ຜູ້ໂຈມຕີດ້ວຍລະເບີດສະຫຼະຊີບຄົນນຶ່ງ ຂອງກຸ່ມຕາລີບານ ໄດ້
ສັງຫານ ທີ່ປຶກສາອະວຸໂສຄົນນຶ່ງ ຂອງຜູ້ບັນຊາການຕຳຫລວດ
ໃນນະຄອນຫລວງ ອັຟການິສຖານ.
ບັນດາເຈົ້າໜ້າທີ່ກ່າວວ່າ ຄົນຮ້າຍສາມາດຫລົບຫລີກເຈົ້າໜ້າທີ່
ຮັກສາ ຄວາມປອດໄພ ແລະ ຍ່າງເຂົ້າໄປໃນ ກອງບັນຊາການ
ຕຳຫຼວດ ໃນວັນອາທິດມື້ນີ້ ແລະ ໄດ້ບີບຄະນວນລະເບີດໃຫ້
ແຕກຂຶ້ນ ທີ່ໄດ້ສັງຫານທີ່ປຶກສາຜູ້ບັນຊາການຕຳຫຼວດ ແລະ
ເຮັດໃຫ້ອີກຢ່າງນ້ອຍ 6 ຄົນໄດ້ຮັບບາດເຈັບ. ຜູ້ບັນຊາການ
ຕຳຫລວດ Mohammad Zahir ບໍ່ໄດ້ຮັບອັນຕະລາຍໃດໆ ໃນ
ການໂຈມຕີຄັ້ງນີ້ ຊຶ່ງເກີດຂຶ້ນຢູ່ທາງດ້ານໜ້າ ຫ້ອງການຂອງທ່ານ
ໃນຊັ້ນທີ 3 ນັ້ນ.
ຍັງມີລາຍງານທີ່ຂັດແຍ້ງກັນຢູ່ ກ່ຽວກັບວ່າຄົນຮ້າຍໄດ້ນຸ່ງເຄື່ອງແບບ ຕຳຫຼວດ ຫລືນຸ່ງເຄື່ອງ ພົນລະເຮືອນກັນແທ້.
ນາຍພົນ Mohammad Zahir ກ່າວວ່າ “ເມື່ອປະມານ 9 ໂມງເຊົ້າ ຕາມເວລາທ້ອງຖິ່ນ ບໍ່ເປັນຈັ່ງໂຊກ ມີລະເບີດແຕກຂຶ້ນ ໃນຫ້ອງການນຶ່ງ ຂອງກອງບັນຊາການຕຳຫລວດ ໃນນະຄອນກາບູລ ທີ່ໄດ້ເຮັດໃຫ້ ນາຍຕຳຫຼວດອະວຸໂສຄົນນຶ່ງ ກາຍເປັນວິລະຊົນ ແລະ ເຮັດໃຫ້ພະນັກງານອີກ 6 ຄົນ ໄດ້ຮັບບາດເຈັບ. ການສືບສວນສອບສວນ ຢ່າງຈິງຈັງ ກຳລັງດຳເນີນການຢູ່ ກ່ຽວກັບເຫດການນີ້.”
ກອງບັນຊາການບ່ອນເກີດການໂຈມຕີຂຶ້ນນັ້ນ ແມ່ນເປັນເຂດນຶ່ງ ຂອງກາບູລ ທີ່ມີການ
ຮັກສາຄວາມປອດໄພຢ່າງເຄັ່ງຄັດທີ່ສຸດ.
ພວກຕາລີບານ ໄດ້ອ້າງເອົາຄວາມຮັບຜິດຊອບ ກ່ຽວກັບການໂຈມຕີ ດັ່ງກ່າວນີ້.