ນາເຖິງບັນຫານໍ້າຖ້ວມ ຄືໄດ້ມີການສ້າງສາໃໝ່ທີ່ຖົມເຄືອຂ່າຍຄອງນໍ້າເກົ່າຂອງເມືອງຫລວງ ແລະພວກຖະໜົນຫົນທາງແລະບ້ານເຮືອນທີ່ສ້າງຂຶ້ນ ໃໝ່ນັ້ນ ກໍໄດ້ເປັນຕົວກີດກັນທາງໄຫລທໍາ
ມະຊາດຂອງນໍ້າ ອີກຕ່າງຫາກ.
ນານ ດະໄນ ໄທຕຸກູ້ ຈາກຄະນະສະຖາປັດ
ຕະຍະກໍາສາດຂອງມະຫາວິທະຍາໄລຈຸລາ
ລົງກອນ ກ່າວວ່າ ຈໍາເປັນຕ້ອງມີໂຄງການ
ຫລາຍໆຢ່າງອີກ ເພື່ອເຮັດໃຫ້ນໍ້າຖ້ວມ
ໄຫລລົງສູ່ອ່າວໄທໄດ້ໄວຂຶ້ນ ຊຶ່ງລາວກ່າວວ່າ:
“ສິ່ງທີ່ຂ້າພະເຈົ້າຢາກເຫັນນັ້ນກໍຄືວ່າ ທາງການ ຈະເລ່ງນໍ້າໃຫ້ ໄຫລອອກໄປ ແນວໃດ
ເພາະວ່າຂ້າພະເຈົ້າຍັງບໍ່ເຫັນວິທີທີ່ຈະລະບາຍນໍ້າລົງສູ່ທະເລໄດ້ຄືກັນກັບລະບົບຄອງ.
ສິ່ງທີ່ຂ້າພະເຈົ້າເຫັນໃນເວລານີ້ ເບິ່ງຄືວ່າມີແຕ່ສ້າງກໍາແພງກັ້ນນໍ້າຖ້ວມຫລາຍກວ່າ
ເພື່ອປ້ອງກັນເຂດໃດນຶ່ງໂດຍສະເພາະເທົ່ານັ້ນ ແຕ່ທາງການບໍ່ໄດ້ກຽມເຂດທີ່ຈະປ່ອຍ
ໃຫ້ນໍ້າໄຫລຜ່ານໄດ້ສະດວກນັ້ນໄວ້ເລີຍ ຄືກຽມໂຄງລ່າງພື້ນຖານ ສໍາລັບຊ່ວຍລະບາຍ
ນໍ້າໃຫ້ລ່ຽນໄຫລດີ ແລະໄດ້ຜົນກວ່າປີຜ່ານມານັ້ນ.”
ສໍາລັບພວກຊາວເມືອງຫລວງບາງກອກ ຊຶ່ງເປັນສູນກາງການເສດຖະກິດ ແລະການເມືອງຂອງປະເທດນັ້ນ ຕາຕະລາງເວລາແຫ່ງການປ່ຽນແປງແມ່ນ ກໍາລັງຫົດຕົວລົງໄປທຸກຂະນະ. ບັນດານັກວິທະຍາສາດເປັນຫ່ວງວ່າ ເມືອງຫລວງບາງກອກກໍາລັງຈະຈົມນໍ້າລົງໄປຢ່າງຊ້າໆ ແລະເມືອງທີ່ຕັ້ງຢູ່ໃນພື້ນທີ່ຕໍ່າແຫ່ງນີ້ ທີ່ແທບວ່າບໍ່ຫລຸດລື່ນກັບລະດັບນໍ້າທະເລປານໃດນັ້ນ
ກໍກໍາລັງຖືກຂົ່ມຂູ່ຈາກສະພາວະອາກາດຮ້ອນເອົ້າຂອງໂລກ ທີ່ອາດເຮັດໃຫ້ລະດັບນໍ້າທະເລ
ສູງຂຶ້ນໄປອີກ ແລະຍັງຜົນໃຫ້ເມືອງຫລວງບາງກອກປະເຊີນກັບໄພນໍ້າຖ້ວມຢູ່ເລື້ອຍໆ.
ພ້ອມດຽວກັນນີ້ ທະນາຄານໂລກເຕືອນວ່າ ຄວາມສ່ຽງຕໍ່ການເກີດໄພນໍ້າຖ້ວມເມືອງຫລວງບາງກອກນັ້ນ ແມ່ນຈະສູງຂຶ້ນສີ່ເທົ່າຕົວໃນຫລາຍສິບປີຕໍ່ໜ້ານີ້ ຊຶ່ງເຮັດໃຫ້ຫລາຍໆຄົນມີຄວາມວິຕົກກັງວົນວ່າ ໄພນໍ້າຖ້ວມປີ 2011 ນັ້ນ ບໍ່ຊົງວ່າຈະເປັນເທື່ອສຸດທ້າຍຂອງບາງກອກ.