ທ່ານ ທະຣາດົນ ປ່ຽມພົງສານ ຮອງເລຂາທິການນາຍົກ ລັດຖະມົນຕີໄທໄດ້ຖະແຫລງຢືນຢັນວ່າ ກອງປະຊຸມຄະນະ ລັດຖະບານໄທ ພາຍໃຕ້ການເປັນປະທານຂອງທ່ານອະພິ ສິດ ເວດຊາຊິວະ ນາຍົກລັດຖະມົນຕີໄທ ໄດ້ອະນຸມັດງົບ ປະມານເພື່ອໃຫ້ການສະໜັບສະໜູນ 2 ໂຄງການພັດທະ ນາ ທາງດ້ານຄົມມະນາຄົມ -ຂົນສົ່ງໃນລາວ ຄິດເປັນມູນຄ່າລວມຫລາຍກວ່າ 3 ພັນລ້ານບາດ ເມື່ອບໍ່ນານມານີ້.
ໂຄງການທຳອິດທີ່ຈະໄດ້ຮັບການສະໜັບສະໜູນຈາກລັດຖະບານໄທ ຕາມການອະນຸມັດ ງົບປະມານໃນຄັ້ງນີ້ ກໍຄືໂຄງການພັດທະນາປັບປຸງຖະນົນເລກ 11 ທີ່ເປັນເສັ້ນທາງລຽບຕາມຕາຝັ່ງນໍ້າຂອງຈາກບ້ານທາດທອງ ໄປເຖິງບ້ານນໍ້າສັງ ໄລຍະທາງຍາວປະມານ 56 ຫລັກກິໂລແມັດ ຊຶ່ງຈະໃຊ້ງົບປະມານໃນການດຳເນີນງານ ເຖິງ 1,390 ລ້ານບາດ ຫລືຫລາຍກວ່າ 354 ຕື້ກີບ ດ້ວຍເປົ້າໝາຍທີ່ຈະພັດທະນາໃຫ້ເປັນເສັ້ນທາງ ສຳລັບຮອງຮັບການທ່ອງທ່ຽວຕາມແນວແມ່ນໍ້າຂອງ ລະຫວ່າງລາວກັບໄທພາຍໃນປີ 2014. ສ່ວນອີກໂຄງ ການນຶ່ງນັ້ນ ກໍຄືການກໍ່ສ້າງທາງລົດໄຟທີ່ເຊຶ່ອມຕໍ່ ຈາກສະຖານີທ່ານາແລ້ງ ຫລືບ້ານດົງໂພສີ ເຂົ້າໄປຍັງບ້ານຄໍາສະຫວາດໃນເຂດນະຄອນຫລວງວຽງຈັນ ຊຶ່ງຈະໃຊ້ງົບປະມານໃນການກໍ່ສ້າງເຖິງ 1,650 ລ້ານບາດ ຫລືຫລາຍກວ່າ 420 ຕື້ກີບ ໂດຍຈະເລີ່ມລົງມືກໍ່ ສ້າງຕັ້ງແຕຕົ້ນປີໜ້າໄປ ເພື່ອໃຫ້ແລ້ວສຳເລັດພາຍໃນປີ 2014 ເປັນຢ່າງຊ້າ.
ທາງດ້ານທ່ານອະພິສິດ ເວດຊາຊີວະ ກໍໄດ້ຖະແຫລງຢືນຢັນວ່າ ການໃຫ້ການສະໜັບສະໜູນ ໂຄງການກໍ່ສ້າງທາງລົດໄຟໃນລາວດັ່ງກ່າວນີ້ ຖືເປັນສ່ວນນຶ່ງຂອງແຜນການພັດ ທະນາການເຊຶ່ອມຕໍ່ທາງລົດໄຟໄທ ກັບປະເທດເພື່ອນບ້ານໃນເຂດລຸ່ມແມ່ນໍ້າຂອງ ແລະ ໃນພູມິພາກອາຊ່ຽນດ້ວຍກັນ ໂດຍເມື່ອບໍ່ດົນມານີ້ ທາງການໄທແລະທາງການຈີນ ກໍຍັງໄດ້ ເຈລະຈາກັນກ່ຽວກັບແຜນການເຊຶ່ອມຕໍ່ການຄົມມະນາຄົມ-ຂົນສົ່ງ ໃນເຂດລຸ່ມແມ່ນໍ້າ ຂອງ ແລະອາຊ່ຽນ ໂດຍລົດໄຟຄວາມໄວສູງອີກດ້ວຍ ຊຶ່ງກໍຖືວ່າເປັນການເລີ່ມຕົ້ນທີ່ດີ ແລະກໍ ຈະມີການເຈລະຈາກັນໃນລາຍລະອຽດທີ່ເປັນຮູບປະທໍາຕໍ່ໄປ ດັ່ງທີ່ທ່ານອະພິສິດໄດ້ກ່າວຊີ້ແຈງວ່າ:
“ເຮົາກໍຍັງມີການເດີນໜ້າໃນການສະແຫວງຫາຄວາມຮ່ວມມືກັບປະເທດອື່ນໆ ຢ່າງເຊັ່ນ ໃນເວລານີ້ ກໍມີທາງການຈີນທີ່ເຂົ້າມາເຈລະຈາໃນການທີ່ຈະດຳເນີນການຫາລູ່ທາງຄວາມເປັນໄປໄດ້ໃນການເຮັດລົດໄຟຄວາມໄວສູງ ຄື ປະມານ 200 ກິໂລແມັດຕໍ່ຊົ່ວໂມງ ທັງເສັ້ນທາງພິເສດແລະກໍເສັ້ນທາງຕ່າງໆທົ່ວປະເທດດ້ວຍ ເພື່ອເຊຶ່ອມໂຍງກັບພູມີພາກ ເພື່ອທີ່ຈະນໍາໄປສູ່ການມີລົດໄຟຄວາມໄວສູງ ທີ່ຄອບຄຸມທົ່ວເຖິງ”
ກ່ອນໜ້ານີ້ ທາງການລາວແລະຈີນກໍໄດ້ຕົກລົງຮ່ວມມືເຂົ້າໃນການພັດທະນາແລະກໍ່ສ້າງ ທາງລົດໄຟໃນລາວ ເພື່ອເຊຶ່ອມຕໍ່ກັບຈີນແລະອາ່ຽນ ໂດຍຈະຈັດຕັ້ງບໍລິສັດຮ່ວມລົງທຶນ ຂຶ້ນມາ ດໍາເນີນການຮ່ວມກັນໃນໄລຍະຍາວ ຫາກແຕ່ວ່າໃນສ່ວນຂອງການລົງທຶນແລະເທັກ ນິກຕ່າງໆ ທີ່ຈະນໍາໃຊ້ເຂົ້າໃນການກໍ່ສ້າງທາງລົດໄຟ ຊຶ່ງລວມໄປເຖິງຫົວຈັກລົດໄຟແລະ ຂະບວນລົດໄຟດ້ວຍນັ້ນ ແມ່ນຈະມາຈາກຝ່າຍຈີນທັງໝົດ.
ສຳລັບການດຳເນີນງານໃນໄລຍະທຳອິດ ກໍຈະເປັນການສຶກສາຄວາມເປັນໄປໄດ້ຂອງໂຄງ ການ. ຕໍ່ຈາກນັ້ນ ກໍຈະເປັນການອອກແບບການກໍ່ສ້າງແລະສະເໜີຂໍການອະນຸມັດໂຄງການ ຈາກລັດຖະບານລາວຢ່າງເປັນທາງການຕໍ່ໄປ ແລະຖ້າຫາກວ່າໄດ້ຮັບການອະນຸມັດຈາກລັດ ຖະບານແລ້ວ ກໍຄາດວ່າຈະຕ້ອງໃຊ້ເວລາ ບໍ່ໜ້ອຍກວ່າ 5 ປີ ເພື່ອດຳເນີນການກໍ່ສ້າງໃຫ້ສຳເລັດ ທັງນີ້ໂດຍເສັ້ນທາງລົດໄຟທີ່ທາງການຈີນໃຫ້ຄວາມສຳຄັນຫລາຍທີ່ສຸດ ກໍຄືເສັ້ນ ທາງທີ່ເຊຶ່ອມຕໍ່ຈາກດ່ານບໍ່ເຕັນໃນແຂວງຫລວງນໍ້າທາ ຊຶ່ງຕິດກັບຊາຍແດນຈີນ ທີ່ດ່ານບໍ່ ຫານໃນເຂດສິບສອງພັນນາມົນທົນຢູນນານ ເລື້ອຍລົງມາສູ່ນະຄອນວຽງຈັນ-ເມືອງທ່າແຂກ ໃນແຂວງຄໍາມ່ວນ ແລ້ວເຊຶ່ອມຕໍ່ໄປຍັງພາກກາງຫວຽດນາມ ແລະພາກອີສານຂອງໄທຕໍ່ມາ ຍັງບາງກອກ ເມເລເຊຍ ແລະສິງຄະໂປ ຫລືທີ່ເອີ້ນວ່າ ເສັ້ນທາງລົດໄຟອາຊ່ຽນ-ຈີນ ນັ້ນເອງ.
ລັດຖະບານຈີນໄດ້ໃຫ້ຄວາມສຳຄັນຢ່າງຍິ່ງຕໍ່ການພັດທະນາທາງຄົມມະນາຄົມ-ຂົນສົ່ງເພື່ອ ເຊຶ່ອມຕໍ່ກັບອາຊ່ຽນ ໂດຍຜ່ານລາວ ດ້ວຍເປົ້າໝາຍທີ່ຈະເສີມຂະຫຍາຍການຄ້າກັບອາຊ່ຽນ ໃຫ້ຫລາຍຂຶ້ນຢ່າງຕໍໍ່ເນຶ່ອງ ໂດຍໃນໄລຍະນັບຈາກປີ 2000 ເປັນຕົ້ນມາ ທາງການຈີນກໍ ໄດໃຫ້ຄວາມສໍາຄັນເປັນພິເສດກັບການພັດທນະການຂົນສົ່ງທາງບົກແລະທາງນໍ້າ ໃນເຂດ ພາກເໜືອຂອງລາວ ເຊັ່ນການພັດທະນາເສັ້ນທາງການເດີນເຮືອໃນແມ່ນໍ້າຂອງ ແລະການພັດທະນາຖະໜົນເລກ 3 ໃນແຂວງຫລວງນໍ້າທາ ແລະແຂວງບໍ່ແກ້ວ ລວມເຖິງການພັດ ທະນາຖະໜົນຫົນທາງເພື່ອເຊຶ່ອມຕໍ່ກັບແຂວງອຸດົມໄຊ ແລະແຂວງພົງສາລີ ນໍາດ້ວຍ.
