ກຳລັງຮັກສາຄວາມປອດໄພອັຟການິສຖານ ໄດ້ຂັບໄລ່ພວກ Taliban ອອກໄປຈາກ ເມືອງ Kunduz ໃນພາກເໜືອຂອງປະເທດ ນຶ່ງມື້ຫຼັງຈາກພວກກະບົດຈຸນີ້ໄດ້ບຸກເຂົ້າ ໄປແລະຍຶດເອົາຫລາຍໆເຂດຂອງເມືອງດັ່ງກ່າວ ຊຶ່ງເປັນເມືອງເອກຂອງແຂວງ ເປັນເວລາສັ້ນໆ.
ການສູ້ລົບດັ່ງກ່າວເກີດຂຶ້ນໃນຂະນະທີ່ບັນດາຄູ່ຮ່ວມງານຂອງອັຟກາກນິສຖານ ປະຊຸມ ຢູ່ນະຄອນ Brussels ໃນວັນອັງຄານມື້ນີ້ ເພື່ອຊອກຫາທຶນໃໝ່ສະໜັບ ສະໜຸນຄວາມພະຍາຍາມບູລະນະສ້າງສາ ປະເທດທີ່ປະສົບກັບໄພສົງຄາມຢ່າງໜ້ອຍໄປຈົນຮອດປີ 2020 ທ່າມກາງທີ່ມີການຮ້ອງ ໃຫ້ຊອກຫາຊ່ອງທາງການ ແກ້ໄຂດ້ວຍສັນຕິວິທີ ຕໍ່ບັນ ຫາຂັດແຍ້ງນີ້.
ນັກຂ່າວວີໂອເອ ພະແນກພາສາອັຟການິສຖານຄົນນຶ່ງ ໃນເມືອງ Kunduz ໄດ້ເຫັນກຳ ລັງລັດຖະບານຄວບຄຸມ ທີ່ຕັ້ງຂອງລັດຖະບານທັງໝົດຢູ່ໃນເມືອງ ຫລັງຈາກໄດ້ມີການສູ້ລົບກັນຢ່າງຮ້າຍແຮງໃນຕອນກາງຄືນ ໃນຂະນະທີ່ພວກເຈົ້າໜ້າທີ່ປະຈຳແຂວງໄດ້ຮຽກຮ້ອງໃຫ້ປະຊາຊົນ ພາກັນກັບຄືນໄປປະຕິບັດວຽກງານຂອງເຂົາເຈົ້າຢ່າງປົກກະຕິ. ພວກທ່ານໝໍປະຈຳໂຮງໝໍຂົງເຂດທີ່ສຳຄັນ ໄດ້ກ່າວຕໍ່ວີໂອເອວ່າ ການສູ້ລົບໄດ້ເຮັດໃຫ້ພົນລະເຮືອນໄດ້ຮັບບາດເຈັບ ລົ້ມຕາຍ ແຕ່ບໍ່ຍອມແຈ້ງໃຫ້ຊາບໂຕເລກໂດຍກ່າວວ່າ “ພວກເຮົາມີຄວາມຫຍຸ້ງ ຍາກຫລາຍເພື່ອຮັກສາຊີວິດ ແຕ່ທ່ານກໍຍິນດີທີ່ຈະນັບຈຳນວນເຂົາເຈົ້າ.”
ໂຄສົກກະຊວງປ້ອງກັນປະເທດ ທ່ານ Dawlat Waziri ກ່າວຕໍ່ກອງປະຊຸມນັກຂ່າວຢູ່ນະ ຄອນ Kabul ໃນວັນອັງຄານມື້ນີ້ວ່າ ການປະຕິບັດງານຮັກສາຄວາມປອດໄພກຳລັງມີຂຶ້ນ ເພື່ອກວດລ້າງໃນເມືອງ Kunduz ທີ່ຍັງມີພວກຫົວຮຸນແຮງຕົກຄ້າງຢຸູ່.
ທ່ານ Waziri ກ່າວວ່າ “ກຳລັງຮັກສາຄວາມປອດໄພກຳລັງເຄື່ອນຍ້າຍດ້ວຍຄວາມລະມັດ ລະວັງ ຕໍ່ກຸ່ມ Taliban ທີ່ຍັງຕົກຄ້າງຢູ່ ຊຶ່ງພາກັນລີ້ຊ່ອນຢູ່ຕາມບ້ານເຮືອນຂອງປະຊາຊົນ
ເພື່ອອ້ອມເອົາເຂົາເຈົ້າ ແລະກຳຈັດພວກເຂົາໂດຍທີ່ບໍ່ໄດ້ທຳຮ້າຍປະຊາຊົນ ຫລືຊາວເມືອງທີ່ນັ້ນ.
ການສູ້ລົບຢູ່ໃນເມືອງຊຶ່ງຕັ້ງຢູ່ທາງພາກເໜືອຂອງປະເທດ ໄດ້ມີຂຶ້ນໃນວັນຈັນວານນີ້ ຫລັງຈາກພວກກະບົດ Taliban ໄດ້ເລີ້ມທຳການໂຈມຕີໃນຕອນເຊົ້າມືດ ຈາກຫລາຍດ້ານ ແລະເຂົາເຈົ້າໄດ້ບຸກເຂົ້າໄປເລິກຈົນເຖິງໃຈກາງເມືອງ ເພື່ອປັກທຸງສີຂາວເຂົາເຈົ້າຂຶ້ນ ຢູ່ຈະຕຸລັດກາງເມືອງ Kunduz ທີ່ໄດ້ຕົກຢູ່ໃນການຄວບຄຸມຂອງພວກກະບົດອິສລາມເມື່ອເດືອນກັນຍາປີ 2015.
ທັງສອງຝ່າຍຕ່າງກໍໄດ້ກ່າວອ້າງວ່າ ຕົນໄດ້ເຮັດໃຫ້ຝ່າຍກົງກັນຂ້າມບາດເຈັບລົ້ມຕາຍຢ່າງໜັກ ແລະມັນເປັນໄປບໍ່ໄດ້ ທີ່ຈະຢັ້ງຢືນຢ່າງເປັນອິດສະຫຼະ ໃນການກ່າວອ້າງຂອງແຕ່ລະຝ່າຍ.
ກອງທັບສະຫະລັດກ່າວໃນວັນຈັນວານນີ້ວ່າ ຕົນໄດ້ຕິດຕາມເບິ່ງສະຖານະການ ຢ່າງໃກ້ຊິດ ຢູ່ໃນເມືອງ Kanduz ແລະໄດ້ກຽມພ້ອມກຳລັງທາງອາກາດເພື່ອໃຫ້ການຊ່ວຍ ເຫລືອແກ່ກຳລັງອັຟການິສຖານ ຖ້າຫາກຕ້ອງການ.