ລິ້ງ ສຳຫລັບເຂົ້າຫາ

ອະດີດນາຍົກໄທ ຖືກຟ້ອງ ກ່ຽວກັບ ໂຄງການຈຳນຳເຂົ້າ ທີ່ລົ້ມແຫຼວ


ປະທານອະທິໄອຍະການຂອງໄທ ພະແນກການດຳເນີນຄະດີພິເສດ ທ່ານ Chutichai Sakhakorn (ຂວາ) ຖືສຳເນົາເອກະການສານຟ້ອງຮ້ອງ ໃນຂະນະທີ່ ປະທານໃຫຍ່ ພະແນກສືບສວນສອບສວນ ທ່ານ Surasak Threerattrakul ຢືນເບິ່ງຢູ່ດ້ານຫຼັງ ຢູ່ທີ່ສານສູງສຸດໃນບາງກອກ, ວັນທີ 19 ກຸມພາ 2015.

ອະທິໄອຍະການ​ຂອງໄທ​ ​ໄດ້​ຍື່ນ​ຟ້ອງ​ທາງ​ອາຍາ​ຕໍ່​ອະດີດນາຍົກ
ລັດຖະມົນຕີ​ ທ່ານ​ນາງ​ຍິ່ງ​ລັກ ຊີນນະ​ວັດ ກ່ຽວ​ກັບ​ການ​ພົວພັນ​ນຳ
ໂຄງການ​ຈຳນຳ​ເຂົ້າທີ່ຜິດ​ພາດ ຊຶ່ງ​ໄດ້​ສ້າງຄວາມ​ເສຍຫາຍໃຫ້​ແກ່​
ປະ​ເທດຊາດຫຼາຍຕື້​ດອນ​ລາ.

ອະທິໄອຍະການ ​ໄດ້​ຟ້ອງ ທ່ານ​ນາງ​ຍິ່ງ​ລັກ ​ໃນ​ວັນ​ພະຫັດ​ມື້​ນີ້ ​
ໃນ​ຂໍ້​ຫາ​ປ່ອຍປະ​ລະ​ເລີຍ​ຕໍ່ໜ້າ​ທີ່ ກ່ຽວກັບການ​ເບິ່ງ​ແຍງ​ໂຄງ
ການ​ດັ່ງກ່າວ ທີ່ໄດ້​ຊື້​ເຂົ້າຈາກບັນດາ​ກະ​ເສດຕະກອນ​ ໃນ​ລາ
ຄາ​ທີ່​ສູງ​ກວ່າທ້ອງຕະຫຼາດ. ບັນດາຝ່າຍ​ຄ້ານ​ ຂອງ​ທ່ານ​ນາງ
ກ່າວ​ວ່າ ​ໂຄງການ​ດັ່ງກ່າວນີ້ ​ແມ່ນ​ເປັນ​ວິທີ​ການເອົາ​ໃຈ ​ພວກ
ກະ​ເສດ​ຕະກອນ ​ເພື່ອ​ໃຫ້ໄດ້ຮັບ​ການ​ສະໜັບ​ສະ​ໜຸນທາງ​ການ
​ເມືອງ.

ສານ​ສູງ​ສຸດ ​ຕ້ອງ​ໄດ້​ຕັດສິນ ​ພາຍ​ໃນວັນ​ທີ 19 ມີນາ ວ່າ​ຈະ​ຮັບ​ເອົາ ຄະດີ​ດັ່ງກ່າວຫຼືບໍ່. ຖ້າຫາກ​ພົບ​ເຫັນ​ວ່າ​ມີ​ຄວາມ​ຜິດ ທ່ານ​ນາງ​ຍິ່ງ​ລັກ ອາດ​ຖືກ​ຈຳ​ຄຸກດົນ​ເຖິງ 10 ​ປີ.

ທ່ານ​ນາງ​ຍິ່ງ​ລັກ ​ໄດ້​ຖືກ​ຂັບ​ໄລ່​ອອກ​ຈາກ​ຕຳ​ແໜ່​ງ​ໂດຍ​ຄຳ​ສັ່ງ​ຂອງ​ສານ ​ໃນເດືອນ​
ພຶດສະພາ ປີ 2014 ​ບໍ່​ເທົ່າ​ໃດ​ມື້ກ່ອນ​ທີີ່ພວກທະຫານ​ໄດ້​ຢຶດ​ເອົາ​ອຳນາດ. ​ເມື່ອ​ເດືອນ
​ແລ້ວ​ນີ້ ສະພາ​ນິຕິບັນຍັດໄທ​ທີ່​ຖືກ​ແຕ່ງ ຕັ້ງ​ໂດຍທະຫານ ​ກໍໄດ້​ທຳການຟ້ອງ​ຮ້ອງທ່ານ​ນາງ
ກ່ຽວກັບການກະທຳ ຢ້ອນຫຼັງ ​ແລະ ​ໄດ້​ຫ້າມ​ທ່ານ​ນາງ​ບໍ່ໃຫ້​ຫຼິ້ນການ​ເມືອງ​ເປັນ​ເວລາ 5 ປີ.

ນອກນັ້ນລັດຖະບານ​ທະຫານ​ໄທ ​ແມ່ນ​ຍັງ​ພິຈາລະນາ ຈະ​ຟ້ອງຮ້ອງ ໃນທາງແພ່ງຕໍ່​ທ່ານນາງ​ ຍິ່ງ​ລັກອີກ​ດ້ວຍ. ຄະນະ​ກຳມາ​ທິການ​ຕ້ານ​ການ​ສໍ້​ລາດ​ບັງ​ຫຼວງຂອງໄທ ​ໃນ​ວັນ​ພຸດ​ວານ​ນີ້ ​ໄດ້​ແນະນຳ​ໃຫ້​ລັດຖະບານ ຮຽກຮ້ອງເອົາ​ຄ່າ​ເສຍ​ຫາຍ ກ່ຽວກັບ​ໂຄງການ​ຈຳນຳ​ເຂົ້າຈາກທ່ານ
​ນາງຍິ່ງລັກ ໃນມູນ​ຄ່າ 18 ຕື້​ດອນ​ລາ.

ອະດີດ​ນາຍົກລັດຖະມົນຍິ່ງລັກ ກ່າວອ້າງ​ວ່າ ການດຳເນີນ​ຄະດີຕໍ່ທ່ານ​ນາງ ​ແມ່ນມີ
ຈຸດປະສົງທາງການເມືອງ ​ແລະ ຢືນ​ຢັດ​ວ່າ ​ໂຄງການ​ຈຳນຳ​ເຂົ້ານັ້ນ ​ໄດ້ເກີດ​ຜົນດີ ​ຕໍ່
​ກະ​ເສດ​ຕະກອນ​ໄທ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG