ໃນລະຫວ່າງການຢ້ຽມຢາມປັກກິ່ງຢ່າງເປັນທາງການສີ່ວັນ ຂອງທ່ານນາງ ຢິ່ງລັກ ຊິນນະວັດ ນາຍົກລັດຖະມົນຕີໄທນັ້ນ ທັງສອງປະເທດໄດ້ປຶກສາຫາລີກັນກ່ຽວກັບການເສີມຂະຫຍາຍ
ການຮ່ວມມື ໃນດ້ານການເງິນ ການທ່ອງທ່ຽວ ການກະເສດ ແລະການຂົນສົ່ງ.
ນອກນັ້ນ ທັງສອງຝ່າຍຍັງໄດ້ສົນທະນາຫາລືກັນ ກ່ຽວກັບໂຄງການຕ່າງໆ ອັນໂຮມທັງໂຄງການກໍ່ສ້າງຕານ່າງລົດໄຟຄວາມໄວສູງສໍາລັບຂົງເຂດ ທີ່ໄດ້ມີການວາງແຜນກັນໄວ້ ຊຶ່ງຈະເຊື່ອມຕໍ່ພາກໃຕ້ຂອງປະເທດຈີນ ກັບ ປະເທດລາວ, ປະເທດໄທ, ມາເລເຊຍ, ແລະສິງກະໂປ.
ທ່ານ ທິຕິນັນ ພົງສຸດທິຣັກ ນັກລັດຖະສາດການເມືອງປະຈໍາມະຫາວິທະ ຍາໄລຈຸລາລົງກອນ ກ່າວວ່າ ການໄປຢ້ຽມຢາມຈີນຂອງທ່ານນາງນາຍົກ ລັດຖະມົນຕີຢິ່ງລັກ ໃນຄັ້ງນີ້ ແມ່ນໄດ້ເນ້ນໜັກເຖິງສະຖານະພາບຂອງຈີນ ວ່າຢູ່ໃນຖັ້ນແຖວໜ້າຂອງຄວາມສໍາພັນຕ່າງໆ ຢູ່ໃນຂົງເຂດເອເຊຍຕາເວັນອອກສຽງໃຕ້ນັ້ນ.
ທ່ານ ທິຕິນັນ ກ່າວວ່າ ການຢ້ຽມຢາມດັ່ງກ່າວນີ້ ຍັງເປັນການເສີມສ້າງຄວາມສໍາພັນ ທີ່ໄດ້ພັດທະນາຂຶ້ນມາ ໃນລະຫວ່າງສະໄໝລັດຖະບານຂອງອະດີດນາຍົກລັດຖະມົນຕີ ທັກສິນ ຊິນນະວັດ ອ້າຍຂອງທ່ານນາງຢິ່ງລັກ ທີ່ໄດ້ຖືກໂຄ່ນລົ້ມຈາກອໍານາດ ໂດຍການລັດຖະປະຫານເມື່ອປີ 2006 ຍ້ອນການກ່າວຫາກ່ຽວກັບການສໍ້ລາດບັງຫລວງ. ທ່ານ ທິຕິນັນ ກ່າວວ່າ:
“ຈີນມີອິດທິພົນຫລາຍ ຢູ່ໃນມຽນມາ ລາວ ກໍາປູເຈຍ ແລະຢູ່ໃນ ຫວຽດນາມ ແຕ່ໃນລະດັບນ້ອຍກວ່າ ແຕ່ໄທກໍເປັນປະເທດທີ່ສໍາຄັນ. ໄທໄດ້ເອນອ່ຽງໄປຫາຈີນ ໃນໄລຍະປະມານສິບປີຜ່ານມານີ້ ໂດຍສະເພາະຫລັງຈາກການກໍ່ລັດຖະປະຫານ ແລະການແບ່ງແຍກເປັນສອງກໍ້າສອງຝ່າຍໃນປະເທດໄທ. ແຕ່ທັງສອງຝ່າຍ ຄືທັກສິນ ກັບ ພວກສັດຕູຂອງເພິ່ນຕ່າງກໍໄດ້ເອນອ່ຽງໄປຫາຈີນ.”
ບັນດາຜູ້ນໍາທຸລະກິດໄທຫລາຍໆຄົນ ໄດ້ຮ່ວມເດີນທາງໄປກັບນາຍົກລັດຖະ ມົນຕີໃນຄັ້ງນີ້. ຄະນະກໍາມະການສົ່ງເສີມການລົງທຶນຂອງໄທ ປະກາດວ່າຫ້າບໍລິສັດຈີນ ໃນພາກສ່ວນຍານຍົນ ເຄຶ່ອງຈັກ ເຄຶ່ອງປະກອບຣົດຊາດ ອາຫານ ແລະອະສັງຫາລິມະຊັບ ກໍາລັງພິດຈາລະນາຈະທໍາການລົງທຶນໃນມູນຄ່າຫລາຍກວ່າ 2 ພັນລ້ານໂດລາ ໃນປະເທດໄທ. ວົງການທຸລະກິດຂອງໄທ ພາຍໃຕ້ຂໍ້ຕົກລົງເປັນພາຄີການຄ້າກັບບໍລິສັດຕ່າງໆຂອງຈີນ ກໍກໍາລັງພາກັນສຶກສາເບິ່ງຊ່ອງທາງທີ່ຈະລົງທຶນ ຫລາຍເຖິງ 2400 ລ້ານໂດລາ.
ທ່ານ ທິຕິນັນ ກ່າວວ່າ ບົດບາດຂອງຈີນຢູ່ໃນຂົງເຂດໃນຕອນນີ້ ໄດ້ເປັນຕົວເດັ່ນຂຶ້ນມາ ກໍຍ້ອນບົດບາດສໍາຄັນຂອງຈີນ ໃນຖານະເປັນຕົວຂັບດັນ ຄວາມຈະເຣີນເຕີບໂຕຂອງເສດຖະກິດຂອງຂົງເຂດ ຊຶ່ງທ່ານທິຕິນັນຊີ້ແຈງວ່າ:
“ຈີນໄດ້ກາຍເປັນເຄື່ອງຈັກຂັບດັນທີ່ສໍາຄັນຫລາຍຂຶ້ນນັບມື້ ຕໍ່ການເຕີບໂຕດ້ານເສດຖະກິດຂອງຂົງເຂດເອເຊຍຕາເວັນອອກ. ດັ່ງນັ້ນ ມັນບໍ່ແມ່ນມີຄວາມສໍາຄັນ ແຕ່ພຽງໃນດ້ານການເປັນສັນຍະລັກຂອງທາງຍຸດທະສາດການເມືອງເທົ່ານັ້ນ ແຕ່ຍັງມີຂອບເຂດດ້ານຜົນປະໂຫຍດທາງການຄ້າ ແລະການລົງທຶນຢ່າງໃຫຍ່ຫລວງ ນໍາດ້ວຍ.”
ໄທເປັນປະເທດທໍາອິດໃນກຸ່ມ 10 ປະເທດຂອງສະມາຄົມປະຊາຊາດເອເຊຍຕາເວັນອອກສຽງໃຕ້ ຫລືອາຊ່ຽນ ທີ່ໄດ້ລົງນາມໃນຂໍ້ຕົກລົງກ່ຽວກັບ ກອບ ຫລືໂຄງຮ່າງ ການຮ່ວມມືໄລຍະຍາວກັບຈີນ ເມື່ອສິບປີມາແລ້ວ.
ທ່ານ Carl Thayer ນັກວິເຄາະການເມືອງທີ່ມະຫາວິທະຍາໄລ New South Wales ຂອງອອສເຕຣເລຍ ກ່າວວ່າ ການຍົກລະດັບຄວາມສໍາ ພັນກັນ ຂຶ້ນເປັນພາຄີຮ່ວມມືຍຸດທະສາດແບບຮອບດ້ານນັ້ນ ແມ່ນສ້າງຄວາມເຂັ້ມແຂງຍິ່ງຂຶ້ນ ໃຫ້ແກ່ຄວາມສໍາພັນລະຫວ່າງສອງປະເທດນີ້.
“ການມອບຕໍາແໜ່ງແບບນັ້ນ ເທົ່າກັບເປັນການຈັດຕັ້ງລະດັບຄວາມສໍາຄັນ ຂອງສະຖານະພາບ ແລະຢ່າງໜ້ອຍກໍຊ່ວຍໃຫ້ພວກເຮົາຮູ້ມຸມມອງຂອງຈີນກ່ຽວກັບໄທ ແລະເພາະສະນັ້ນ ເວົ້າສຸດໆແລ້ວ ກໍແມ່ນວ່າຄວາມສໍາພັນນັ້ນຈະບໍ່ມີບັນຫາໃດໆ ໃນສ່ວນທີ່ກ່ຽວກັບເລື້ອງຕ່າງໆທີ່ມີຄວາມສໍາຄັນຕໍ່ຈີນ.”
ນອກຈາກການເຊື່ອມໂຍງດ້ານເສດຖະກິດທີ່ເພີ່ມຂຶ້ນແລ້ວນັ້ນ ທັງສອງຝ່າຍ ຍັງໄດ້ຕົກລົງກັນທີ່ຈະເສີມຂະຫຍາຍ ພາລະກິດການລາດຕະເວນຮ່ວມກັນ ຕາມລໍາແມ່ນໍ້າຂອງ ຢູ່ໃນເຂດຊາຍແດນຈີນ ໄທ ລາວ ແລະມຽນມາ ນັ້ນ.
ໃນເດືອນຕຸລາຂອງປີຜ່ານມາ ລູກເຮືອຊາວຈີນ 13 ຄົນ ຖືກຂ້າຕາຍຢູ່ແມ່ນໍ້າຂອງ ໃນການໂຈມຕີທີ່ຖິ້ມໂທດໃສ່ພວກລັກລອບຄ້າຢາເສບຕິດ. ເຫດ ການນອງເລືອດຄັ້ງນັ້ນ ໄດ້ນໍາໄປສູ່ການຍຸຕິລົງຊົ່ວຄາວ ໃນການຄ້າຂາຍຕາມລໍາແມ່ນໍ້າຂອງ ທີ່ບັດນີ້ ໂດຍສ່ວນໃຫຍ່ ແມ່ນໄດ້ກັບຄືນມາສູ່ລະດັບ ກ່ອນເຫດການສັງຫານດັ່ງກ່າວນັ້ນແລ້ວ.