ລິ້ງ ສຳຫລັບເຂົ້າຫາ

ສານ​ໄທ ​​​ຕັດສິນ​​ຝາກໂທດ ບັນນາທິການ​ ເວັບໄຊທ໌ ຄົນນຶ່ງ

  • ທອງປານ ເທບວົງສາ

ນາງຈີຣະນຸດ ເປຣມໄຊພອນ ບັນນາທິການເວັບໄຊທ໌ ທີ່ຖືກສານອາຍາຂອງໄທ ຕັດສິນຝາກໂທດ ຈຳຄຸກແປດເດືອນ (30 ພຶດສະພາ 2012)

ສານ​ໄທໄດ້​ຕັດສິນໃຫ້ ​ບັນນາທິການ​ເວັບ​ໄຊ້ຄົນ​ນຶ່ງ ມີ​ຄວາມ​ຜິດ​ໃນຖານ​ກໍ່ອາຍາຊະ​ຍາ​ກໍາ​ທາງ​ຄອມ​ພິວ​ເຕີ ຍ້ອນ​ບໍ່​ໄດ້ລຶບ​ອອກ​ຢ່າງ​ໄວ​ ຂໍ້ຄວາມ​ຕ່າງໆ​ທາງ​ອິນ​ເທີແນັ​ດ ທີ່​ຖື​ວ່າ​ມີ​ເນື້ອ​ໃນ ​ໝິ່ນ​ປະໝາດກະສັດ​ໄທນັ້ນ.

ໃນ​ວັນ​ພຸດ​ວານ​ນີ້ ສານ​ອາ​ຍາທີ່​ບາງກອກ ​ໄດ້​ຕັດສິນຝາກ​ໂທດ​ຈໍາ​ຄຸກ ​ແປດ​ເດືອນຕໍ່​ ນາງຈີຣະນຸດ ​ເປຣມ​ໄຊ​ພອນ ຍ້ອນບໍ່​ໄດ້​ປະຕິບັດ​ຕາມ​ຄໍາ​ສັ່ງ​ຂອງ​ສານ​ ທີ່ໃຫ້​ລືບ​ຄວາມເຫັນຕ່າງໆທີ່ຄົນ​ອື່ນໆ​ຂຽນ​ເຂົ້າ​ມາ​ລົງ​ໃນ​ເວ​ບ ​ໄຊ້ ຂ່າວ “ປຣະຊາ​ໄທ” ຂອງ​ລາວທີ່​ໄດ້​ຮັບ​ຄວາມ​ນິຍົມ​ຫລາຍ​ນັ້ນ ​ ​.

ຜູ້​ພິພາກສາ ກໍາ​ພົນ ຣຸ່ງຣັດ ​ໄດ້​ບອກ​ສານ​ວ່າ ຄວາມເຫັນ​ນັ້ນ​ແມ່ນ​ໄດ້​ສ້າງ​ຄວາມຄວາມ​ເສຍ​ຫາຍ​ ​ໃຫ້ແກ່​ຊື່​ສຽງ​ຂອງ​ກະສັດ ພະ​ຣາຊິ​ນີ ​ແລະ​ລັດຊະ​ທາຍາດ ​ແລະ​ເພາະສະ​ນັ້ນ ການ​ທີ່​ນາງບໍ່​ໄດ້​ລຶບ​ອອກ ​ຈຶ່ງ​ຖື​ວ່າ​ເປັນ ການ​ຝ່າຝືນ​ກົດໝາຍ​ອາຍາ​ທາງ​ຄອມ​ພິວ​ເຕີ​ ທີ່​ເປັນ​ບັນຫາ​ໂຕ້​ແຍ້​ງກັນ​ນັ້ນ.

ໃນເບື້ອງ​ຕົ້ນ ນາງ ຈີຣະນຸດ ທີ່​ຍັງ​ໄດ້​ຖືກ​ປັບ​ໃໝ 630 ​ໂດ​ລາອີກ​ນັ້ນ ​ໄດ້​ຖືກຕັດສິນ​ຈໍາ​ຄຸກ​ນຶ່ງ​ປີ ​ແຕ່​ລົດ​ລົງ​ມາ​ເຫຼືອ​ແປດ​ເດືອນ ​ແລະ​ກໍ​ໄດ້ຖືກ​ຝາກ​ໂທດ​ໄວ້ ຍ້ອນ​ຜູ້ກ່ຽວໃຫ້​ຄວາມ​ຮ່ວມ​ມື​ກັບສານ​ເປັນ​ຢ່າງ​ດີ.

ນາງ​ຈີຣະນຸດ ບອກ​ຜູ້​ສື່​ຂ່າວຫຼັງຈາກ​ການ​ຕັດສິນຂອງສານ​ວ່າ ລາວຄິດ​ວ່າການຝາກ​ໂທດ​ນັ້ນ ​ພໍຮັບ​ເອົາ​ໄດ້ຢູ່ ​ແຕ່​ວ່າ​ລາວ​ອາດ​ຍື່ນ​ອຸທອນ ຄໍາ​ຕັດສິນນັ້ນ ​ໂດຍ​ກ່າວ​ວ່າ

“ຂ້າພະ​ເຈົ້າບໍ່ພໍ​ໃຈ ນໍາ​ການ​ທີ່​ສານ​ຕັດສິນວ່າ​ຂ້າພະ​ເຈົ້າມີ​ຄວາມ​ຜິດ. ຂ້າພະ​ເຈົ້າຈະປຶກສາ​ກັບ​ທະນາຍຄວາມ​ຂອງ​ຂ້າພະ​ເຈົ້າວ່າ ​ຈະ​ຂໍ​ຍື່ນ​ອຸທອນຫຼືບໍ່?”

ບາງ​ຄົນ​ຄິດ​ວ່າ ຄໍາ​ຕັດສິນ​ໂທດ​ນາງ ​ເປັນ​ການ​ຜ່ອນຜັນ​ໃຫ້​ຫລາຍແລ້ວ ​ໃນ​ເມື່ອ​ວ່າ​ນາງສາມາດ​ປະ​ເຊີນກັບ​ການ​ຖືກ​ຈໍາ​ຄຸກ​ດົນ​ເຖິງ 20 ປີ ໄດ້ໃນ ​ຂໍ້​ຫາ​ເຫຼົ່ານັ້ນ.

​ແຕ່​ກຸ່ມ​ສິ້ງ​ຊອມ​ສິດທິ​ມະນຸດ​ກ່າວໃນ​ຖະ​ແຫຼງການ​ສະບັບ​ນຶ່ງວ່າ ການ​ຕັດສິນ​ໃຫ້​ນາງ​ມີ​ຄວາມ​ຜິດ​ດັ່ງກ່າວ ​ແມ່ນເປັນ​ການເພີ່ມ​ທະວີສ້າງ​ບັນຍາ​ກາດ ແຫ່ງ​ຄວາມ​ຢ້ານ​ກົວ ​ແລະການ​ກວດກາ​ຕົນ​ເອງ ຂຶ້ນ​ໄປ​ອີກ ​ໃນ​ສື່​ມວນ​ຊົນ​ໄທ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG